17 Лютага
17.02.2019

Сок таматны: п’ём і... лечымся!

logo
Думкі ўслых
164 0 67
Памер шрыфта:
  • A
  • A
  • A

А вы ведаеце, што таматным сокам, разведзеным з вадой, раяць... паласкаць горла пры танзіліце? Ды яшчэ 4-6 разоў на дзень! І яго ж з пэўнымі дадаткамі піць пры грыпе – дапамагае?! Прызнацца, сама ўпершыню пачула пра пэўнае, так бы мовіць, нямэтавае яго выкарыстанне.

Так атрымалася, што таматны сок у мяне з братам – самы любімы з дзяцінства. Зрэшты, гэта і зразумела: у 70-80-ыя гады мінулага ўжо стагоддзя разам з бярозавікам гэта былі самыя даступныя напоі ў нашых простых савецкіх крамах. Экзатычныя апельсіны з мандарынамі сапраўды з’яўляліся на стале пераважна на Новы год. Зразумела, ніхто сок з іх не ціснуў! Не тое, што зараз!

Ужо некалькі гадоў запар мы робім уласны таматны сок – з памідораў, вырашчаных на дачы. Мама падабрала такі рэцэпт... Ну вось ні дадаць, ні прыбраць – цалкам гарманічны смак! Куды да яго куплёнаму!

І вось у мінулым сезоне мне асабліва спадабалася яго гатаваць самой. Нягледзячы на тое, што праца цалкам ручная. Неяк даспадобы прыйшлася менавіта яго самая занудлівая, з пункту гледжання знаёмых, яго частка. Нават тры... часткі! Гэта калі памідоры спачатку трэба нарэзаць (шмат). Затым пэўны час патрымаць іх на агні, увесь час памешваючы (спраўлялася адразу з двума-трыма каструлямі!). А тады працерці праз друшляк. Чамусьці захапіў сам працэс...

І няўжо я такім экалагічна чыстым прадуктам, нават па вялікай патрэбе, буду горла паласкаць?! Ды ніколі ў жыцці!!! Таму гэтую прапанову – міма-міма! А вось другая парада падалася слушнай і карыснай. Бо сок там – п’юць!

Значыць, рэцэпт для тых, хто хварэе на грып (але думаю, што і пры прастудзе спатрэбіцца). У шклянку таматнага соку дадаць 0,5 чайнай лыжкі парашку куркумы (люблю гэтую прыправу!), 2 сталовыя лыжкі лімоннага соку, востры перац на кончыку нажа і 2-3 здробненыя зубкі часнаку. Усё добра размешваецца, крыху падаграваецца і п’ецца, як гарбата, адзін альбо два разы на дзень.

Уважліва чытайце склад, сябры! Ці ўсё пералічанае асабіста вам падыходзіць, ці няма на што алергіі ці непераноснасці?! А можа, хтосьці проста не любіць вострае?!

Самае цікавае, што нават урачы прызнаюць карысць такога народнага сродку. Толькі прапануюць удасканаліць рэцэпт, дадаўшы ў напой яшчэ 0,5 чайнай лыжкі аліўкавага альбо сланечнікавага алею. Для чаго?! А для лепшага засваення мінералаў, вітамінаў і натуральнага антыаксіданту з памідораў – лікапіну!

Што ж датычыць, так бы мовіць, навуковага абгрунтавання карысці таматнага напою з пералічанымі дадаткамі, дык памідоры, апрача антыаксідантнага дзеяння, яшчэ садзейнічаюць вывядзенню з арганізма таксінаў, што выдзяляюць вірусы. Сам сок таматны – антымікробны. А пра карысць часнаку, куркумы і лімону, думаю, распавядаць не трэба. І так усё навідавоку.

А, яшчэ ў нас крыху перцу ў складзе! І абавязкова – вострага! Бо ён, апрача іншага, паляпшае кровазварот і садзейнічае памяншэнню хваравітых адчуванняў у суставах і мышцах.

Па шчырасці, дужа не хачу, каб з’явілася нагода выпрабаваць гэты рэцэпт на практыцы. Проста зафіксавала яго на ўсялякі выпадак. Раптам яшчэ каму параіць са знаёмых... А так мы проста з задавальненнем п’ём таматны сок уласнага прыгатавання, які і без дадаткаў вельмі смачны і карысны!

А з рэцэптам яго прыгатавання я абавязкова вас пазнаёмлю! Толькі ў сезон! Дамовіліся?! А на заканчэнне – традыцыйнае пажаданне здароўя ўсім! І соку вам любімага – калі не штодня, дык часта!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

164 0 67

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.