02.07.2021
02.07.2021

Ці любіце вы сюрпрызы? Рабіце сюрпрызы іншым!

logo
Думкі ўслых
0 033
Памер шрыфта:
  • A
  • A
  • A

Размова, вядома ж, пра сюрпрызы прыемныя. Няхай сабе самыя маленькія. Але каб яны прынеслі чалавеку радасць. Той жа букецік палявых кветак, падораны жанчыне… Велападарожжа для каханых… Білеты ў тэатр… Праўда, у сувязі з пандэміяй каранавіруса і ростам захваральнасці выбар сюрпрызных калектыўных вандровак абмяжоўваецца. Інакш я б, напрыклад, зрабіла сюрпрыз сяброўцы ў выглядзе запрашэння ў лавандавыя далягляды… Эх! А сёння ж – Дзень сюрпрызаў!

Сюрпрызы. Прыемныя сюрпрызы - вандроўка да лавандавых даляглядаў.

Зрэшты, ніхто не раіць абмяжоўвацца адным днём. І калі ў вашым бліжэйшым (ці нават далёкім) акружэнні ёсць чалавек, які любіць прыдумляць прыемныя сюрпрызы, лічыце, што вам вельмі пашанцавала!

Да мяне адзін з сюрпрызаў прыехаў ужо ўчора, напярэдадні свята Я-то яго, вядома ж, замаўляю штогод. Але штораз не ведаю, атрымаецца ці не. Апошнім часам – атрымліваецца. Гэта рамачка з вулля. Цэлая, запячатаная. Мёд у сотах. Бясплатна. Ну які ж цуд! Люблю пяшчотна – з гарбатай альбо кавай…

Яшчэ крыху ранейшы сюрпрыз – падарункі-пачастункі з Піцера, куды з’ездзілі на экскурсію мае пляменніцы. Прыгожыя ўпакоўкі, ажно шкада спажываць… 🙂 А магніцік заняў сваё месца на халадзільніку. На якім месца-то вольнага амаль і не засталося… Толькі ўніз ісці, на лядоўню.

Сюрпрызы. Падарункавыя магніцікі.

Некалькі штук – падораныя. Астатнія – свае, з вандровак. Толькі і засталося цяпер, што разглядаць магніцікі ды фоткі адтуль… І ніякія манеткі, кінутыя ў свой час ў Адрыятыку ў Чарнагорыі, у фантан Трэві ў Рыме ды ў іншых мясцінах, не спрацоўваюць, на жаль, на вяртанне…

Гартаем каляндар назад. Прыемныя сюрпрызы на ўласны дзень народзінаў, які святкую разам з Аляксандрам Сяргеевічам (Пушкіным) і Аляксеем Ануфрыевічам – Дударавым.

Здаўна ў гэты дзень атрымліваю самыя розныя кветкі ў падарунак. Так, сюрпрызна. У юнацтве, яшчэ да шырокага распаўсюду кветкавых крамаў (нават не верыцца, што іх калісьці ў горадзе і не было!), вельмі любіла, калі дарылі тое, што квітнее на пачатку чэрвеня месяца.

Сюрпрызы. Кветкі пачатку чэрвеня.

А гэта – язмін, касачы, півоні… Да гэтага часу памятаю, як аднойчы падчас працы ў раёнцы хлопцы-калегі абабеглі, як яны сказалі, усе агароды, толькі каб знайсці мае любімыя касачы. І знайшлі ж! 🙂

Што тычыцца свята сёлетняга, юбілейнага, дык самым сюрпрызным букетам стаўся… букецік ландышаў (!), падораны татам. Ландышы?! Шостага чэрвеня?! Вось гэта сюрпрыз дык сюрпрыз! Ні разу не атрымлівала.

А другі сюрпрыз, таксама звязаны з раслінамі, атрымала ад сваіх пляменніц. І гэта… ананасік! У вазоне! Які трэба вырошчваць… Недарэмна ўсё ж свой блог вяду… Дзяўчаты прачыталі і запомнілі адно з маіх жаданняў… Пра ананас

Сюрпрызы. Ананас у падарунак.

Не ўпэўненая, што атрымаецца яго вырасціць… Але ж такі сюрпрыз у дзень народзінаў атрымала! 🙂

Ну, і спіс гэты можна яшчэ доўжыць і доўжыць. Галоўнае – настрой на добрае ўспрыманне сюрпрызаў. А то ж людзі розныя бываюць… Жаданне парадаваць блізкага чалавека. І – увага! – зрабіць ці падараваць тое, пра што марыць менавіта гэты чалавек. А не так, як уяўляеце сюрпрыз для яго ці яе вы. Гэта могуць быць дыяметральна супрацьлеглыя рэчы, паверце! 🙂

А навошта нам замест сюрпрызу сапсаваны настрой?! Нам сапсаваны настрой не трэба! І так ужо гэта здараецца часцей, чым мы б хацелі, праўда?!

Затое калі хтосьці блізкі, знаёмы альбо нават незнаёмы (-ая) ўсміхнецца і парадуецца… А хто яшчэ не ведае, што дарыць – гэта часцяком нашмат прыемней, чым атрымліваць?! Тады ёсць шанц праверыць. Сёння, у Дзень сюрпрызаў.

Сюрпрызы. Прыемна рабіць і атрымліваць.

А мяне асабіста ўсміхнула парада ў сеціве. Маўляў, калі не ведаеце, які сюрпрыз зрабіць чалавеку, звярніцеся ў фірмы, якія на гэтым спецыялізуюцца. Дужа такая парада… Маштабная. Як падараваць у гэты дзень камусьці… новую машыну.

Не, ну ўсё бывае, вядома. Ступень забяспечанасці ва ўсіх розная. Але я асабіста была б не супраць букеціка палявых кветак. 🙂 Ці падаруначка, зробленага сваімі рукамі. І не таму, што сябе не цаню. Так выхоўвалі з дзяцінства. Але і супраць новай машыны нічога не маю! 🙂 Жарт…

А ці былі прыемныя сюрпрызы ў вашым жыцці, шаноўныя сябры?! Дзяліцеся, калі ласка, у каментах у нашых сацыяльных сетках ды месэнджары. І… Пабольш прыемных сюрпрызаў нам усім – сёння і не  толькі! 🙂

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0 0 33

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.