1. Якая галоўная забарона існавала ў нашых продкаў у Градавую сераду?
А. Жанчынам у гэты дзень нельга піць.
Б. Нельга працаваць на зямлі.
В. Ні з кім нельга сварыцца, бо градам паб’е крыўдзіцеля.
Правільны адказ – Б.
Сапраўды, у нашых продкаў існавала ўяўленне, што за працу на зямлі ў Градавую сераду (а такіх выпадала некалькі на год) можа надысці пакаранне: град паб’е будучы ўраджай. Альбо той, які час знімаць.
Магчыма, гэта толькі прымхі, але… Многія пісалі, што ўсё гэта забабоны, што працаваць можна, што працуюць... А ў выніку град, які абрынуўся, напрыклад, на наш Чэрвень увечары14 ліпеня, шмат у каго папсаваў самую разнастайную расліннасць. Прычым і лісце, і плады. Вось і не вер пасля гэтага ў прыкметы…
Хаця… Найчасцей атрымліваецца: парушаюць правілы адны, а пакаранне дасылаецца іншым. 🙂
Больш падрабязна пра Градавую сераду тут.
2. А ці праўда, што для прыемных сюрпрызаў прыдумалі асобны дзень-свята?
А. Ды вы што?! Калі на кожную драбязу свята прыдумляць, ніякіх дзён у годзе не хопіць!
Б. Прыдумалі ўжо?! А я сам хацеў (ла)…
В. Ёсць такі дзень – 2 ліпеня!
Правільны адказ – В.
Сапраўды, столькі ўжо вясёлых ды забаўных дзён-святаў папрыдумлялі, што ў асобныя дні іх выпадае па 10-20! Вядома ж, справа кожнага – адзначаць іх пэўным чынам ці не. Чытаць напісанае пра гэта альбо прапускаць міма вачэй.
Але калі штосьці мілае і добрае… Дык чаму б не завесці такую звычку?! Сусвет – ён жа ўсё бачыць і чуе… І так хочацца, каб у свеце паболела дабрыні і нагод для радасці…
А больш падрабязна пра Дзень сюрпрызаў – тут.
3. Колькі максімальна па часе раяць праводзіць ферментацыю скрыпеню (іван-чаю)?
А. Да 36 гадзін.
Б. Да 36 дзён.
В. 10 хвілін звычайна хапае.
Правільны адказ – А.
Вядома ж, можна скрыпень проста высушыць і не ферментаваць. Але ж смак зусім не той! І карысць не тая… А правільна ферментаваны і прыгатаваны іван-чай – гэта цуд! Праверана на сабе!
А вось ці варта з ім замарочвацца, што такое ферментацыя, на якія віды падзяляецца і навошта патрэбная – тут.
4. З якім святам супала сёлета Тройца?
А. З Днём усмешкі.
Б. З Днём медыцынскіх работнікаў.
В. З Днём стаматолага.
Правільны адказ – Б.
Спадзяюся, шаноўныя сябры, што вы прачыталі мой блог ад 20 чэрвеня і павіншавалі сваіх знаёмых медыцынскіх работнікаў. Якія гэтага сапраўды заслугоўваюць.
А хто яшчэ не прачытаў, таму сюды. Атрымаць карысную інфармацыю ніколі не позна. 🙂
5. Ці абароніць шпілька ад сурокаў, калі вы ва ўсё такое верыце?
А. Сапраўды, павінна. Толькі калі правільна яе прышчапіць.
Б. А вы верыце, што сурокі існуюць?! Няма сурокаў – няма патрэбы нечым бараніцца…
В. Не, адной шпількі мала. А вось калі навесіць на вопратку не менш за 10…
Правільны адказ – А.
Калі верыце, вядома ж. І калі правільна прышчэпіце – вастрыём уніз, абараняць павінна. І штосьці ў гэтым сапраўды ёсць.
Прынамсі, я пра гэтую прыкмету ведаю з дзяцінства. І калі-нікалі шпільку скарыстоўвала. Для такіх мэтаў.
Ва ўсялякім разе, пачытаць пра гэта будзе карысна. Вось тут.
6. Калі, па ўяўленнях і меркаваннях нашых продкаў, зёлкі набываюць найбольшую моц?
А. У Пятроўскі пост.
Б. На Купалле.
В. Калі іх кветкі распускаюцца цалкам.
Правільны адказ – Б.
А на наступны дзень, калі адзначаецца Іван Купала, іх можна асвяціць у храме. Каб яшчэ большую моц набылі.
Але, зноў-такі, калі вы ва ўсё гэта верыце. І ўмееце збіраць зёлкі – з любоўю, пашанай, уважлівым стаўленнем, падзякай. Тады нават гарбата станецца карыснай.
Больш падрабязна пра зёлкі – тут.
7. Да назвы якой з зёлак дадаецца звычайна слова «прадзіраўлены»?
А. Да чабору.
Б. Да святаянніку.
В. Да кіпрэю.
Правільны адказ – Б.
Вядома ж, да святаянніку. Праўда, найчасцей – у рускім варыянце назвы: «зверобой продырявленный».
Вы ж памятаеце, што гэта трава ад 99, а то і ад 100 хваробаў?! Так лічылі нашыя продкі. Так лічыць і народная медыцына.
А падрабязнасці – тут.
І плюс агульная спасылка на матэрыялы блогу «Думкі ўслых» – вось!
Ну што ж, мае актыўныя сябры… Падлічваем балы! І пішам пра вынікі ў каментах нашых суполак, размешчаных у сацыяльных сетках.
ВЫНІКІ
6-7 балаў. Выдатна! Усё чытаеце, усё памятаеце! У зёлках разбіраецеся, у Градавую сераду не працуеце на зямлі, медработнікаў з іх прафесійным святам віншуеце… 🙂
3-5 балаў. Што не чыталі? Пра што забыліся? Можа, думаеце, што прадзіраўлены – гэта чабор?! 🙂 Ці што шпількай ад сурокаў не адмахнешся, а вось рызінку ў трусы зацягнуць ёй – самае тое?! Значыць, вечар цікавага чытання вам забяспечаны!
1-2 балы. Проста вырашылі праверыць свае веды? Без рэгулярнага чытання блогу? Яно і нядрэнна. Але ж веды за плячыма не насіць… Тым больш такія цікавыя…
0 балаў. А, вы проста пытанні пачытаць? Тады ўжо і адказы заадно! Раптам штосьці зацікавіць. І вы будзеце часцей заходзіць у госці… 🙂
