21.05.2021
21.05.2021

Цукерка – за правільны адказ, альбо Як мы на выставе працавалі

logo
Думкі ўслых
0 069
Памер шрыфта:
  • A
  • A
  • A

… Выстава «Ахова здароўя Беларусі-2021», дзень другі. Дакладней – раніца. Як чалавек немясцовы, выязджаю па сваім маршруце з Чэрвеня зараней. Зараней і прыязджаю. У руках – раздрукаваны электронны білет, па якім за 25 хвілін да афіцыйна заяўленага пачатку выставы (10.00) спрабую прайсці. Трэба ж і стэнд свой (газеты «Медыцынскі веснік») знайсці, і падрыхтавацца…

Выстава. Праца на стэндзе выставы «Ахова здароўя Беларусі-2021».

Але… Сюрпрайз! Непрыемны. Ахоўнік на ўваходзе тлумачыць, што прайсці можна па білеце гэтым толькі… акурат у 10.00! Тлумачу пра стэнд, пра дзяжурства. А мне ў адказ: «Тады ў вас павінны быць вось такія бэйджы…» Бэйджы ёсць. Толькі… на стэндзе. Таму даводзіцца чакаць, хто з калег прыйдзе са сваім і вынесе нам нашыя…

Калі колькасць тых, каго таксама не пускаюць на ўласныя стэнды па той жа прычыне, вырастае на некалькі дзясяткаў, выходжу з памяшкання на вуліцу. Там прахалодна, затое больш бяспечна. Бо, па-першае, не ўсе ў масках, а па-другое… Якая там сацыяльная дыстанцыя, калі на невялікім пятачку сабралася каля 50 чалавек?!

Уважліва аглядаю электронны білет. Ці ёсць там дзе пазнака, што прайсці можна толькі ў 10.00, а не зараней? Няма… Эх… Можна было не замарочвацца з яго заказам і раздрукоўкай.

Выстава. Электронны білет.

Нарэшце нам выносяць нашыя бэйджы «Прэса». Праходзім.

А там… Там практычна адразу ж – наведвальнікі! Бо ў нас – ярка! У нас – цікава! У нас – віктарына! За ўдзел у якой можна атрымаць цукеркі і памятныя прызы.

Адразу ж хачу шчыра падзякаваць усім, каго зацікавіў наш стэнд. Хто згаджаўся не толькі адказаць на пытанні (актуальныя, між іншым! Пра агульнавядомыя меры прафілактыкі COVID-19 па рэкамендацыях СААЗ!), але і пастасавацца, напісаць водгукі-пажаданні.

Традыцыйна на такіх выставах нашыя наведвальнікі – людзі самых розных узростаў, і не толькі медыцынскія работнікі, прадстаўнікі розных кампаній ды студэнты медустаноў. І не толькі з Мінска. Што робіць стасункі вельмі пазнавальнымі і запамінальнымі.

Выстава. Наведвальнікі на нашым стэндзе.

… Дзве жанчыны са Случчыны ахвотна згаджаюцца адказаць на пытанні віктарыны. І паспяхова! Радуюцца, пачуўшы маю беларускую мову. У адказ гучыць такая ж. Здорава сустракацца з аднадумцамі! Карыстаючыся момантам, перадаю праз іх прывітанне сваёй сяброўцы, рэдактару тамтэйшай раённай газеты Ірыне Каваленка.

Асабліва прыемна чуць: «А мы вас выпісваем! І сайты вашыя ведаем!» Хтосьці распавядае, што аформіў нават электронную (!) падпіску для мамы – колішняга медработніка на заслужаным адпачынку, хтосьці яе ж – для сябе ці арганізацыі… Не толькі папяровы варыянт выдання выбіраюць падпісчыкі, і гэта таксама радуе.

Вельмі шмат падыходзіла маладых і актыўных – студэнтаў. Таксама ахвотна адказвалі на пытанні, раіліся адно з адным, шчыра радаваліся прызам… Дзівіліся, калі адказвалі недакладна, і запаміналі, як трэба правільна рабіць. І вось у гэтым таксама бачым карысць нашай віктарыны!

Былі і салідныя мужчыны… 🙂

Выстава. Салідныя наведвальнікі.

… Адказаўшы на прапанаваныя пытанні, хлопец і дзяўчына бяруцца за іншыя білеты:

– Мы цяпер не за цукеркі, мы – для сябе, добра?!

– А вы студэнты?

– Не, мы ўрачы…

І такіх, дарэчы, яшчэ было шмат – тых, хто зацікавіўся ўсімі пытаннямі і правільнымі адказамі. Асвета руліць! 🙂

Выстава. Асвета руліць.

Падыходзілі і іншыя ўдзельнікі выставы, рознага ўзросту. І таксама ахвотна пагаджаліся адказваць на пытанні віктарыны. Нават наш партнёр Віктар праверыў свае веды па ўсіх білетах.

– Недарэмна ж медыцынскую адукацыю атрымліваў, – патлумачыў свой добры досвед.

А падчас невялікага зацішша дапамог маёй каляжанцы Жанне Гаўрычэнкавай вымераць ціск.

Выстава. Вымярэнне ціску.

– А я ваш аўтар, – пастасаваўся з намі яшчэ адзін наведвальнік з Гомельшчыны – Андрэй Савосцін. – Быў лепшым студэнтам Беларусі…

У гэты час на стэнд прыехала наш галоўны рэдактар газеты «Медыцынскі веснік» Таццяна Сівец. Яна ж і запрасіла Андрэя да больш актыўнага супрацоўніцтва.

– Газета ваша відавочна цікавейшай зрабілася ў апошні час, – заўважыў наступны ўдзельнік віктарыны. – Дарэчы, я – за навуковасць. Так што давайце больш навуковых артыкулаў…

– А я вырашыла з вамі яшчэ згуляць…

І такіх, хто да нас падыходзіў не адзін раз за паўдня, было багата. А хтосьці прыводзіў сваіх знаёмых. 🙂 Маўляў, ідзі, згуляй…

Вось і атрымлівалася, што па самой выставе разгульваць не было калі. Запомнілася толькі машына хуткай дапамогі на дэманстрацыі, вялізная чарга на вакцынацыю супраць COVID-19 на вуліцы з раніцы, якая прырастала проста на вачах, і… лавачка для сэлфі і фота. І тое таму, што яе паказалі і сфоткалі! 🙂

Выстава. Фотазона на выставе «Ахова здароўя Беларусі-2021».

А ўвогуле, канешне ж, нам самім было падчас працы на выставе і цікава, і карысна (а ўлічваючы добрую кампанію – яшчэ і весела!). Дарэчы, на працягу ўсяго дзяжурства мы з Жаннай маскі не здымалі, толькі мянялі. І асабліва ніякіх нязручнасцяў у выглядзе абцяжаранага дыхання ці чагосьці там яшчэ не назіралася. Гэта толькі калі ўжо я дахаты прыехала (з улікам дарогі – практычна цэлы дзень у масцы!), дык адчула што трохі баліць пераноссе і вушы. 🙂 Але – не крытычна.

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0 0 69

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.