09.04.2021
09.04.2021

Трэці старт касманаўта Алега Навіцкага. Ён адбыўся, і стыкоўка – ёсць, а экіпаж – на МКС!

logo
Думкі ўслых
0 0202
Памер шрыфта:
  • A
  • A
  • A

А ўсё ж такі ў цікавы час мы жывем! Сёння, 9 красавіка, ужо ў трэці (!) раз за апошняе дзесяцігоддзе я з дапамогай сеціва, сайтаў Раскосмасу і NASA, буду назіраць за стартам нашага земляка, ураджэнца Чэрвеня, касманаўта Раскосмасу. Да Міжнароднай касмічнай станцыі (МКС) у свой чарговы палёт накіруецца Алег Навіцкі, чыёй аднакласніцай я маю гонар з’яўляцца. І журналістам, які падрабязна асвятляў яго падрыхтоўку і першы палёт на старонках чэрвеньскай газеты «Раённы веснік» і рэспубліканскай газеты «Звязда».

Алег Навіцкі. Святлана Адамовіч. Касманаўт і журналіст – аднакласнікі.

Старт запланаваны на 10:42:41 са стартавай пляцоўкі №31 касмадрома Байканур, а стыкоўка – на 14:07, плюс-мінус 3 хвіліны. І тое, што шлях «Саюза МС-18» да МКС павінен заняць усяго 3 гадзіны 25 хвілін, падаецца сапраўднай фантастыкай, калі прыгадваецца першы палёт Алега Навіцкага. Тады экіпаж карабля дабіраўся да касмічнай станцыі трое сутак. Як кажуць, адчуйце розніцу!

А паколькі гэты матэрыял з’явіўся на нашым інфармацыйным партале на пачатку першай ночы… Па меры атрымання навінаў ён будзе дапаўняцца. Сачыце за абнаўленнямі!

Давайце бліжэй пазнаёмімся з экіпажам касмічнага карабля «Саюз МС-18». Яго камандзір – Алег Навіцкі, Герой Расійскай Федэрацыі, лётчык-касманаўт РФ. Парадкавы нумар – 114/526. Здзейсніў 2 касмічныя палёты. Агульны налёт – 340 сутак 10 гадзін 4 хвіліны.

Бортінжынер-1 – касманаўт-выпрабавальнік Раскосмасу Пётр Дуброў, ураджэнец Хабараўска. Досведу касмічных палётаў не мае.

Бортінжынер-2 – астранаўт NASA Марк Вандэ Хай, 342-і астранаўт ЗША, 554-ы – свету. Колькасць здзейсненых палётаў – 1, працягласць – 168 сутак 5 гадзін 14 хвілін. Чатыры выхады ў адкрыты космас!!! Ён прабыў там у суме 26 гадзін 42 хвіліны.

Мяркуемая працягласць гэтага касмічнага палёту – 191 суткі.

Алег Навіцкі. Яго экіпаж. «Прымерка» касмічнага карабля.

Ну што ж… Гэтым разам мяне накрыла напярэдадні. Дзесьці па абедзе чацвярга. Што ўжо будзе падчас старту… Вы не ўяўляеце, якое гэта невыказнае хваляванне – сачыць за тым, як твой аднакласнік, якога ты ведаеш з дзяцінства, стартуе туды, да зорак! Ну і што, што не ў першы, а ў трэці раз?! А хвалявання не менее…

Што ўжо казаць пра адчуванні мамы Алега Валянціны Эдуардаўны Навіцкай, яго жонкі і дзяцей, сваякоў і сяброў!

Прызнаюся, што гэтым разам асабліва не сачыла за падрыхтоўкай экіпажаў (асноўнага і дублюючага) да старту, як упершыню. Інфармацыю атрымлівала, бадай, толькі з допісаў брата Ігара, журналіста, у раённай газеце. У той самай, дзе я ўпершыню ў жыцці паведаміла пра першы старт самага сапраўднага касманаўта! Далёкага і разам з тым блізкага…

Вось толькі днямі зайшла на сайт Цэнтра падрыхтоўкі касманаўтаў, адкуль у свой час проста не вылазіла. Паглядзела інфу, фоткі… Усё, як і думала. Выдатная здача Алегам Навіцкім і яго экіпажам іспытаў. «Прымерка» ТПК «Саюз МС-18»… Толькі адметнасць нашага часу – ахоўныя маскі (ці рэспіратары?)… Ва ўсіх і практычна ўсюды…

Алег Навіцкі. Байканур. Дзень для прэсы.

Дарэчы, а ці ведаеце вы, што гэты касмічны карабель займеў сваю ўласную назву?! «Ю.А.Гагарын». Бо трэці палёт Алега Навіцкага адбываецца напярэдадні 60-годдзя першага палёту чалавека ў космас! І гэта такі гонар! Між іншым, яшчэ падчас першага старту Алега яго шчырую ўсмешку называлі гагарынскай. Так што паралеляў і асацыяцый тут сапраўды шмат…

Я спадзяюся, што гэтым разам трансляцыя старту касмічнага карабля будзе ўстойлівай. Бо падчас першага даводзілася пераключацца з сайту Раскосмасу на NASA і назад – у пошуках не толькі лепшай карцінкі, але і гуку. Мне пашанцавала – самае асноўнае я ўбачыла і пачула выдатна!

Не ведаю, як успрыму сёння трэці старт… А падчас назірання за першым сэрца літаральна выскоквала з грудзей! Прыгадваю!

… Вядома ж, уражанняў тых хвілін не перадаць словамі. Але яны – яркія, кранальныя, трывожныя, перажывальныя – назаўсёды засталіся ў памяці і сэрцы. Без перабольшання, упэўнена, што ніколі не забуду таго, што ўбачыла, пачула і перажыла…

А найбольш уразлівым стаўся чамусьці не момант старту ракеты-носьбіта з касмічным караблём «Саюз ТМА-06М» пад камандаваннем нашага земляка Алега Навіцкага, а магчымасць бачыць яго на маніторы там, у палёце. Вось тут ужо нарэшце пашанцавала з «карцінкай» – яна зрабілася ўстойлівай. Іншы сайт, але які канкрэтна – не памятаю. А перамовы Цэнтра кіравання палётамі з касманаўтамі (а папросту – Зямлі з «казбекамі») так выразна былі чуваць…

Алег Навіцкі. Перад стартам.

А я ў гэтыя моманты, не ведаючы, навошта, яшчэ і спрабавала ліхаманкава запісваць асобныя сказы. Як прыемна было чуць спакойны, упэўнены голас Алега! Першыя хвіліны, у асноўным, гучалі ў адказ Зямлі два сказы: «На борце парадак» і «Экіпаж адчувае сябе добра». Яны сапраўды супакойвалі.

Вельмі цікава было назіраць, як Алег і яго калегі гарталі стос папер, які трымалі ў руках. Не ведаю, як правільна гэта называецца – бартавая дакументацыя ці па-іншаму, але для сябе я вызначыла так: кіраўніцтва да дзеяння.

І вось адведзены час для сувязі экіпажа з Зямлёй закончыўся. «Карцінка» знікла. Што-кольвечы дадаю да свайго матэрыялу ў «раёнцы» – і газету накіроўваюць у друк. Вяртаюся на сваё працоўнае месца, спрабую асэнсаваць падзею… А сэрцам, душою і думкамі – там, у кабіне карабля…

Алег Навіцкі. Першы палёт. Экіпаж.

Думаю, і сённяшнія ўражанні таксама стануцца незабыўнымі. Перажываю, трымаю кулакі. І пакуль па традыцыі не выказваю ніякіх пажаданняў. Чакайма старту і стыкоўкі! Чакайма разам!

9 красавіка 2021 года. 11:15

Ну вось і адбыўся трэці старт Алега Навіцкага і яго экіпажа... Нават не верыцца... Як заўсёды: столькі размоў, а тады – раз! Секунды літаральна – і ў неба... Кранула неверагодна! Ажно расплакалася... І толькі паўтарала, прыціскаючы рукі да грудзей: «Калі ласка... Ну калі ласка... Няхай усё будзе ў парадку!!!»

На жаль, зноўку, як і першы раз, не ўбачыла на сайце Раскосмасу тое, што хацела. І ўвогуле, сайт лёг, і не толькі ў мяне. Дзякуй, NASA ТВ! Зноў выручыла! Сам старт я пабачыла. І зноўку чула ўпэўнены голас Алега... Гэта так супакойвала!

– Параметры системы управления в норме.

– Двигатель третьей системы работает нормально.

– 450 (секунд. – С.А.). Полет нормальный.

А я ўсё яшчэ ўзрушаная... Усё яшчэ не магу займацца чымсьці староннім. Пераглядаю фотаздымкі, уласныя запісы, матэрыялы... І мяне ўсё яшчэ адчувальна каўбасіць. І зноўку сэрцам, душой і думкамі я – там, у кабіне касмічнага карабля «Ю.А.Гагарын».

Па-ранейшаму пакуль ніякіх пажаданняў. Проста чакайма стыкоўкі, якая запланаваная сёння на 14:07, плюс-мінус 3 хвіліны.

9 красавіка 2021 года, 14:25

Ну што ж, чарговы хвалюючы этап закончаны. Стыкоўка адбылася! Усё штатна, што, вядома ж, радуе...

За стыкоўкай сачыла і на сайце Раскосмасу, і на NASA ТВ. Спадабалася, як каментаваў асноўныя моманты госць студыі – касманаўт Раскосмасу Алег Скрыпачка. А самі здымкі ў космасе... Фантастыка!!!

Алег Навіцкі. Стыкоўка. НАСА ТВ.

... На гадзінніку – 14.06. «Ну, давай-давай-давай!» – гэта я, гледзячы на манітор... Ёсць дотык, захоп... Здаецца, я не пераблытала?! Перамовы Зямлі з экіпажам. І такія шчырыя віншаванні з тым, што ўсё прайшло штатна! Так радасна ад гэтага!!! І зноўку слёзы ад хвалявання...

Зараз экіпаж рыхтуецца да пераходу на МКС, які павінен пачацца а шаснаццатай... А на МКС рыхтуюцца сустракаць гасцей. Чакайма!

9 красавіка 2021 года, 16:30

Нарэшце!!! Самае асноўнае – адбылося! Экіпаж касмічнага карабля «Ю.А.Гагарын» пад камандаваннем нашага земляка Алега Навіцкага перайшоў на Міжнародную касмічную станцыю! За такі непрацяглы час, які прайшоў ад моманту старту. Усё – у адзін дзень. Фантастыка!!! І вось яны ўжо на сувязі з сем'ямі!

За адкрыццём люкаў назіраць было не так хвалююча, а проста цікава. Колькі напачатку камандаў трэба было выканаць! Пачакаць, пакуль упадзе ціск у касмічным караблі і хаця б пару хвілін пратрымаецца на адным узроўні...

Але вось яны, бадзёрыя і ўсмешлівыя, уплываюць на МКС! Вітаюцца, абдымаюцца... Колькі хвілін тэхнічных пытанняў – і можна паразмаўляць з блізкімі і сябрамі. А вось якая зараз вялікая каманда на Міжнароднай касмічнай станцыі!

Мы шчыра жадаем Алегу Навіцкаму, яго экіпажу і ўсім калегам на МКС плённай працы, выдатнага самаадчування, выключных уражанняў!

Фота – з сайта Цэнтра падрыхтоўкі касманаўтаў, Раскосмасу, архіва аўтара і адкрытых інтэрнэт-крыніц.

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0 0 202

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.