10 Красавіка
10.04.2020

Рост колькасці выпадкаў і новыя рашэнні. Міністэрства аховы здароўя распавяло пра сітуацыю з COVID-19

logo
Навiны
334 0 24
Памер шрыфта:
  • A
  • A
  • A
У Беларусі на стацыянарным лячэнні, па дадзеных на 10-га красавіка, знаходзяцца 1793 чалавекі з пацверджанай каранавіруснай інфекцыяй. У асноўным, захворванне працякае ў лёгкай ці сярэдняй форме. Пасля праходжання лячэння паправіліся 169 чалавек. Міністэрства аховы здароўя звяртае ўвагу, што павелічэнне колькасці хворых на COVID-19 паступальнае і кантраляванае. Большасць выпадкаў – гэта выяўленыя кантакты 1-га і 2-га ўзроўняў.
Каранавірус. Кантакты.

Пра новыя рашэнні Міністэрства аховы здароўя і цяперашнюю сітуацыю з каранавіруснай інфекцыяй у краіне праінфармавала на брыфінгу ў пятніцу, 10-га красавіка, намеснік міністра аховы здароўя Рэспублікі Беларусь Алена Богдан.

Прыняты шэраг новых арганізацыйных дакументаў

У прыватнасці, па словах Алены Богдан, Саветам Міністраў была прынятая пастанова, у якой рэгламентаваныя і ўдакладненыя крытэрыі, правілы паводзінаў чалавека на самаізаляцыі.

Нарматыўныя дакументы Міністэрства аховы здароўя таксама атрымалі некаторыя змены і дапаўненні. Перш за ўсё, падрыхтаваны нарматыўны дакумент па аказанні медыцынскай дапамогі цяжарным, парадзіхам. У дакуменце, як распавяла намеснік міністра, прапісаныя і ўлічаныя ўсе пытанні, якія тычацца не толькі вядзення і лячэння такіх жанчын, але і ўтрымліваецца шэраг тлумачэнняў, якія датычацца многіх бытавых пытанняў, што хвалююць будучых мамаў у сітуацыі, якая склалася.

Каранавірус. Як праходзяць цяжарнасць і роды.

Акрамя гэтага, у асобны клінічны пратакол выдзеленыя меры аказання медыцынскай дапамогі дзецям ва ўзросце ад 0 да 18 гадоў з каранавіруснай інфекцыяй.

 
Алена Богдан
Намеснік міністра аховы здароўя Рэспублікі Беларусь
Нягледзячы на тое, што дзяцей у нас не так і шмат (менш за 1% ад усіх выпадкаў каранавіруснай інфекцыі за перыяд назірання) і не было зафіксавана цяжкіх формаў захворвання, мы пашырылі інструкцыю і прапісалі ўсе нюансы, якія датычацца, у тым ліку, выпадкаў бессімптомнага носьбіцтва ў дзяцей, а таксама немаўлятаў, якія нарадзіліся ў маці з каранавіруснай інфекцыяй.
Спецыфічных мераў прафілактыкі каранавіруснай інфекцыі ў цяжарных няма, яны нічым не адрозніваюцца ад тых, якія рэкамендаваныя звычайным грамадзянам.
 
Алена Богдан
Намеснік міністра аховы здароўя Рэспублікі Беларусь
У нас ёсць асобна выдзеленыя і падрыхтаваныя радзільні, нашы спецыялісты ведаюць, як сябе паводзіць. Акрамя таго, мы працягнулі тэрмін назірання за немаўляткам, калі ён нарадзіўся ў жанчыны з каранавіруснай інфекцыяй, да 28 дзён (у звычайнай сітуацыі гэты перыяд складае 14 дзён), лічачы яго кантактам 1-га ўзроўню.
Яшчэ адно новаўвядзенне датычыцца шпіталізацыі кантактаў 1-га ўзроўню. Калі ў іх ёсць усе неабходныя ўмовы для самаізаляцыі, такі чалавек можа знаходзіцца ў хатніх умовах пад наглядам урачоў участковай службы. Тэсты на каранавірусную інфекцыю ў іх будуць праводзіцца на 1-ы, 7-ы і 12-13-ы дзень. На ўвесь перыяд самаізаляцыі ім дадуць лісток непрацаздольнасці.

Каранавірус. Самаізаляцыя.

Змены закранулі і выдачы на рукі некаторых безрэцэптурных лекавых сродкаў. Як патлумачыла Алена Богдан, гэтая мера прадыктаваная тым, што ў выніку ажыятажу за паўтара тыдня быў раскуплены 14-месячны запас парацэтамолу.

 
Алена Богдан
Намеснік міністра аховы здароўя Рэспублікі Беларусь
Таму намі было прынятае рашэнне ўвесці абмежаванне водпуску лекаў, якія могуць быць выкарыстаныя пры аказанні дапамогі пацыентам з каранавіруснай інфекцыяй у тым ліку. У прыватнасці, абмежаваная аднаразовая выдача на рукі таблетак парацэтамолу ў колькасці 40 штук. Адпускацца таксама будуць толькі дзве ўпакоўкі «Азельтамівіру» і 10 масак. Прымяняць гэтыя меры рэкамендавана як дзяржаўным аптэкам, так і прыватнай формы ўласнасці.
У рэспубліцы створаны таксама кругласутачныя цэнтры тэлемедыцынскага кансультавання. Звязацца па праблемных пытаннях са спецыялістамі гэтых цэнтраў, а гэта супрацоўнікі кафедраў медыцынскіх ВНУ і БелМАПА, зможа любы ўрач з любой бальніцы, адзначыла намеснік міністра.

Больш выкананых тэстаў – больш выпадкаў

Каранавірус. Тэсты.

І да гэтага трэба быць гатовымі, упэўненая Алена Богдан. Сёння на каранавірусную інфекцыю тэсціруюцца пацыенты з пнеўманіямі сярэдняй і цяжкай ступені цяжкасці, кантакты 1-га ўзроўню, а таксама кантакты 2-га ўзроўню з прыкметамі вострых рэспіраторных інфекцый, асобы, якія прыбылі з-за мяжы. Запас тэстаў ёсць. Калі з’явіцца неабходнасць павялічыць колькасць даследаванняў да 6 тысяч у суткі, будуць прыцягнутыя дадатковыя лабараторыі. Пакуль такія аналізы робяць у 13 лабараторыях.

 
Алена Богдан
Намеснік міністра аховы здароўя Рэспублікі Беларусь
Мы сёння спрабуем прыняць усе меры, каб выявіць максімальную колькасць выпадкаў каранавіруснай інфекцыі, ізаляваць гэтых людзей, не дапусціць распаўсюджвання. Чым большы ахоп тэсціраваннем, тым больш выпадкаў. Да гэтага трэба быць гатовым.
У Беларусі выкарыстоўваюцца тэсты, якія заснаваныя на ПЦР-дыягностыцы. Прапрацоўваецца таксама пытанне пра ўвядзенне яшчэ аднаго даследавання на аснове выдзялення M і G імунаглабулінаў. Гэтыя два імунаглабуліны сведчаць, на якой стадыі знаходзіцца захворванне: вострае цячэнне альбо ідзе працэс аднаўлення.

Якія ўстановы прымаюць хворых з каранавіруснай інфекцыяй

Рэспубліканскі шпіталь інвалідаў ВАВ па-ранейшаму прымае кантакты першага ўзроўню, якія не могуць знаходзіцца на самаізаляцыі. Калі ў такіх пацыентаў будзе пацверджаны каранавірус, іх перавядуць у спецыяльнае аддзяленне. Працягвае працаваць Гарадскі клінічны скурна-венералагічны дыспансер, Рэспубліканская клінічная бальніца медыцынскай рэабілітацыі ў Аксакаўшчыне. Асноўнымі бальніцамі Мінска, у якія накіроўваюць пацыентаў з каранавірусам, застаюцца 6-я ГКБ, 10-я ГКБ, цяжарныя размяшчаюцца ў 3-й ГКБ. Арыентаваная на аказанне дапамогі пацыентам з каранавіруснай інфекцыяй таксама 4-я ГКБ.

 
Алена Богдан
Намеснік міністра аховы здароўя Рэспублікі Беларусь
Нашы РНПЦ, як і ўся лячэбная сетка, спынілі планавую шпіталізацыю. У звычайным рэжыме працуюць 1-я ГКБ, 2-я ГКБ, 11-я ГКБ, 5-я ГКБ, 2-ая радзільня, бальніца хуткай медыцынскай дапамогі, Мінскі навукова-практычны цэнтр хірургіі, гінекалагічная бальніца. Дзіцячыя бальніцы працуюць у звычайным рэжыме. У Мінскай гарадской дзіцячай інфекцыйнай бальніцы ёсць спецыяльнае аддзяленне для дзяцей – кантактаў першага ўзроўню і з пацверджаным каранавірусам.
Намеснік міністра дадала, што ў кожнай медустанове выдзеленыя месцы ў выпадку выяўлення ў пацыента каранавіруснай інфекцыі. Часам чалавек паступае з апендыцытам, а у яго пасля выяўляюць каранавірус.

Ахвяраванні на дабрачынным рахунку

На дабрачынныя рахункі Рэспубліканскага цэнтра арганізацыі медыцынскага рэагавання Міністэрства аховы здароўя Рэспублікі Беларусь на барацьбу з распаўсюджваннем COVID-19 паступіла 3 937 777 рублёў і 78 461 еўра. Сярод найбуйнейшых дарыльшчыкаў – Беларускі саюз жанчын, Беларускі прафсаюз работнікаў аховы здароўя, прыватныя кампаніі і прадпрыемствы. Усяго на сёння пералічылі фундатарскую дапамогу 1 310 фізічных асобаў і 210 юрыдычных асобаў.

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

334 0 24

Нарадзілася і жыву ў Мінску. У 1995 годзе скончыла сталічную сярэднюю школу №168, затым паступіла ў Беларускі дзяржаўны ўніверсітэт на факультэт журналістыкі. Пасля заканчэння вучобы ў 2000 годзе была размеркаваная ў Беларускае тэлеграфнае агенцтва (БелТА), дзе 8 гадоў прапрацавала спецыяльным карэспандэнтам аддзела палітычнай і сацыяльнай інфармацыі. У розныя гады асвятляла падзеі ў сферы навукі, культуры, адукацыі і аховы здароўя. У 2011 годзе перайшла ў прэс-службу Міністэрства аховы здароўя. Кола маіх абавязкаў уключала, у тым ліку арганізацыю сустрэчаў спецыялістаў са СМІ, складанне прэс-рэлізаў, забеспячэнне журналістаў інфармацыяй пра дзейнасць сферы аховы здароўя, а таксама падрыхтоўку аператыўных каментароў экспертаў і фарміраванне стужкі навінаў афіцыйнага сайта міністэрства. З 2017 года працую ўласным карэспандэнтам аддзела інтэрнэт-праектаў рэдакцыі газеты «Медыцынскі веснік». З'яўляюся аўтарам публікацый на інфармацыйным партале «Здаровыя людзі» і сайце для падлеткаў «Teenage.by».