14.04.2021
14.04.2021

Хатнік абуджаецца! Хлусім?! :)

logo
Думкі ўслых
0 026
Памер шрыфта:
  • A
  • A
  • A

Паводле некаторых даследчыкаў, сёння даволі цікавае… Свята – не свята… Скажам так: дзень цікавы. Абуджэнне Хатніка (Дамавіка). І, маўляў, трэба хлусіць, каб яго заблытаць. А вось навошта, не ведаю. Здаецца, Хатнік – такі мілы дух... Прынамсі, такім мы яго ўяўляем па шматлікіх малюнках, мультфільмах, казках. Калі не злаваць яго, вядома ж, а ўлагоджваць, частаваць, дарыць падарункі… А памятаеце дамавёнка Кузю?! Мілата ж! 🙂

А вы верыце ў Хатніка?! А я нават не ведаю, веру ці не… Проста ніколі не бачыла і не чула ніякіх яго праяўленняў. А жытло ж мяняла не аднойчы. На жаль, не чула. Бо ў тое, што існуе абсалютна іншы свет, а можа, нават і не адзін, са сваімі насельнікамі, веру адназначна.

Яшчэ гады паўтара-два таму, сустракаючы ўзгадкі пра якое-небудзь свята Хатніка, імкнулася зрабіць належнае. Пакінуць ежы і пітва. Пачаставаць. Выканаць іншыя рытуальныя дзеянні. І гэта насамрэч неяк супакойвала. Бо вельмі хочацца верыць, што ў тваім жытле жыве добры дух. І што ён табе пэўным чынам дапамагае, адводзіць бяду…

А памятаеце, якім уяўлялі Хатніка нашыя продкі? Так, старэнькім дзядком з сівой барадою, ускудлачанымі валасамі, без шапкі і абутку. І я толькі нядаўна даведалася, што апошняе (без шапкі, абутку) і з’яўляецца прыкметай прыналежнасці да іншага свету. Хаця на малюнках ён часцяком і ў тым, і ў другім… Цікава, што ў Віцебскай губерні нават казалі: «Дамавік ад чарцей адстаў, а да людзей не прыстаў».

Хатнік. Добры дух дома.

Што ўвогуле, па ўяўленнях нашых продкаў, любіць Дамавік? Калі ў хаце лад ды згода, моцная сям’я, любоў паміж сямейнікамі, каханне паміж мужам і жонкай. Калі падтрымліваецца чысціня і парадак, усе рэчы ляжаць на сваіх месцах. Калі ў хлявах стаіць жывёла яго любімай масці. Варта прыслухацца, праўда?!

І з-за чаго, наадварот, ён можа раззлавацца, і тады ўсім будзе не соладка?! Дужа не любіць Хатнік сямейныя сваркі, неахайнасць, непарадак у жытле, п’янства, спрэчкі, брыдкаслоўе… За гэта можа нават даволі сур’ёзна пакараць.

Затое калі ён у гуморы, дык жарты яго досыць бяскрыўдныя. Праўда, калі людзі нават не здагадваюцца пра тое, што ў іх жыве Хатнік, дык моцна дзівяцца, не знайшоўшы патрэбнай рэчы на яе звыклым месцы. І шукаюць усюды. Нават там, дзе яна ніяк не можа быць…

Хатнік. Бывае, сваволіць і сцягвае рэчы.

Як раней мы казалі, калі не маглі штосьці адшукаць?! «Чорт, чорт, пагуляўся – і хопіць, аддай…» А цяпер, напрыклад, я ў такіх сітуацыях звяртаюся да Хатніка. І спрацоўвае! Вось і не вер пасля гэтага ў яго існаванне… 🙂

Да таго ж, калі гаспадары з Хатнікам сябруюць, ён можа нават папярэджваць пра якуюсьці непрыемную падзею. І тады, кажуць, людзі чуюць незвычайныя гукі – плач, смех, стук ды іншае. Галоўнае – адрозніць іх ад скрыгацення ветру за акном, уключанага тэлевізара ў суседняй кватэры. Інакш такога можна сабе напрыдумваць! Асабліва, калі чалавек прымхлівы.

Вядома ж, Хатніка больш натуральна ўяўляць у вясковай хаце, чым у гарадской кватэры альбо катэджы. Але што ж рабіць, калі многія так далёка цяпер ад вёскі? А штосьці ад продкаў узяць хочацца. Вось і ўяўляем, а то і клічам-запрашаем добрага духа. Мо, усё ж ён у нас жыве? Як думаеце?

Хатнік. Ці жыве ў кватэры.

Бо існуе такое меркаванне (атрымліваецца, цалкам сучаснае), што Хатнік можа жыць… нават на балконе! Праўда, напярэдадні зімы яго трэба ўсё ж забраць у кватэру. Для гэтага перанесці адтуль якую-небудзь рэч. А з ёю ён і сам «пераедзе»…

Што ж тычыцца гэтага дня, дык вырашайце самі: хлусіць альбо прывітаць абуджэнне Хатніка іншым спосабам. Бо хто ж забароніць нам ствараць свае ўласныя традыцыі?! Напрыклад, акурат перад абуджэннем добрага духа пакінуць для яго на бачным месцы падарунак ці частаванне. Альбо і тое, і другое. Прывітанне, Хатнік! 🙂 Мы табе радыя…

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

0 0 26

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.