03.10.2023
03.10.2023

Слушныя парады грыбнікам

logo
Карысныя прадукты
0 76
Памер шрыфта:
  • A
  • A
  • A

3 кастрычніка - Дзень грыбніка. Калі чый сезон? Як шукаць, каб знайсці? Як адрозніць ядомы грыб ад неядомага? У беларускіх лясах каля сямі тысяч відаў грыбоў. Сезон ціхага палявання ў нашай краіне пачынаецца з надыходам цяпла ў красавіку і працягваецца аж да халоднага снежня.

Мы сабралі некалькі слушных падказак, якія дапамогуць пачаткоўцу і сістэматызуюць веды бывалага грыбніка.

Калі чый сезон?

Смоўжы

Смаржкі

Першымі ў красавіку на святло з'яўляюцца смаржкі. Адрозніць іх нескладана: назва кажа сама за сябе. Акрамя таго, выдае капялюшык яйцападобнай формы. Грыб ядомы, але варта памятаць, што ў сырым выглядзе смаржкі ўтрымліваюць яд, які растварае эрытрацыты ў нашай крыві. Вырашыць дадзеную праблему дапаможа тэрмічная апрацоўка.

Наступны этап грыбнога сезону прыпадае на травень–чэрвень. У гэты час у лесе ўжо можна сустрэць знаёмыя нам сыраежкі, масляты, махавікі і нават баравікі. Аднак адшукаць іх няпроста, пакуль недастаткова цёпла. Бліжэй да канца чэрвеня, пасля таго як адцвітаюць ландышы, прыйдзе пара лісічак.

Белыя грыбы

Белыя грыбы

Лісічкі

Лісічкі

Падбярозавікі

Падбярозавікі

У ліпені пачынаюць трапляцца маслякі, падбярозавікі, падасінавікі і белыя грыбы. Пад канец ліпеня можна сустрэць практычна ўсіх прадстаўнікоў царства, але не так шмат.

Рыжыкі

Рыжыкі

Сапраўдны пік прыпадае на жнівень, калі добра прагрэлася зямля і як след разраслася грыбніца. Ціхіх паляўнічых ўжо чакае багаты здабытак. Акрамя ранейшых відаў з’яўляюцца рыжыкі і ваўнянкі.

Кошык трафеяў у верасні залежыць ад тэмпературы паветра. У гэтым месяцы таксама з'яўляюцца апенькі і вешанкі, якія можна збіраць да самых халадоў.

Як шукаць, каб знайсці?

Дзень грыбніка

Па-першае, з'яўленне тых або іншых грыбоў паддаецца логіцы. Чым цяплей на вуліцы, тым больш грыбоў, якія растуць у нізінах; чым халадней, тым яны «падымаюцца» вышэй.

Па-другое, ёсць грыбы-адзіночкі, ёсць грыбы-радзіны. Да апошніх належаць лісічкі, баравікі, казлякі ды інш.

Па-трэцяе, лепш за ўсё, збіраючыся ў лес, кіраваць у знаёмыя мясціны. Калі такіх няма, варта прыгледзецца да наваколля. Грыбы часцей за ўсё будуць расці ў моху, на цвёрдых паверхнях зямлі, уздоўж лясных сцежак. У ягадніку іх хутчэй за ўсё не будзе. Дарэчы, найбольш грыбнымі у нашай краіне лічацца лясы Мінскай і Віцебскай вобласці.

Як адрозніць ядомы грыб ад неядомага?

Лісічкі

Лісічкі і ілжывыя лісічкі

Некаторыя з ядомых грыбоў маюць сваіх атрутных двайнікоў. Пры гэтым расці яны могуць зусім побач, як, напрыклад, ілжывыя лісічкі. Падазрэнне можа выклікаць і занадта прыгожы, яркі колер, як у выпадку з мухаморам.

Яшчэ адной прыкметай атрутнага грыба часта з'яўляецца так званая “спаднічка”. Апошняе правіла не працуе з апенькамі, у іх выпадку спаднічка сведчыць пра тое, што грыб ядомы.

Акрамя таго, у 21-м стагоддзі не варта грэбаваць сучаснымі мабільнымі дадаткамі, здольнымі за хвіліны вызначыць, які прадстаўнік царства грыбоў перад вамі. Пры гэтым нельга забываць пра правіла “давярай, ды правярай”.

Найлепшым дапаможнікам, вядома, з'яўляецца дасведчаны грыбнік побач і веданне грыбоў «у твар». Аднак нават гэтыя акалічнасці не заўсёды працуюць. Таму пры ўзнікненні нават маленькага сумневу лепш пакінуць трафей у лесе.

Грыбы

І яшчэ. Выпраўляючыся на ціхае паляванне, не забывайцеся, што наведваць лес варта ў вопратцы, якая цалкам закрывае цела. Па вяртанні неабходна пільна агледзець сябе і спадарожніка. У падарожжы не пашкодзіць наяўнасць свістка і добра зараджанага тэлефона.

Што шукаць у лесе? 15 відаў грыбоў, якія можна есці людзям

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 76

Студэнтка факультэта журналістыкі БДУ
Глядзіце таксама