25 Снежня
25.12.2019

Усіх, хто Божае Нараджэнне святкуе, шчыра віншуем!

logo
Думкі ўслых
292 0 78
Памер шрыфта:
  • A
  • A
  • A

Ціхі гук серабрыстых званочкаў нараджаецца дзесьці высока ў небе… Анёльскія галасы спяваюць мелодыю, якая адгукаецца ў сэрцы кожнага… І светлае пачуццё яднае людзей. Свята Божага Нараджэння надышло. А сённяшняя таемная ноч адгукнулася ў душы вернікаў каталіцкай канфесіі і не толькі вялікай радасцю і шчасцем.

Божае Нараджэнне. Дзеці ў касцёле.

Я люблю слухаць каталіцкія прамовы з касцёлаў, разглядаць іх унутранае і знешняе ўбранства. Адчуваю, што ў душы, магчыма, больш хінуся менавіта да іх. Прыгожа, душэўна і настолькі светла і хораша… Здаецца, калі пільна прыгледзецца, можна пабачыць празрыстыя сонечныя прамяні нават у дажджлівы дзень.

Ды што з таго, што няма снегу і марозу ў свята Божага Нараджэння?! Ці варта звяртаць увагу на гэтыя знешнія праявы, калі ўсё – у душы?! І гэтым усім каталікі так шчодра дзеляцца з навакольнымі, што і ты мімаволі адчуваеш далучанасць да такой вялікай урачыстасці, якую – не абхапіць абдымкамі.

Менавіта ў гэтыя святочныя дні… Не, не здаецца – сапраўды адчуваецца, што вакол пабольшала дабрыні, а абліччы тых, хто святкуе, зрабіліся асабліва адухоўленымі і прасветленымі. І гэта цудоўна, калі ты ў штодзённай мітусні раптам апынаешся ў дзівосным коле святла.

Божае Нараджэнне. Жанчына ў слупе  святла.

Спачатку застываеш у збянтэжанасці, а пасля здаецца, быццам хтосьці шэпча табе на вуха: «Спыніся, азірніся… Зрабі камплімент незнаёмаму чалавеку. Пакармі бяздомную жывёлінку. Дапамажы таму, каму горш за цябе. І проста парадуйся гэтаму дню і гэтаму жыццю».

Вы адчувалі калі-небудзь падобнае?! У мяне здараліся такія моманты. І менавіта ў гэтыя святочныя для многіх дні.

Памятаю, як заўсёды ўражвалі мяне тыя ўпрыгожаныя замежныя гарады, дзе большасць жыхароў святкуюць Божае Нараджэнне 25 снежня. Асабліва захапляла, як адмыслова выглядаюць дамы прыватныя. І заўсёды хацелася ў гэты час наведацца туды, каб на свае вочы пабачыць тую святочнасць і адчуць непаўторны дух урачыста-ўзнёслага свята.

Божае Нараджэнне. Замежны горад.

Колькі гадоў таму са старэйшай пляменніцай мы наведалі Львоў. Праўда, напачатку з надвор’ем таксама не пашанцавала. Снег быў, але мокры… І чаргаваўся з даволі адчувальным марозам. Зрэшты, старадаўнія вулачкі, адмысловая архітэктура, ёлкі-ёлкі-ёлкі, калядныя кірмашы прымусілі забыцца на хібы надвор’я.

Гэта была сапраўды казка! І сфармуляванае тады «Калядны Львоў – мая любоў!» да гэтага часу ў сэрцы.

Божае Нараджэнне. Калядны Львоў.

У рамках вандроўкі, арганізаванай турыстычнай фірмай, у нас было шмат тэматычных экскурсій па горадзе. Настолькі захапляльных! Праўда, у касцёл зайсці ўвечары 24 снежня пасаромеліся, але трохі паслухалі трансляцыю службы. Прыгожа!

А ў дзень ад’езду, 25 снежня, надарыўся сапраўдны калядны цуд! Львоў літаральна заваліла снегам! І гэта, мабыць, сталася адным з самых запамінальных падарункаў…

Дык няхай у кожнага з вас, шаноўныя сябры, сённяшні святочны дзень адзначыцца самым сапраўдным цудам! Шчыра віншуем усіх, хто святкуе Божае Нараджэнне! Любові і любасці, дабра і дабрыні, здароўя моцнага, дабрабыту, кахання і веры ў лепшае. Хрыстус нарадзіўся! Славім Яго!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

292 0 78

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.