21.04.2021
21.04.2021

Тыпы старэння скуры. Як «сцерці» ўзрост?

logo
Навiны
0 023
Памер шрыфта:
  • A
  • A
  • A

Каб правільна падабраць сродкі для догляду скуры твару і як мага даўжэй захаваць яе маладосць, важна ведаць не толькі яе асаблівасці, напрыклад, тлустая яна альбо сухая. Касметолагі сцвярджаюць: каб своечасова скарэктаваць узроставыя змены, немалаважна ведаць марфатып старэння скуры – своеасаблівы «сцэнар» таго, як мы будзем выглядаць праз гады. Стомлены ці дэфармацыйны? Змешаны альбо дробнамаршчыністы? Як гэта вызначыць?

Пра тое, як даведацца пра свой тып старэння твару, а таксама пра сакрэты базіснага догляду з улікам асаблівасцяў кожнага з іх журналісту інфармацыйнага партала Здаровыя людзі распавяла ўрач-касметолаг, дэрматавенеролаг медыцынскага цэнтра санаторыя «Юнацтва» Юлія Баранава.

Юлія Баранава

Чаму старэе скура твару

Пра першыя ўзроставыя змяненні, адзначае Юлія Баранава, кажуць дробныя маршчынкі, якія з'явіліся. Скура вытанчаецца, яе колер робіцца больш бляклым. Губляе свае ўласцівасці гідраліпідная мантыя, зніжаецца яе ахоўная функцыя. Калаген і эластын, якія надаюць пругкасць, выпрацоўваюцца ў меншай колькасці. Гусіныя лапкі каля куткоў вачэй могуць з'явіцца і пасля 30 гадоў. Паступова скура павекаў губляе шчыльнасць і робіцца больш цяжкай, шыя па-здрадніцку выдае ўзрост. На гэтыя працэсы таксама ўплывае гарманальны статус жанчыны.

Што крадзе маладосць скуры

Уздзеянне ўльтрафіялету, які выклікае фотастарэнне.

Абязводжванне. Пры дэфіцыце вільгаці скура лушчыцца, з'яўляецца пачуццё сцягнутасці, маршчыны, парушаецца яе структура, зніжаецца сінтэз калагену і эластыну.

Спадчыннасць. Гены ўплываюць не толькі на знешнасць, але і на тое, якая якасць злучальнай тканкі дастанецца ў спадчыну, як скура будзе рэагаваць на ўздзеянне сонечнага святла, калі з'явяцца першыя маршчынкі і якім будзе тып старэння.

Старэнне скуры. Тыпы старэння.

Дэфіцыт эстрагенаў, іх яшчэ называюць «гармонамі прыгажосці і маладосці». Яны стымулююць выпрацоўку калагену і гіялуронавай кіслаты, задача якіх – падтрымліваць шчыльнасць, тонус і ўвільготненасць скуры. Пры дэфіцыце эстрагенаў павышаецца яе адчувальнасць да ўльтрафіялету, з'яўляецца маршчыністасць, сухасць, акнэ.

Няправільны штодзённы догляд, дэкаратыўная касметыка нізкай якасці таксама не дадаюць маладосці.

Дадае гадоў стрэс. Хранічныя эмацыянальныя перагрузкі адбіваюцца на стане ўсяго арганізма, у тым ліку на скуры твару. Яна набывае цёмна-шэрае (зямлістае) адценне, робіцца сухой, на ёй з'яўляюцца маршчыны.

Курэнне аказвае негатыўны ўплыў на ферменты, якія робяць эластычнымі сценкі крывяносных сасудаў.

Старэнне скуры. Як уплывае курэнне.

Нявырашаныя праблемы са зрокам прымушаюць пастаянна жмурыцца, што прыводзіць да ранняга з'яўлення дробных маршчынак вакол вачэй.

Тыпы старэння і догляд скуры

Выдзяляюць стомлены, дробнамаршчыністы,  дэфармацыйны, змешаны і мускульны тыпы старэння.

Стомлены марфатып часцей за ўсё сустракаецца ў жанчын хударлявага целаскладу, з авальнай формай твару, з нармальнай, камбінаванай альбо схільнай да сухасці скурай. Распазнаць яго лёгка па ярка выяўленай носаслёзнай баразне, цёмным кругам пад вачыма, цьмяным колеры і змене контураў твару, насагубным маршчынам і апушчаным уніз куткам рота. Раніцай скура выглядае свежа і молада, да вечара – твар прыгнечаны і стомлены, адзначае Юлія Баранава.

У першую чаргу эксперт раіць добра высыпацца, папярэдне праветрыўшы памяшканне. Акцэнт – на танізаванне. Выкарыстоўваць варта касметычныя сродкі і працэдуры, якія стымулююць сінтэз калагену і паляпшаюць колер скуры, валодаюць увільгатняльным і падцягваючым эфектам. Пры выбары доглядавых сродкаў варта звяртаць увагу на ўтрыманне ў складзе вітаміну С, АНА-кіслотаў.

Старэнне скуры. Як даглядаць стомлены марфатып.

Салонны догляд. У прыярытэце методыкі, якія павышаюць мышачны тонус і паляпшаюць мікрацыркуляцыю, насычаюць кіслародам і ліквідуюць азызласць (доглядавыя ліфтынгавыя і ўвільгатняльныя працэдуры, павярхоўныя хімічныя пілінгі, радыёхвалевы ліфтынг).

Дэфармацыйны марфатып. Часта сустракаецца сярод беларусаў і іншых славянаў. З гадамі губляецца выразнасць авала твару, ён як бы плыве. Фарміруюцца насагубныя зморшчыны, якія ярка выяўленыя, абвісаюць шчокі, з'яўляецца другі падбародак і купероз (чырвоная сасудзістая сетачка), рэльеф скуры губляе сваю гладкасць.

Юлія Баранава:

– Самыя частыя скаргі – павека, што навісае, азызласць вакол вачэй. Прычым падобныя прыкметы пачынаюць турбаваць ужо пасля 35 гадоў. Як правіла, дэфармацыйны тып сустракаецца ў схільных да паўнаты жанчын з тлустым альбо камбінаваным тыпам скуры. Але ёсць і прыемны бонус: нават у сталым узросце ў іх амаль няма маршчынаў і пігментных плямаў.

Лішняя вага візуальна дадае ўзросту. Чым маса цела большая, тым ярчэйшыя прыкметы старэння. Таму варта кантраляваць сваю вагу. Для догляду твару падыходзяць сродкі і працэдуры, якія ўмацоўваюць сценкі сасудаў і валодаюць лімфадрэнажным эфектам. Добры выбар – альгінатныя маскі, якія ліквідуюць азызласць.

Старэнне скуры. Маскі для дэфармацыйнага марфатыпу.

Юлія Баранава:

– У складзе доглядавых сродкаў павінны прысутнічаць экстракты купальніку, конскага каштана, марскіх водарасцяў, вітаміны К, С, Р. З салонных працэдур добра падыдуць маніпуляцыі, якія ўмацоўваюць мускулатуру, валодаюць лімфадрэнажным уздзеяннем, памяншаюць азызласць скуры і карэктуюць авал твару.

Дробнамаршчыністы тып. Як правіла, такія жанчыны не маюць схільнасці да залішняй вагі. Гусіныя лапкі, мімічныя і дробныя маршчынкі, якія нагадваюць «сетку», – самая яркая адметная рыса. Першыя прыкметы могуць з'явіцца даволі рана – ужо пасля 25 гадоў. Контуры твару не змяняюцца. Менавіта пра такіх жанчын часта можна пачуць, што яны «прыгожа старэюць».

Асноўныя рэкамендацыі датычацца захоўвання пітнога рэжыму, каб пазбегнуць абязводжвання, выкарыстання сродкаў з SPF-фільтрам і абароны ад уздзеяння нізкіх тэмператураў ды моцнага ветру. Доглядавыя сродкі не павінны ўтрымліваць агрэсіўных кампанентаў, якія разбураюць ліпідны бар'ер.

Старэнне скуры. Дробнамаршчыністы марфатып.

Юлія Баранава:

– Пры ачышчэнні скуры лепей выкарыстоўваць зберагальныя сродкі (гідрафільны алей, малачко альбо эмульсію). Асноўны ўпор – на крэмы і маскі з ўвільгатняльным дзеяннем, касметычныя сродкі, якія ўмацоўваюць гідраліпідны слой, павышаюць яго пругкасць і эластычнасць, актывізуюць выпрацоўку калагену. Склад такіх крэмаў павінен быць узбагачаны ніяцынамідам, пептыдамі, амінакіслотамі, мікраэлементамі, гліцэрынай, алеем шы, жажаба, міндальным, з вінаграднай костачкі, вітамінамі А і Е. Можна таксама выкарыстоўваць сродкі, якія змяшчаюць гіялуронавую кіслату.

Эфектыўнымі салоннымі працэдурамі з'яўляюцца масажы з выкарыстаннем пажыўных крэмаў, а таксама методыкі, якія глыбока ўвільгатняюць, актывізуюць кровазварот і абменныя працэсы, хімічныя пілінгі.

Змешаны тып – гэта своеасаблівы «кактэйль» са стомленага, дробнамаршчыністага і дэфармацыйнага. Сярод славян падобны тып не рэдкасць. Яго можна заўважыць у поўных жанчын, з камбінаванай скурай твару, схільнасцю да ацёкаў. З гадамі выяўляецца эфект «стомленага твару», затым на сухіх участках усё ярчэй робяцца прыкметныя маршчынкі, а там, дзе тлустая скура, – ацёкі з дэфармацыяй (авал твару плыве), глыбокія насагубныя зморшчыны.

Юлія Баранава:

– Ён самы складаны ў плане догляду, паколькі сумяшчае ў сабе рысы некалькіх тыпаў. Таму, перш за ўсё, увагу надаюць тым зонам, на якіх прыкметы старэння бачныя ярчэй за ўсё. Добрым эфектам валодаюць пілінгі, радыёхвалевы ліфтынг, нітачныя методыкі.

Старэнне скуры. Радыёхвалевы ліфтынг.

Мускульны марфатып часцей характэрны для жанчын азіяцкай знешнасці. Ім у некаторай ступені пашанцавала, бо першыя прыкметы старэння іх турбуюць толькі пасля сарака гадоў. Прычым авал твару ў іх не змяняецца з цягам часу. Асноўная прыкмета – скура твару доўга застаецца пругкай, практычна не фарміруюцца дробныя маршчыны. З узростам ва ўладальніц мускульнага тыпу старэння з-за гарманальных зменаў верхняе павека можа навісаць, з'яўляюцца глыбокія маршчыны.

Юлія Баранава:

– Сярод хатніх і салонных маніпуляцый па доглядзе асноўны акцэнт трэба рабіць на лімфадрэнажных працэдурах, масажных тэхніках з расслабляльным эфектам, увільгатненні і папярэджанні гіперпігментацыі.

Тыя тэхнікі і сродкі па доглядзе скуры твару, якія падыходзяць аднаму тыпу, могуць нашкодзіць і значна ўзмацніць ўзроставыя праявы пры іх выкарыстанні для іншага. Таму не варта захапляцца моднымі методыкамі і касметычнымі працэдурамі без кансультацыі спецыялістаў, папярэджвае Юлія Баранава.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 23

Нарадзілася і жыву ў Мінску. У 1995 годзе скончыла сталічную сярэднюю школу №168, затым паступіла ў Беларускі дзяржаўны ўніверсітэт на факультэт журналістыкі. Пасля заканчэння вучобы ў 2000 годзе была размеркаваная ў Беларускае тэлеграфнае агенцтва (БелТА), дзе 8 гадоў прапрацавала спецыяльным карэспандэнтам аддзела палітычнай і сацыяльнай інфармацыі. У розныя гады асвятляла падзеі ў сферы навукі, культуры, адукацыі і аховы здароўя. У 2011 годзе перайшла ў прэс-службу Міністэрства аховы здароўя. Кола маіх абавязкаў уключала, у тым ліку арганізацыю сустрэчаў спецыялістаў са СМІ, складанне прэс-рэлізаў, забеспячэнне журналістаў інфармацыяй пра дзейнасць сферы аховы здароўя, а таксама падрыхтоўку аператыўных каментароў экспертаў і фарміраванне стужкі навінаў афіцыйнага сайта міністэрства. З 2017 года працую ўласным карэспандэнтам аддзела інтэрнэт-праектаў рэдакцыі газеты «Медыцынскі веснік». З'яўляюся аўтарам публікацый на інфармацыйным партале «Здаровыя людзі» і сайце для падлеткаў «Teenage.by».