У гэтым месяцы нашы ўрачы і эксперты паспелі распавесці пра розныя хваробы. Пра многія з іх мы раней не чулі. А вы? Прайдзіце тэст – і праверце свае веды.
1. Каму трэба больш за ўсё баяцца дыфілабатрыёзу?
- Рыбакам, бо гэтае захворванне перадаецца праз рыбных паразітаў.
- Леснікам, бо гэтую хваробу пераносіць клешч.
- Дачнікам, бо пераносчыкі захворвання – мышы і краты.
Адказ: 1.
Дыфілабатрыёз перадаецца з прэснаводнай рыбай. Узбуджальнік захворвання, шырокі стужачнік, можа дасягаць 8 метраў у даўжыню і жыць у нашым тонкім кішэчніку. Пры дыфілабатрыёзе надыходзіць знясіленне і выдзяленне з калам членікаў паразіта. Працягласць жыцця чарвяка ў арганізме чалавека можа дасягаць 25 гадоў.
Больш падрабязна пра лячэнне глістоў і іншых паразітаў – тут.
2. Пра хваробу якога органа кажа чорная жаўтуха?
- Зразумела, што хворая печань. Чорны колер кажа пра запушчанасць захворвання.
- Гэта хвароба скуры, штосьці парушанае ў пігментацыі.
- Гэта сур'ёзнае захворванне падстраўнікавай залозы.
Адказ: 3
Чорная жаўтуха магчымая пры раку падстраўнікавай залозы. Скура набывае зелянява-чорны колер.
Падрабязна пра тое, як скура сігналізуе пра захворванні органаў стрававання, – тут.
3. Пры якіх захворваннях урач прапіша антыагрэганты?
- Такія прэпараты прызначаюць пры сардэчна-сасудзістых захворваннях, напрыклад, інсульце і інфаркце.
- Пры хваробе Альцгеймера, дэменцыі.
- Для падаўлення агрэсіі і дэпрэсіі.
Адказ: 1
Антыагрэганты – група прэпаратаў, якія перашкаджаюць тромбаўтварэнню. Самы вядомы антыагрэгант – аспірын. Яго вельмі часта прызначаюць пацыентам з захворваннямі сэрца і сасудаў.
А ці трэба піць аспірын для прафілактыкі трамбозаў здаровым людзям? Адказ – тут.
4. У каго можа здарыцца праэклампсія?
- У людзей, якія пакутуюць ад эпілепсіі.
- У цяжарных.
- У сталых.
Адказ: 2.
Праэклампсія – ускладненне, якое развіваецца ў другой палове цяжарнасці. Асноўная прычына – спазм перыферычных сасудаў. Пры гэтым стане павышаецца артэрыяльны ціск, развіваюцца ацёкі, адбываецца страта бялку. Рызыка развіцця такога ўскладнення ёсць у пацыентаў са спадчыннай тромбафіліяй.
Як даведацца, ці няма ў вас генетычнай схільнасці да ўтварэння тромбаў, і што з гэтым рабіць – тут.
5. Адна з самых частых прычынаў раптоўных траўманебяспечных падзенняў – саркапенія. Што гэта?
- Праблемы са зрокам.
- Зніжэнне сілы і масы мышцаў.
- Прыроджаны стан, калі адна нага карацейшая за другую.
Адказ: 2
Саркапенія – гэта ўзроставая атрафічная дэгенерацыйная змена шкілетнай мускулатуры, якая прыводзіць да паступовай страты мышачнай масы і сілы. З-за страты сіл чалавек можа нечакана паваліцца, атрымаць траўму. Але з узроставай саркапеніяй можна змагацца з дапамогай пэўных фізпрактыкаванняў і харчавання. Як гэта рабіць – тут.
6. Калі на скуры ўтвараецца пляма дыяметрам 2-5см, якая лушчыцца, а ў цэнтры яе яшчэ адна пляма з ярка-чырвонай аблямоўкай, гэта:
- Ружовы лішай
- Стрыгучы лішай
- Апаясвальны лішай.
Адказ: 1.
Ружовы лішай Жыбера – гэта інфекцыйна-алергічная экзантэма. Часта гэтае захворванне развіваецца на фоне зніжэння ахоўных сіл арганізма, пасля прастуды ці ВРВІ. Часцей сустракаецца ў падлеткаў і маладых людзей.
Ці небяспечны ружовы лішай і як яго лячыць – тут.
7. Калі парушаныя здольнасці да авалодання навыкамі чытання і пісьма, гэта:
- Дысплазія.
- Дысграфія.
- Дыслексія.
Адказ: 3
Дыслексія – спецыфічная няздольнасць да навучання, якая мае нейралагічнае паходжанне. Пры ёй назіраюцца цяжкасці з дакладным альбо беглым распазнаннем слоў, праблемы з пісьмом. Дыслексія можа быць не толькі ў дзяцей, але і ў дарослых. Як прыняць праблему і жыць без страху – тут.
Дарэчы, дысплазія – гэта няправільнае развіццё тканак, органаў альбо частак цела, дысграфія – частковае парушэнне працэсу пісьма, якое выяўляецца ў стойкіх, паўтаральных памылках.
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by