27.12.2019
27.12.2019

Сёння – Філімон. Хаты – прыбіраем, сябе – умываем!

logo
Адметнасць беларусаў
276 041
Памер шрыфта:
  • A
  • A
  • A

Дзень 27 снежня належыць Філімону. І даўней адзначалі яго не застоллем, а хатняй працай. І найперш прыбіралі павуцінне, падмяталі і мылі падлогу, наводзілі парадак. Бо лічылася, што ў адзін з самых цёмных дзён у годзе актывізуецца ўсялякая нечысць!

Філімонаў дзень. Нячыстая сіла.

Калі на зямлі ўжо ляжыць снег, дык чакай ад яе віхураў ці бураў. А калі штосьці ляпае па дахах ды вокнах хатаў, дык гэта таксама кікімары, ваўкалакі ды падобныя людзей пужаюць. Але не чапаюць тых, у каго кожная рэч ляжыць на сваім месцы, а ў хаце чыста. Так што прыбіраемся, прыбіраемся, сябры! 🙂

Вядома ж, мы як людзі сучасныя ва ўсё гэта не верым, праўда? Ва ўсялякія прымхі, прыкметы да нечысць. Але калі раптам штосьці такое ўсё ж прымроіцца… Лепей папярэдзіць!

А яшчэ нячыстая сіла ў Філімонаў дзень баіцца вады! Таму нашы продкі стараліся часцей умывацца, а то і пырскаць на сябе святой вадой. Праўда, гісторыя не захавала да нашага часу пэўныя сцверджанні, што гэта дапамагае. Але ж чысціня яшчэ нікому не шкодзіла, ці не так?!

Да таго ж, умывацца можна (і нават карысна!) не толькі простай вадой, а і мінералкай! Памятаю, неяк улетку практыкавала раз-пораз. Вельмі падабалася! Трэба зноўку ўвесці ў практыку.

Бо спецыялісты сцвярджаюць, што мінеральная вада тыпу «Баржомі» вельмі карысная пры тлустай скуры. І абяцаюць бачны вынік літаральна праз месяц. Маўляў, скура зробіцца больш пругкай, тлусты бляск знікне, а поры звузяцца.

Таксама можна змяшаць адвары рамонку ці календулы з мінералкай і замарозіць у формачках. Праціранне твару кубікамі лёду, калі няма супрацьпаказанняў, яшчэ больш карыснае для скуры. Таксама калісьці гэтым займалася.

Філімонаў дзень. Варта часцей умывацца.

Прычым адвары рамонку абяцаюць змяншэнне мімічных маршчынаў, мята зробіць твар свежым, а крываўнік скуру – аксамітнай. Бяром на ўзбраенне!

Дарэчы, калі вы збіраецеся ўзяць для ўмывання газаваную мінералку, дык яе трэба патрымаць 30-40 хвілін адчыненай. Мінералкай можна замяніць і спрэі з тэрмальнай вадой, якія прадаюцца ў крамах. Дастаткова пераліць яе ў бутэлечку з насадкай і на працягу дня ўвільгатняць скуру.

Прычым карысна гэта рабіць не толькі ўлетку, але і ўзімку. Бо падчас ацяпляльнага сезону паветра ў памяшканнях робіцца вельмі сухім. Адпаведна і са скуры знікае вільгаць. А насычаць яе вадой трэба не толькі знутры, але і звонку.

Філімонаў дзень. Увільгатняем скуру.

Зрэшты, адпаведнай інфармацыі ў сеціве мора. А мы вяртаемся да Філімона.

Нашы продкі заўважалі: калі напярэдадні ўвечары з’явіцца шэрань, дык на наступны дзень, 28 снежня, пойдзе снег. Ну-у-у-уу… Мы не супраць і таго, і другога! Абы з’явілася! J А то тая шэрань, якая была ўжо не так даўно, тоненькая якаясьці і кволенькая атрымалася. Асабліва не палюбуешся…

Сёння яшчэ трэба паназіраць за паводзінамі варонаў ды хатніх гусей! Калі першыя каркаюць, а другія махаюць крыламі і падціскаюць лапы, значыць, чакае нас (і іх!) наперадзе мароз.

Асабліва цікава было б параўнаць даўнія прыкметы з прагнозамі сіноптыкаў. Цікава, хто будзе бліжэй да ісціны?! 🙂

Філімонаў дзень. Гусь падціскае лапкі.

Знаёмячыся з разнастайнымі народнымі прыкметамі на розныя дні, усё часцей задумваюся вось пра што. Не было ў нашых продкаў ні гаджэтаў, ні інтэрнэтаў… А інфармацыі ў галаве трымалася, кажучы сучаснай мовай, – на гігабайты і тэрабайты! Гэта столькі трэба было памятаць! Перадаваць з пакалення ў пакаленне. А галоўнае – столькі выконваць!

Няўжо сапраўды былі такія людзі, якія выконвалі ўсё-ўсё-ўсё ў кожны з адметных у народным календары дзён?! Нават не магу сабе ўявіць… На Мацвееў дзень – хадзіць у госці і прымаць гасцей… На Фядота – прасці ды ткаць, але не вязаць… У Харытонаў дзень – не выходзіць з хаты, не есці ягад… І падгледзець жа не было дзе напярэдадні, як трэба, як правільна…

Філімонаў дзень. Прыкметы і традыцыі.

А сапраўды, як правільна? Ігнараваць тую духоўную спадчыну, што назапасілі нашыя продкі, бо зараз час зусім іншы? Ці ўсё ж часцей прыслухоўвацца да народнай мудрасці? І будзе нам шчасце?

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

276 0 41

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.