24 Ліпеня
24.07.2020

Распушчальная кава – не такая ўжо і благая «страва»…:)

logo
Думкі ўслых
340 0 41
Памер шрыфта:
  • A
  • A
  • A
Ці адносіцеся вы да тых людзей, якія ўспрымаюць усё на веру?! Адразу і безагаворачна?! Але ж тады ўсё роўна штораз давядзецца мяняць сваё меркаванне. Бо, як прынята ў нас казаць, хтосьці распрацоўвае адно даследаванне, хтосьці – дыяметральна супрацьлеглае… І абодва за гэта атрымліваюць грошы! 🙂 А як яно насамрэч? Каму верыць?! Паспрабуй даведайся… Узяць хаця б такі вядомы напой, як распушчальная кава… Між іншым, сёння – яе Дзень. Народзінаў. Чарговае неафіцыйнае свята.
Распушчальная кава. Карысць.

А ці чулі вы пра яе шкоднасць? А пра карысць? Спажываеце пастаянна? Не п’яце ніколі, нават калі натуральнай ніхто не прапануе, а кавы хочацца так, што вушы ў трубачку скручваюцца?! 🙂 Спакойна вып’еце і тое, і другое, і «тры ў адным»?!

Я да апошніх адношуся. Бо, да ўсяго, падтрымліваю вядомае: «І які ж журналіст без кавы?!» 🙂 Эх, колькі ж яе выпіта, рознай, за амаль 20 гадоў працы па спецыяльнасці – не злічыць! Залежнасць?! Відаць, ёсць. Хаця…

Памятаю (і распавядала ўжо тут неяк, здаецца), як у 2010-м збіралася адпачываць у Паланзе. Набрала з сабою кавы «тры ў адным» і… За тры тыдні не скарысталася ніводным пакецікам! І ніхто ж не замінаў, не стрымліваў, не казаў, што шкодна. Проста не хацелася…

Дарэчы, толькі зараз, распрацоўваючы, так бы мовіць, тэму, даведалася пра цікавы факт. Калі ў распушчальную каву дадаць пару-тройку кропель лімоннага соку альбо мёду, дык смак напою наблізіцца да натуральнай кавы элітных гатункаў. Трэба будзе абавязкова праверыць!

Распушчальная кава. З мёдам.

Зрэшты, памятаю, адзін час проста піла распушчальную каву з мёдам. Свежым. Праўда, не дадавала ў напой, а ўпрыкуску. І вельмі смачна было… Незвычайна…

Паколькі ў нашай распушчальнай кавы сёння дзень народзінаў, значыць, будзем казаць пра імянінніцу толькі добрае. Ну, ці пераважна – добрае… Згодныя?! 🙂

І найперш прыгадаем пра хуткасць прыгатавання, з якой можа справіцца нават дзіця. Насыпаў, заліў – пі! 🙂 Асабіста я ў апошнія гады стараюся спажываць не парашок (ім у свой час «абпілася» ў рэдакцыі раённай газеты, дзе працавала 13 гадоў! 🙂 ), а грануляваную альбо субліміраваную распушчальную каву з даданнем натуральнай. З радасцю ўбачыла на адным сайце, што той гатунак і марка, якія прыйшліся даспадобы, лічацца аднымі з лепшых. Хаця не выключаю, што на іншым сайце на іх будуць найбольш наракаць. 🙂 Тут ужо давяраю не даследаванням, а ўласным адчуванням.

Распушчальная кава. Карысць добрых гатункаў.

А ці ведаеце вы, што ў якаснай распушчальнай каве ўтрымліваецца меней кафеіну, чым у натуральнай? А калі яшчэ дадаць малака… Хаця такая «страва», як кава з малаком, таксама выклікае шмат пытанняў і спрэчак… Але такі напой, сцвярджаюць даследчыкі, могуць піць нават тыя, хто церпіць ад павышэння артэрыяльнага ціску і пры гэтым не мае сіл зусім адмовіцца ад кавы.

Зрэшты, усё вельмі індывідуальна. Бо калі я, напрыклад, адчуваючы павышэнне ціску, усё ж вып’ю распушчальнай кавы з малаком… Услед абавязкова давядзецца прымаць таблеткі.

Але ж мы пра добрае, так?! 🙂 Дык вось нават калі з распушчальнай кавы пры яе вытворчасці прыбіраюць шмат чаго карыснага, штосьці застаецца. І нам хапае. Напрыклад, каб пасля кубачка гэтага напою палепшылася канцэнтрацыя ўвагі. І не развівалася клінічная дэпрэсія. Нармалізавалася перыстальтыка кішэчніка. Палепшыліся кагнітыўныя здольнасці. Ну ёсць жа, ёсць жа плюсы! 🙂

Распушчальная кава. Паляпшае кагнітыўныя здольнасці.

Ужо не першы раз сустракаю згадкі пра карысць менавіта распушчальнай кавы для жанчын: яна зніжае рызыку анкалагічных і сардэчна-сасудзістых захворванняў. Галоўнае – не «перабраць дозу»: да трох кубкаў кавы ў дзень. І менавіта распушчальная кава вымывае меней кальцыю з жаночага арганізму – у адрозненне ад натуральнай.

І для мужчын ёсць таксама індывідуальныя плюсы: такая кава дапамагае вызваляць аксітацын – гармон шчасця. А значыць, мінус дэпрэсія! І сардэчна-сасудзістыя захворванні, якія выклікаюцца негатыўнымі перажываннямі. Норма тая ж – да трох кубкаў у дзень.

Не трэба забывацца таксама пра мачагонны эфект распушчальнай кавы. Атрымліваецца, што яна выводзіць лішнюю вадкасць з арганізма і здымае ацёкі. Плюс, як і натуральная, утрымлівае антыаксіданты, якія паляпшаюць стан сасудаў і станоўча ўплываюць на падтрыманне маладосці арганізма.

Распушчальная кава.

Мінусы распушчальная кава таксама мае. Але пра іх – наступным разам. А сёння проста… Смачна піць! 🙂

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

340 0 41

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.