18.12.2020
18.12.2020

Сёння – Саўка, «Міколін бацька», а заўтра і сам Мікола… Зімовы!

logo
Адметнасць беларусаў
0 051
Памер шрыфта:
  • A
  • A
  • A

Даўней нашыя продкі ў назіраннях за надвор’ем злучалі тры народныя святы, што ішлі адно за адным, у такую прыкмету: «Барбара мосціць, Саўка цвякі вострыць, а Мікола прыбівае». Барбару (Варвару) ушаноўвалі 17 снежня, Саву (Саўку) – 18-га і Міколу – 19-га. А размова тут ідзе пра паступовае нарастанне… маразоў!

Мікола Зімовы. Пачастункі для дзяцей.

І калі з тыдзень таму яшчэ трымалася ўпэўненасць, што сёлета ўжо Мікола Зімовы будзе з такім надвор’ем, як патрэбна… Дык зараз, з сумам пазіраючы на плюс і туман, які нам абяцаюць на 19 снежня сіноптыкі, канстатуеш: і тут спраўджваецца даўнейшае назіранне: «Ніводнаму Міколе не вер ніколі». А Мікола ж яшчэ Вясновы (ці Летні) ёсць, памятаеце?! 22 мая. Таму і «ніводнаму». Быццам бы снежань не пераходны перыяд, але ж…

А яшчэ прыкмячалі: «Які дзень на Міколу Зімовага, такі і на Летняга», «Колькі Мікола Зімовы дасць снегу, гэтулькі Мікола Вясновы дасць травы». А вось гэта ў святле апошніх падзей рызыкоўнае сцвярджэнне… Наконт снегу і травы.

Але нават калі ў суботу надвор’е не дасць нам магчымасці пакатацца на лыжах, санках ды каньках, затое магчымасць зрабіць прыемныя падарункі і падаруначкі дзецям (ды і дарослым таксама) ёсць у кожнага! Было б жаданне!

Мікола Зімовы. Салодкае для дзяцей і дарослых.

У нашым цяперашнім жыцці так мала нагодаў для радасці… Спрэс трывогі і стрэсы, хваробы і страты… А вось такі, няхай сабе і невялічкі, знак увагі здольны падараваць столькі станоўчых эмоцый!

З удзячнасцю прыгадваю Міколу Зімовага год таму. Бо атрымала тады сюрпрыз, які буду прыгадваць доўга-доўга! Мая віртуальная (на той час) сяброўка ў ФБ Таццяна Шчарбакова нечакана пад вечар завітала да мяне ў офіс з падарункам! Тады і адбылося нашае знаёмства ў рэале. А беленькі снегавічок у жоўценькай шапачцы ды шаліку і зараз цешыць вока (цукеркі былі з’едзеныя амаль адразу).

Больш за тое! Танюша цяпер – адна з самых актыўных чытачак майго блогу «Думкі ўслых». Заўсёды адзначыць падабайкай, пракаментуе. І гэта насамрэч вельмі сагравае.

Шкада толькі, што па многіх прычынах сюрпрызу ў адказ у рэале ў мяне сёлета не атрымаецца. А так хацелася б…

«Не чакайце цудаў, рабіце іх самі!» – заклікаюць нас у сеціве і не толькі. І гэта вельмі правільна. Вось і Мікола Зімовы ж у нас – Цудатворца…

Мікола Зімовы. Цуды для дзяцей і дарослых.

Але пакуль тое заўтра, вернемся ў дзень гэты. Да САвы (не СавЫ!), альбо Саўкі. Нашыя продкі прыкмячалі: калі ў гэты дзень дзьмуў вецер, такога ж ветру трэба было чакаць і пасля Пятра, прычым усю квадру. Не дужа аптымістычная і гэтая прыкмета, але…

Дзе яшчэ ў народнай мудрасці прыгадваецца Сава? А вось тут: «На Савы не пралі, тоўклі просо, ячмень на куццю, жыто мололі на коляднікі, постолы плелі, волокі вілі», «Колісь на Варвары нічога не рабілі, а на Саву маталі клубкі на матужкі», «На Савы не трэба прасць. Не трэба круціць, каб добра было скату, бо скруціцца ягнёнак у калясо».

Калі хтосьці займаецца такімі рэчамі, сялянскай ці хатняй вясковай працай… Майце на ўвазе!

«Да Міколы няма зімы ніколі», «Хвалі зіму па Міколе»… Эх, наўрад ці пахвалім і сёлета… Ну што ж зробіш… Не працуюць ужо старадаўнія прыкметы. Так усё памянялася ў прыродзе, і не без умяшальніцтва чалавека. А калісьці ж прыходзіў час мікольскіх маразоў…

Мікола Зімовы. Мікольскія маразы.

Нашыя продкі лічылі, што Мікола – «другі пасля Бога заступнік». Да яго звярталіся, каб абараніў ад усіх бедаў і няшчасцяў. І сапраўды, ён нават па легендзе паказаў сябе добрым. Не тое што Касьян. Памятаеце, чаму ў Міколы два дні на год, а ў Касьяна – толькі 1 раз у 4 гады, 29 лютага?! І гэта яшчэ раз падкрэслівае, што дабрыня, добрыя справы заўсёды і ўсюды заўважаюцца і цэняцца…

З надыходзячым святам вас, шаноўныя сябры! З Днём святога Мікалая! Няхай ён выдасца светлым, добрым, сюрпрызным і запамінальным…

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0 0 51

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.
Глядзіце таксама