Каханне на сподачку
З'еў талерку супу – і ты палавы гігант, які не ведае стомы і не церпіць няўдач. Занадта фантастычна, каб быць рэальнасцю. Але менавіта на гэтым настойваюць адэпты філасофіі лібіда на абедзеннай талерцы. І сцвярджаюць: у аснове назвы афрадызіякаў – прадуктаў харчавання, нібыта здольных павышаць палавую цягу, – пакладзена імя антычнай багіні кахання Афрадыты, а каму, як не ёй быць знаўцай гэтай справы. Аргумент, з якім цяжка не пагадзіцца.
Паспрачаемся, вы таксама адразу назавеце пару-тройку любоўных прадуктаў? Вустрыцы, шакалад, корань жэньшэня, авакада – афрадызіякі, правераныя часам. Але толькі ў тым сэнсе, што пра іх дзіўную здольнасць уплываць на якасць інтымных адносін легенды ходзяць не адно стагоддзе. На самай справе спіс сэксуальных стымулятараў куды больш шырокі і напрамую залежыць ад этнічнай культуры і фантазіі яго складальнікаў. Чаго тут толькі няма! Ад банальнай аўсянкі да экзатычнага рогу насарога.
Зрэшты, у сілу «Геркулеса» верыцца на парадак менш, чым у моц, скажам, шпанскай мушкі або тэстыкул горнага казла. І тое праўда: з'есці талерку кашы здольны кожны, а вось бычыныя яечкі – ласунак для абраных: хапіла духу паспытаць, хопіць і на ўсё астатняе.
Аднак, жарты ў бок. Давайце разбярэмся, чым афрадызіякі заслужылі свой аўтарытэт сярод мужчын і жанчын, і ці сапраўды яны так добрыя, як пра іх кажуць.
Вустрыцы ў шакаладзе
Калі задацца мэтай, усе афрадызіякі можна ўмоўна падзяліць на тры групы:
- Прадукты, ад якіх патэнцыйныя каханкі маюць права чакаць прыліву сіл і пачуццёвасці, паколькі яны ў прынцыпе станоўча ўплываюць на арганізм. І гэта, бадай, самы шырокі спіс афрадызіякаў. Сюды можна смела аднесці:
- спецыі, вострыя прыправы і зёлкі (імбір, кары, перац чылі, часнык, усе віды цыбулі, лімоннік, гваздзік ...)
- агародніна і садавіна (салера, спаржа, вінаград, фінікі, манга, гранат...)
- шакалад
- морапрадукты (лобстар, грабенчыкі, крэветкі, анчоўсы, мідыі ...)
- мёд
- арэхі (міндаль, фісташкі, грэцкі арэх, какос, а таксама семкі гарбуза ...)
- бабы і злакі
- яйкі
- аліўкавы алей
- малочныя прадукты (сыры, тварог, смятана, сыроватка, ёгурты ...)
2. Прадукты, якія ў той ці іншай ступені нагадваюць спакуслівыя формы і інтымныя часткі чалавечага цела. Да афрадызіякаў гэтай групы адносяцца:
-
вустрыцы (у вонкавым выглядзе малюска беспамылкова згадваецца яго бессаромнае падабенства з жаночымі палавымі органамі)
-
корань жэньшэня (па форме нагадвае чалавечае цела)
-
бананы (без каментароў, ды і што тут скажаш)
-
авакада (плады растуць парамі, з-за чаго моцна нагадваюць пэўныя часткі мужчынскага цела. Ацтэкі, не саромеючыся, так і называлі фрукт: яечка)
-
рог насарога (сімвал мужчынскага фаласа, адзінага і магутнага)
3. Прадукты-экзоты. Пакаштаваць хоць што-небудзь на зуб з гэтага спісу адважваюцца нямногія: альбо тыя, каму губляць ужо няма чаго, альбо тыя, у каго і так у ложку поўны парадак, але, як кажуць, няма мяжы дасканаласці. Што характэрна, пра гэтыя афрадызіякі аматары жарстнага сэксу, як правіла, не ведаюць нічога, акрамя сэксуальнай усемагутнасці, якая ім прыпісваецца. 
У гэтай групе самае месца:
- шпанскай мушцы;
- тэстыкулам жывёл (горнага казла, быка, тыгра і нават маржа);
- балюту (качынае яйка, у якім ужо сфармаваўся плод птушкі з апярэннем, храсткамі і дзюбай);
- жабінай атруты (каб прыкрыць непрывабную сутнасць напалову прыроднага - напалову хімічнага зелля яго часцей называюць «каменем кахання»);
- дурыяну (фрукт з выспы Ява з агідным пахам гнілога мяса).
Пры жаданні спісы кожнай групы можна пашырыць і дапоўніць. Але не будзем адхіляцца ад тэмы. Пагаворым пра карысць афрадызіякаў. У пэўным сэнсе яна бясспрэчная.
Карысць афрадызіякаў
Так-так, мы не абмовіліся. Афрадызіякам не толькі можна, але і трэба знайсці месца на абедзенным стале. Праўда, тычыцца гэта толькі прадуктаў з першай групы і збольшага другой. Здзіўлены? Ад чаго ж! Калі ўдумацца, менавіта яны з'яўляюцца асновай паўнавартаснага штодзённага меню і забяспечваюць усю разнастайнасць вітамінаў і мікраэлементаў, неабходных для добрага самаадчування і выдатнага настрою. А калі ёсць настрой і бадзёрасць, значыць ёсць што? Правільна! Жаданне і сілы для яго рэалізацыі. Як кажуць, была б нагода. 
А вось прамы ўплыў афрадызіякаў на ўзнікненне і павышэнне лібіда нічым не даказаны і не пацверджаны. Амерыканскае ўпраўленне па санітарным наглядзе за якасцю харчовых прадуктаў і лекавых сродкаў (FDA) і зусім назвала афрадызіяк элементам фальклору, не больш за тое. Затое непасрэдна аб прадуктах, якім прыпісваецца ўласцівасць сэксуальных стымулятараў, вядома дакладна практычна ўсё.
Напрыклад, морапрадукты, яйкі, малако і іншыя малочныя прадукты - крыніца чыстага бялку. Менавіта ён дае сілу ў шырокім яе разуменні і значна павышае працаздольнасць. Вустрыцы, мідыі, крэветкі і іншая марская жыўнасць да таго ж багатыя цынкам, які стымулюе выпрацоўку тэстастэрону. Трэба меркаваць, высокае ўтрыманне цынку забяспечыла наяўнасць у пераліку сэкс-прадуктаў таксама часныку і цыбулі, нягледзячы на іх духмяны шлейф, які сам па сабе хутчэй пужае сэксуальнага партнёра, чым выклікае ў ім жаданне. Выйсце адно – есці водарныя вострыя прыправы ўдваіх.
Бабовыя і злакі – універсальныя прадукты для здароўя ў цэлым, адпаведна, для сэксуальнага ў тым ліку. Па сваім унікальным складзе, які ўключае комплекс вітамінаў і мінералаў, мікра- і макраэлементаў, раслінны бялок і клятчатку, ім няма роўных. Харчаванне, заснаванае на стравах са злакаў і бабоў, здольнае вярнуць сілы хвораму чалавеку. У тым, што здароваму – памножыць, можна і не сумнявацца.
Калі падсумаваць, спецыі і рэзкія зёлкі маюць танізавальныя ўласцівасці, паляпшаюць цыркуляцыю крыві, такім чынам, забяспечваюць яе лепшы прыток і ў патрэбныя для сэксуальных уцех месцы. За што, трэба меркаваць, і атрымалі статус афрадызіякаў. Аднак мы, колькі ні стараліся, не здолелі адшукаць ні адной рэальнай гісторыі, у якой патэнцыйны каханак эфектна вырашыў бы свае сэксуальныя праблемы пры дапамозе пякучага перцу, карычнай палачкі або кавалачка імбіру…
Калі разважаць пра шакалад, прыпісваючы яму ўласцівасці магутнага афрадызіяку, то як тут не ўзгадаць барадаты анекдот пра Лёшу і Юлю. «Лёшы вельмі хацелася шакаладку. Але ён аддаў яе Юлі. Таму што Юлю яму хацелася мацней». Шакалад сапраўды здольны падняць настрой, дзякуючы славутаму гармону радасці – эндарфіну. Але падняць лібіда, калі яно не паднялося само... Не, з'есці столькі шакаладу яшчэ нікому не ўдавалася.
У тым жа кірунку можна доўга і падрабязна расказваць пра кожны «эратычны» прадукт, адзначаючы яго карысныя ўласцівасці і ўплыў на арганізм чалавека. Уласна, гэтым простым прыёмам на ўсю моц карыстаюцца прадаўцы афрадызіякаў, замоўчваючы, праўда, адзін істотны факт. Навуковых пацверджанняў афрадызіятычных уласцівасцей якога б там ні было асобна ўзятага прадукту як не было, так і няма. А вось меню, правільна складзенае са згаданай намі ўмоўнай першай групы так званых сэксуальных стымулятараў расліннага і жывёльнага паходжання, – адзін з краевугольных камянёў прынцыпу «трох паўнавартасцей». Паўнавартаснае харчаванне, паўнавартасны сон і паўнавартасная фізічная актыўнасць – залог выдатнага здароўя, фізічнага, псіхічнага і, зразумела, сэксуальнага.
Пан або прапаў. Не ўсе афрадызіякі аднолькава карысныя
І гэта таксама шчырая праўда. Больш за тое, пагоня за дакладным сродкам, закліканым размаляваць сэксуальнае жыццё новымі фарбамі, цалкам можа быць забегам навыперадкі з ... Увогуле, апошнім забегам. 
Напрыклад, усяго 50 мг парашку, вырабленага з шпанскай мушкі, у стане прыспешыць канец жыцця ўмоўна здаровага мужчыны. І ён напэўна быў бы рады, калі б абышлося толькі інтымным яе складнікам.
Славу непераўзыдзенага афрадызіяку шпанская мушка набыла дзякуючы кантарыдзіну, вельмі таксічнаму рэчыву, з дапамогай якога жук у сваім месцы жыхарства абараняецца ад драпежнікаў сам і абараняе сваіх нашчадкаў. Чалавек жа праглынае гэтую атруту, у надзеі забяспечыць сабе ноч пякучай жарсці. Прычым, пякучай літаральна. Прынцып дзеяння кантарыдзіну заключаецца ў мацнейшым раздражненні ўрэтры пры выхадзе атруты з арганізму чалавека натуральным чынам з мачой. Ацёк у вобласці геніталій забяспечвае ўстойлівую эрэкцыю. Гэта плюс. Мінус у тым, што на працягу ўсяго тэрміну дзеяння шпанскай мушкі (а гэта некалькі гадзін), эрэкцыя суправаджаецца не самымі прыемнымі адчуваннямі апёку, паколвання, свербу ў палавым члене. А чаго яшчэ чакаць ад таксіну, якім паспяхова выпальваюць бародаўкі?
Аналагічнае небяспечнае дзеянне для арганізма чалавека мае яшчэ адзін экзатычны афрадызіяк – «камень кахання». За рамантычнай назвай крыецца сапраўды смяротны кактэйль з жабінай атруты і хімічных дамешкаў. FDA яшчэ 10 гадоў таму забараніла гэты прэпарат для вытворчасці і распаўсюджвання. Але пры пэўнай настойлівасці яго да гэтага часу можна знайсці ў заакіянскіх сэкс-шопах.
У адрозненне ад іншых афрадызіякаў, «камень кахання» ужываецца вонкава, выклікаючы здранцвенне палавых органаў, як вынік, зніжаючы адчувальнасць і павялічваючы працягласць палавога акту. Але гэта далёка не ўсе ўласцівасці, якія мае жабіная атрута. Рэчывы, што яна ўтрымлівае, агрэсіўна адбіваюцца на працы сардэчнай мышцы і могуць прывесці аж да спынення сэрца.
