1. Дзень пульманолага
Урачы, якія займаюцца захворваннямі лёгкіх, дыхальных шляхоў і працуюць у цеснай звязцы з рэаніматолагамі, таракальнымі хірургамі, спецыялістамі інтэнсіўнай тэрапіі, як ніхто запатрабаваныя ў перыяд пандэміі каранавіруса. Таму не дзіўна, калі гэтае свята, нягледзячы на выхадны дзень у календары, многія з іх сустрэнуць на працы.
Калі ж не кранаць каранавірус і прыгадаць, так бы мовіць, дапандэмійны час (вы яго яшчэ памятаеце?!), дык у якасці прафілактыкі хваробаў лёгкіх і дыхальных шляхоў пульманолагі раяць звычайна наступнае: не паліць, загартоўвацца, весці актыўны і здаровы лад жыцця, па магчымасці пазбягаць алергенаў, ашчаджацца пры працы на шкоднай вытворчасці, правільна харчавацца, трэніраваць дыхальную сістэму.
І штосьці з гэтага, а то і ўсё, мы ж можам выконваць, праўда?! Асабліва зараз, калі многія знаходзяцца дома – альбо на самаізаляцыі, альбо на падаленай працы. І вольны час, які раней ішоў на паездкі, можна выкарыстаць для прафілактыкі і аздараўлення. Было б жаданне…
А ўсіх пульманолагаў інфармацыйны партал Здаровыя людзі шчыра віншуе з прафесійным святам!
2. Сусветны дзень барацьбы з артэрыяльнай гіпертаніяй
«Ціск… Ну, падумаеш, ціск», – разважаюць многія з нас, маючы на ўвазе павышаныя яго лічбы. І нават пасля вымярэння танометрам нічога не робяць, каб нармалізаваць, кантраляваць, палепшыць самаадчуванне. Знаёмая сітуацыя, праўда?!
І толькі калі прыцісне, мы хапаемся за выпісаныя калісьці лекі, часцяком не ўсведамляючы, што прымаць іх трэба рэгулярна, а не толькі тады, калі робіцца блага. Больш-менш нармалізаваўшы сітуацыю, зноў хаваем таблеткі з вачэй і жывем… да наступнага пагаршэння.
І яшчэ ж праблема ў тым, што артэрыяльную гіпертанію мы можам не адчуваць. А тым часам адбываюцца незваротныя змены ў сасудах. Хтосьці будзе спакойна працягваць працаваць і пры верхнім паказчыку ў 180 мм рт.сл., а хтосьці не зможа падняцца і пры 135 мм рт.сл. Усё суб’ектыўна. Таму лепей усё ж ведаць свой нармальны ціск і арыентавацца на гэтыя лічбы.
Якія парады спецыялістаў для тых, хто церпіць ад артэрыяльнай гіпертаніі? Не паліць, не злоўжываць алкаголем, не ўжываць больш за 4-5 грамаў солі ў суткі, сачыць за вагой, павышаць фізічную актыўнасць, есці больш гародніны і садавіны…
І абавязкова вымяраць свой артэрыяльны ціск. Пры яго стойкім павышэнні – звяртацца да ўрача, рэгулярна (а не ад выпадку да выпадку) прымаць лекавыя сродкі, калі яны прызначаныя. Праходзіць усе абследаванні, шукаць прычыну павышэння ціску і па магчымасці ліквідоўваць іх.
3. Сусветны дзень памяці ахвяраў СНІДу
Здаецца, за столькі дзесяцігоддзяў існавання захворвання можна было б і прызвычаіцца да яго… Тым больш, што ў плане палягчэння жыцця такім хворым медыцына сапраўды зрабіла вялізны крок наперад. Але дыягназ па-ранейшаму пужае, праўда?!
Таму гэты дзень нагадвае нам, што трэба не толькі памятаць пра шматлікія ахвяры СНІДу, але і ведаць усё неабходнае пра гэтую хваробу, шляхі перадачы ВІЧ, элементарна засцерагацца.
Дарэчы, у сувязі з новым каранавірусам некаторыя спецыялісты выказваюць здагадку, што, магчыма, ён нікуды не сыдзе, а застанецца. Якраз як ВІЧ/СНІД. І пужайся-не пужайся, але змяніць такую сітуацыю, калі яна сапраўды ўзнікне, мы будзем не ў сілах… Не аптымістычна, разумею… Але што ж ты зробіш… Прывыкайма.
4. Дзень нараджэння Інтэрнэту
Вось менавіта так, з вялікай літары! З вялікай павагай! І што б мы рабілі без Інтэрнэту ў перыяд самаізаляцыі і падаленай працы?!
А чаму святкуюць менавіта 17 мая… Бо 29 гадоў таму быў зацверджаны стандарт для старонак – наш любімы www. Калі паглыбляцца ў гісторыю, дык, аказваецца, яшчэ ў 1969 годзе (!) паспрабавалі наладзіць абмен дадзенымі паміж камп’ютарамі на адлегласці 500 км.
А першая праграма для абмену электроннымі паведамленнямі (таксама не ведала) – мая равесніца, з’явілася ў 1971 годзе. І як жа доўга мы чакалі эпохі ўсеагульнай камп’ютарызацыі і шырокага распаўсюджвання Інтэрнэту… І як моцна дзівілі нас віртуальныя магчымасці, калі ўпершыню пазнаёміліся з імі…
Далей хтосьці трапіў у залежнасць і да гэтага часу адтуль не выбраўся. Іншыя справіліся самастойна. Інтэрнэт можна хваліць ці ганьбіць, падключаць-адключаць… Але ад гэтага сусветнае павуцінне нікуды не знікне. Будзем спадзявацца. Інакш зусім бы сумна зрабілася б без яго…
5. Дзень грэцкага арэха
І хаця свята, так бы мовіць, не наша, адзначаюць яго ў ЗША, але прыгадаць карысць грэцкага арэха, а таксама з’есці іх пару-тройку будзе зусім не лішнім. Асабліва – у перыяд пандэміі каранавіруса.
У грэцкага арэха шмат карысных уласцівасцяў. Яго раяць спажываць найперш людзям, чый арганізм аслаблены хваробамі, з аслабленым жа імунітэтам. Ён паляпшае працу мозгу, зніжае ўздзеянне стрэсу, супакойвае нервы. Ну якраз усё тое, што нам зараз патрэбнае!
Але ў той жа час нельга забывацца на яго высокую каларыйнасць і магчымыя алергічныя рэакцыі. Таму жменямі есці ачышчаныя грэцкія арэхі не варта нікому.
Я люблю дадаваць грэцкія арэхі ў цеста для бісквіта. Вельмі смачнымі яны атрымліваюцца, калі пасмажацца! А яшчэ нядаўна на дачным участку мы з татам пасадзілі два саджанцы грэцкіх арэхаў, якія прэзентавалі нам мой брат з жонкай (яны таксама пасадзілі на сваім участку). Цяпер будзем чакаць уласнага ўраджаю. Гадоў так праз …цаць.
А ўвогуле, сёння сярод заяўленых – 12 святаў. Ці адметных дзён. У памяць і для памяці. Дзеля атрымання новай інфармацыі і абнаўлення даўняй. Для нашага з вамі агульнага развіцця. Але найперш… Віват, Інтэрнэт!
Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!
