25.10.2019
25.10.2019

Тэмары – ёга для розуму з Японіі (+відэа)

logo
Адукацыя і выхаванне
0 58
Памер шрыфта:
  • A
  • A
  • A

Госця з Алматы, юрыст Асэль Калімбекава прыехала ў відэастудыю нашага партала ў кампаніі незвычайных дэкаратыўных шароў – тэмары. Чым гэтае традыцыйнае японскае мастацтва прыцягвае людзей ва ўсім свеце і як яно можа быць звязанае са здароўем?

 

Мастацтва для знатных

Тэмары ў перакладзе азначае «ручны мяч». Першапачаткова ўзніклі такія мячы ў Кітаі (і гулялі з імі нагамі). Аднак менавіта ў Японіі яны набылi сваё дэкаратыўнае прызначэнне. Спачатку гэтая старадаўняя японская традыцыя вышывання шароў рознакаляровымі ніткамі была прэрагатывай дзяўчат са шляхетных сем'яў. Для вышывання выкарыстоўваліся дарагія шаўковыя, залатыя ніткі. Арыстакраткі спаборнічалі паміж сабой у тым, хто створыць найбольш мудрагелісты ўзор. Паступова майстэрства наблізілася да народа.

Аснова тэмары – мяшок з тканіны, раней яго рабілі з абрэзкаў кімано. Іх разразалі на палосы, скручвалі ў мячык, абмотвалі тоўстымі ніткамі, а паверсе вышывалі. Сёння для вырабу тэмары выкарыстоўваюць любую трыкатажную мяккую тканіну. Асновай можа быць гумовы мячык і нават пенапласт. Самыя распаўсюджаныя ўзоры: геаметрычныя, хрызантэма, сакура, журавель, чарапаха, бамбук, абстракцыя.

Мастацтва для знатных

 
Асэль Калімбекава
Юрыст, г.Алматы
Хрызантэма – сімвал імператарскага дома. Раней такі ўзор маглі насіць толькі члены імператарскай сям'і. І цяпер лічыцца, што падарыць тэмары з хрызантэмай – азначае пажаданне добрага жыцця.

Новы віток жыцця для трэцяга ўзросту

Ці заканчваецца актыўнае жыццё на пенсіі? Шмат у чым гэта пытанне асабістага выбару. Мама Асэль, кандыдат біялагічных навук, перакананая, што ў гэты час кожнаму пажадана завесці хобі. І 6 гадоў таму, калі прыйшла пара заслужанага адпачынку, пачала шукаць занятак па душы. Японскае мастацтва вышывання шароў, тыя самыя тэмары, трапіліся на вочы выпадкова ў інтэрнэце. Дарэчы, аўтарам аднаго з упадабаных блогаў была беларуская майстрыха Наталля Кузняцова, якая перабралася жыць у Японію. http://akisun.bloger.by

Асэль пачала дапамагаць маме шукаць інфармацыю. Ды так зацікавілася, што хобі зрабілася агульным. Шэсць гадоў таму ў Казахстане цяжка было знайсці падобных майстрых. У кнігарні па абсалютна шчаслівай выпадковасці знайшлі ўсяго адну кішэнную кнігу, пачалі па малюнках спрабаваць узнавіць узоры самастойна. Дапамог і рускамоўны сайт темари.ру, дзе падрабязна былі апісаныя спосабы вышывання на шарах. Дзякуючы тэмары, мама з дачкой захапіліся японскай культурай і нават вырашылі наведаць цэнтр японскай культуры ў Алматы. Убачыўшы вырабы майстрых, супрацоўнікі цэнтра прапанавалі жанчынам праводзіць свае майстар-класы.

Асэль Калімбекава

Сёння на такія заняткі прыходзяць вучні розных узростаў і прафесій. Самым юным тэмарысткам – 8 гадоў. Узрост для старэйшых – не абмежаваны. Асаблівай папулярнасцю карыстаюцца курсы тэмары для ўдзельнікаў «Школы трэцяга ўзросту».

Тэмары дапамагаюць трэніраваць каардынацыю, дробную маторыку, здымаюць стрэс. Іх таксама называюць ёгай для розуму. Бо каб разгледзець узоры і зразумець, як яны вышытыя, трэба прыкласці немалыя ментальныя намаганні.

А яшчэ гэта выдатная магчымасць знайсці аднадумцаў і правесці час у прыемнай кампаніі. Стварэнне тэмары працуе і як арт-тэрапія. Бо падбор колераў – сапраўднае мастацтва: залежыць і ад настрою, і ад мэты стварэння шара. Чырвоныя ўзоры кажуць пра страсць, зялёныя – супакойваюць, цёмна-сінія – сімвалізуюць моцнае здароўе...

 

 
Асэль Калімбекава
Юрыст, г.Алматы
У японскім мастацтве ёсць уяўленне пра тое, што няправільнага не існуе. Часта дарослыя не рашаюцца вярнуцца да малявання або тых відаў мастацтва, якія захаплялі іх у дзяцінстве – з-за страху зрабіць нешта не так. У японскім мастацтве любы штрых лічыцца натхненнем душы. Галоўнае – спрабаваць, зрабіць першы крок. І пасля гэтага ўсё пойдзе лёгка.

Асаблівае свята для тэмарыстаў – штогадовая выстава іх работ. Яна нязменна карыстаецца ў жыхароў Алматы вялікай цікавасцю.

Мужчыны таксама рукадзельнічаюць

 
Асэль Калімбекава
Юрыст, г.Алматы
Як і ўсё японскае мастацтва, тэмары – пра сузіранне, няспешнасць, спакой. Заўважана не толькі мной, што вышываць тэмары ў дрэнным настроі не атрымліваецца. Менавіта таму кожны выраб прасякнуты цеплынёй і добрымі думкамі. Нездарма ў Японіі гэтыя шары называюць «шарамі шчасця». Лічыцца, што шары прыносяць удачу, шчаслівае жыццё, сардэчнае сяброўства і вернасць. Часта іх выкарыстоўваюць як ёлачныя цацкі, часам проста як упрыгажэнне дома, сувенір і нават бразготку (унутр шарыка дадаюць, напрыклад, некалькі зерняў рысу). Стварэнне шара займае не так шмат часу – каля гадзіны. А адчуванне ад таго, што робіш сапраўдную прыгажосць сваімі рукамі, незвычайнае. Цікава, што захапляюцца мастацтвам тэмары нават тыя людзі, якія ніколі раней не трымалі ў руках іголку. Прычым у мужчын часцяком узоры больш цікавыя і выкананыя з асаблівай выразнасцю.

Тэмары дапамагаюць трэніраваць каардынацыю, дробную маторыку, здымаюць стрэс.

Дзіўнае мастацтва тэмары натхніла Асэль і на свой праект у сацыяльных сетках «Тэмары-вандроўнікі». Два любімых «шара шчасця» пабывалі разам са сваёй гаспадыняй у самых прыгожых мясцінах Казахстана, Кітаі, Японіі... Ёсць памятныя фота і на фоне беларускіх выдатных мясцінаў.

Фота і відэа ў студыі – Андрэй Васкрасенскі.

 

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 58

Журналіст. Член Беларускага саюза журналістаў. Лаўрэат прэміі Беларускага саюза журналістаў.
Глядзіце таксама