09.05.2019
09.05.2019

Увайсці ў зону камфорту. Апошнія навіны з Клінічнага раддома Мінскай вобласці

logo
Навiны
0 36
Памер шрыфта:
  • A
  • A
  • A

Трэцяга мая тэхнічная база Клінічнага радзільнага дома Мінскай вобласці папоўнілася новым спецыялізаваным абсталяваннем – сучасным гінекалагічным крэслам, адаптаваным пад патрэбы жанчын з абмежаванымі магчымасцямі. Яго закупку фінансаваў Мясцовы сацыяльны Фонд «Добра», пад эгідай якога аб'ядналіся прадстаўнікі беларускіх камерцыйных структур у мэтах садзейнічання рэалізацыі сацыяльна значных, дабрачынных праектаў.

Гаворка, як магло падацца, не ідзе пра разавы акт мецэнацтва. Гэта першы, але ўпэўнены крок, які азначае моцнае партнёрства дзяржаўных і прыватных, міжнародных і лакальных арганізацый у імкненні забяспечыць людзям роўны доступ да паслуг у галіне сэксуальнага і рэпрадуктыўнага здароўя. І такім чынам дасягнуць у Беларусі адной з глабальных Мэтаў ўстойлівага развіцця, прынятых на саміце ААН у 2015 годзе.

Урачыстая цырымонія перадачы абсталявання прайшла з удзелам прадстаўнікоў Міністэрства аховы здароўя Рэспублікі Беларусь, Фонду ААН у галіне народанасельніцтва (ЮНФПА) у Беларусі, Рэспубліканскай асацыяцыі інвалідаў-калясачнікаў (РАІК), кіраўнікоў установы аховы здароўя.

15% людзей ва ўсім свеце маюць тую ці іншую групу інваліднасці. Прыкладна такая ж сітуацыя склалася і ў Беларусі. На жаль, у грамадстве дагэтуль пераважае меркаванне, што сэксуальнае і рэпрадуктыўнае здароўе дзяўчат і жанчын з інваліднасцю – тое, пра што яны могуць думаць у апошнюю чаргу, і мара адчуць радасць мацярынства для іх апрыёры недасяжная.

 
Каспар Пік
Краінавы дырэктар ЮНФПА ва Украіне і Беларусі
Гэта вялікая памылка. Жанчыны з інваліднасцю нічым не адрозніваюцца ад астатніх жанчын. У іх такія ж жаданні, патрэбы і праблемы. Нам усім даўно пара сканцэнтравацца на тым, што ў першую чаргу гаворка ідзе пра чалавека. Інваліднасць, абмежаваныя магчымасці – гэта ўсё другаснае. Важна дапамагчы кожнаму рэалізаваць яго правы, уключаючы сэксуальнае здароўе і шчаслівае бацькоўства.

У лістападзе мінулага года ў Мінску адбыўся ўнікальны двухдзённы семінар з удзелам беларускіх урачоў, іх калегаў са Швецыі і людзей з траўмамі спіннога мозгу. Гэта быў першая маштабная размова пра патрэбы інвалідаў-калясачнікаў у кантэксце сэксуальнага і рэпрадуктыўнага здароўя і праблемы, з якімі яны сутыкаюцца. Перадача спецыяльнага гінекалагічнага крэсла Клінічнаму раддому Мінскай вобласці – лагічны і чаканы працяг той самай размовы. І, па сутнасці, гэта маштабны, комплексны праект у дзеянні, ключавое значэнне ў якім маюць стварэнне даступнага асяроддзя, навучанне медыцынскага персаналу, інфармаванне грамадства і збавенне ад стыгмы ў дачыненні да жаданняў і магчымасцяў людзей з інваліднасцю. Словам, усё тое, што не на словах, а на справе павышае якасць медыцынскіх паслуг і забяспечвае іх роўную даступнасць для ўсіх і кожнага.

 
Юлія Савачкіна
Галоўны спецыяліст аддзела медыцынскай дапамогі маці і дзецям Міністэрства аховы здароўя Рэспублікі Беларусь
Ніхто не павінен быць ушчэмлены ў сваіх правах, у тым ліку і на атрыманне кваліфікаванай медыцынскай дапамогі. Таму стварэнне безбар'ернага асяроддзя, – адна з прыярытэтных задач сацыяльнай палітыкі нашай дзяржавы. Радзільныя дамы ў Мінску і абласных цэнтрах ужо адпавядаюць крытэрыям безбар'ернага асяроддзя: гэта пандусы, дзверы ў аддзяленнях і палатах, што распахваюцца, адсутнасць парогаў, ліфты... Мы імкнемся да таго, каб ліквідаваць любыя перашкоды. Падчас рамонтаў, рэканструкцый устаноў аховы здароўя гэтыя пытанні ў абавязкова парадку ўлічваюцца і рэалізуюцца.

Асаблівым госцем на мерапрыемстве стала Аляксандра Чычыкава. Актыўны член Рэспубліканскай асацыяцыі інвалідаў-калясачнікаў, удзельніца ўсіх праектаў ЮНФПА, якія тычацца вырашэння пытанняў людзей з абмежаванымі магчымасцямі, Міс свету-2017 на інваліднай калясцы і проста далікатная, абаяльная і вельмі пазітыўная дзяўчына. Яна, як і ўсе юныя лэдзі ў яе ўзросце, марыць пра шчаслівыя адносіны, моцную сям'ю і здаровых дзяцей. І любы рух, што так ці інакш набліжае да мары, знаходзіць у яе жывы водгук.

 
Аляксандра Чычыкава
Член Рэспубліканскай асацыяцыі інвалідаў-калясачнікаў, Міс свету-2017 на інваліднай калясцы
Мне трохі сумна ад таго, што на дварэ 2019 год, а мы толькі робім першыя крокі, каб прызнаць правы інвалідаў на сэксуальную актыўнасць і рэпрадуктыўнае здароўе. Але радасна ад таго, што мы іх усё ж робім, разам і супольна. І, калі ўжо зусім шчыра, гэтай падзеяй мы мяняем, умоўна кажучы, не гінекалагічнае крэсла, а стаўленне грамадства да людзей з інваліднасцю. Я лічу, гэта выдатны паказчык таго, што краіна развіваецца ў патрэбным кірунку.
 
Таццяна Басалай
Намеснік галоўнага ўрача клінічнага раддома Мінскай вобласці па медыцынскай частцы
Мы ніколі не дзялілі нашых пацыентак на звычайных і асаблівых. У сваім жаданні зберагчы жаночае здароўе, стаць мамай для нас усе роўныя. Проста хтосьці меў патрэбу ў большай падтрымцы і дапамозе з нашага боку. Так што, калі было трэба, мы насілі жанчын у літаральным сэнсе на руках. Цяпер, дзякуючы падарунку, які зрабіў для нас Мясцовы сацыяльны фонд «Добра» ў рамках ініцыятывы ЮНФПА і Сеткі Глабальнага Дагавора ААН у Беларусі, у зоне камфорту апынуліся і нашы пацыенткі, і ўрачы.

Чакаецца, што ўжо да канца гэтага года падобныя спецыялізаваныя гінекалагічныя крэслы з'явяцца ва ўсіх абласных радзільных дамах Беларусі, а пасля ў жаночых кансультацыях і радзільнях раённага ўзроўню. А гэта значыць, што ў жанчын з'явіцца больш магчымасцяў, у якіх яны былі абмежаваныя.

 

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 36

Журналіст. Вышэйшая адукацыя. Сябра Беларускага саюза журналістаў. Стаж працы ў прафесіі – 20 гадоў. Беларуска. Нарадзілася ў г.Ганцавічы Брэсцкай вобласці. У 2001 годзе скончыла факультэт журналістыкі Беларускага дзяржаўнага ўніверсітэта па спецыяльнасці «Журналістыка». Працавала спецыяльным карэспандэнтам аддзела эканомікі газеты «Беларуская ніва», аглядальнікам аддзела пісьмаў, аглядальнікам аддзела сацыяльных праблемаў газеты «Савецкая Беларусь» (зараз – «Выдавецкі дом «Беларусь сёння»). З 2016 года – карэспандэнт уласны аддзела інтэрнэт-праектаў РУП «Рэдакцыя газеты «Медыцынскі веснік». З 2000 года з'яўляецца сябрам Беларускага саюза журналістаў (БСЖ). У 2002 годзе стала лаўрэатам прэміі БСЖ за лепшую журналісцкую працу. У 2017 годзе – лаўрэатам прэміі БСЖ «Залатое пяро».
Глядзіце таксама