6 Снежня
06.12.2018

Вокны Снежнай Каралевы

logo
Думкі ўслых
124 0 55
Памер шрыфта:
  • A
  • A
  • A

Падыходжу да сваёй шматпавярхоўкі з іншага, нязвыклага боку. Вочы з цікавасцю запыняюцца на вокнах суседніх пад’ездаў. «Ого, які ў нас мароз! – дзіўлюся. – Ажно ледзяныя ўзоры на шыбах расквеціліся. Я так даўно іх чамусьці не бачыла…» І толькі праз некалькі секунд разумею: а вокны-то – звычайныя, старога узору. Не ПВХ…

Яшчэ з які дзясятак гадоў таму і ў нас такія ж стаялі. Звычайныя шыбы, драўляныя рамы, якія добра-такі пацярпелі ўжо ад ападкаў. Уцяпліць іх на зіму было тым яшчэ квэстам! Даводзілася заклейваць нават вакол фортак. Калі ж свежага паветра ўзімку рэальна пачынала не хапаць, акуратненька адрывалі заклеенае. Хаця форткі тады можна было нават не адчыняць: вецер свістаў у шчыліны…

Зразумела ж, па тым часе зусім не сумую! І колькі б ні казалі пра шкоднасць матэрыялаў, з якіх вырабляюць вокны па новых тэхналогіях, але іх зручнасць і надзейнасць пераважае ўсё. Шкадую толькі аб адным: няма цяпер на тых шклопакетах ледзяных заваблівых узораў. А мне так падабалася іх разглядаць. Нават у дарослым ужо ўзросце… Таму і напісаліся калісьці гэтыя радкі:

На шкле дзівосным срэбрам цуд расцвіў…

Бялюткія суквецці – у пакоі.

Да іх я дакранаюся рукою,

А за акном – крыштальны пераліў.

І повязь гэту нельга зразумець:

Ці ажывіліся ў цеплыні ўзоры,

Ці подых снежнай ледзяной прасторы

Жывыя кветкі змусіў затрымцець…

Прыгадала пра ўзоры Дзядулі Мароза ці Снежнай Каралевы – і перад вачыма адразу ж усплылі… сняжынкі! Як жа мне падабалася перад Новым годам рэзаць іх з паперы і клеіць на вокны з дапамогай вады і мыла! Асабліва добра трымаліся тонкія, з прамакатак. Памятаеце, былі такія ўкладанні ў сшыткі даўней? Калі пісалі яшчэ чарнільнымі ручкамі?!

А зараз усё больш папулярнымі становяцца выцінанкі. Зарадзіліся яны ў Кітаі, а пасля прыйшлі і ў Беларусь. Кажуць, што апошні раз такі росквіт выцінанак, як зараз, назіраўся ў першае дзесяцігоддзе пасля вайны. Затым гэты від дэкаратыўна-прыкладнага мастацтва быў добра-такі прызабыты.

Цяпер жа можна набыць іх гатовыя наборы, дзе трэба толькі выразаць фігуркі па контуру і ўнутры па намаляваных лініях. Цэлыя кампазіцыі выцінанак упрыгожваюць вокны да Новага года! І гэта выглядае такім захапляльным, што нават я ўжо задумваюся: а ці не ўпрыгожыцца сёлета гэтак і мне?!

А што датычыцца сняжынак, дык зараз у сеціве з чаго толькі ні прапаноўваюць іх зрабіць! Апрача паперы, з нітак і клею, бісеру і пластыкавых бутэлек, з макаронаў і зубачыстак, з дроту і ватных палачак… Словам, з таго, на што толькі хопіць фантазіі.

Але мне даспадобы якраз-такі традыцыйныя сняжынкі, з паперы, з майго дзяцінства (ну як жа яго ні прыгадаць!)… Калі складаеш ліст у некалькі столак, рэжаш-рэжаш-рэжаш… А затым разгортваеш – і цябе штораз чакае сюрпрыз!

А вы любіце ўпрыгожваць вокны да Новага года?!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

124 0 55

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.