07.06.2020
07.06.2020

Як падтрымаць здароўе вачэй пры цукровым дыябеце

logo
Хваробы ад А да Я
302 019
Памер шрыфта:
  • A
  • A
  • A
Практычна ўсе звыклыя нам паўсядзённыя справы, праца ці стасункі, сышлі ў анлайн. Вымушанае знаходжанне дома з-за COVID-19 прыводзіць да працяглага сядзення за камп’ютарам, тэлефонам і тэлевізарам. Усё гэта так ці інакш можа спрыяць прагрэсаванню або прывесці да развіцця праблемаў са зрокам. Асабліва схільныя да негатыўных наступстваў людзі, у якіх па тых ці іншых прычынах ужо ёсць пэўныя рызыкі зніжэння вастрыні зроку або захворванне вачэй, напрыклад, у тых, хто хворы на цукровы дыябет.
Цукровы дыябет. Праблемы са зрокам.

Пра тое, як захаваць здароўе вачэй людзям з цукровым дыябетам ва ўмовах жыцця анлайн, у якіх выпадках можна справіцца ўласнымі сіламі, а калі абавязкова трэба звяртацца па медыцынскую дапамогу, журналіст інфармацыйнага партала Здаровыя людзі спыталася ў афтальмолага 1-й кваліфікацыйнай катэгорыі афтальмалагічнага кабінета Мінскага гарадскога эндакрыналагічнага дыспансера Ксеніі Палавінкінай.

Часты «спадарожнік» цукровага дыябету – дыябетычная рэтынапатыя

Самым галоўным ускладненнем цукровага дыябету з’яўляецца дыябетычная рэтынапатыя. Пры гэтым стане пашкоджваюцца пераважна сасуды вочнага дна, што, у сваю чаргу, прыводзіць да пагаршэння зроку і развіцця слепаты. Небяспека захворвання ў тым, што прыём інсуліну, прэпаратаў, якія зніжаюць цукар, і дыета не гарантуюць, што гэтае ўскладненне не пачне прагрэсаваць.

Ксенія Палавінкіна, афтальмолаг 1-й кваліфікацыйнай катэгорыі афтальмалагічнага кабінета Мінскага гарадскога эндакрыналагічнага дыспансера:

– Дыябетычная рэтынапатыя (ДР) – спецыфічнае сасудзістае ўскладненне на вачах, якое здольнае прагрэсаваць шмат гадоў і пры адсутнасці лячэння можа прывесці да слепаты. Важна разумець, што пачатковыя праявы ДР з’яўляюцца ва ўсіх пацыентаў з цукровым дыябетам, могуць цалкам ніяк не ўплываць на вастрыню зроку, працякаць бессімптомна, не турбаваць чалавека. Разам з тым, далейшае развіццё, пагаршэнне стану залежаць ад узроўню глікеміі і могуць вельмі моцна ўплываць на зрок, пагаршаць якасць жыцця.

Цукровыя дыябет. Праблемы са зрокам. Дыябетычная рэтынапатыя.

Спецыяліст дадала, што расслабляцца ні ў якім разе нельга, нават калі дыягнаставаная пачатковая стадыя дыябетычнай рэтынапатыі, якая можа і не ўплываць на зрок. Бываюць сітуацыі, калі зрок цудоўны, а лячэнне сятчаткі з-за дыябетычнай рэтынапатыі ўжо неабходнае – для таго, каб пазбегнуць хуткага прагрэсавання хваробы.

Агляд афтальмолага – мінімум раз на год

Самае галоўнае, упэўненая Ксенія Палавінкіна, што трэба памятаць усім пацыентам, у якіх ёсць цукровы дыябет, – пастаяннае назіранне ў афтальмолага. Як мінімум – адзін раз на год. Калі ёсць неабходнасць наведваць акуліста часцей, доктар абавязкова пра гэта паведаміць.

Ксенія Палавінкіна, афтальмолаг 1-й кваліфікацыйнай катэгорыі афтальмалагічнага кабінета Мінскага гарадскога эндакрыналагічнага дыспансера:

– Увесь гэты дынамічны кантроль неабходны для таго, каб вызначыць стан сятчаткі, яе сасудаў, зразумець, ці ёсць неабходнасць у спецыяльным лячэнні – лазернай каагуляцыі, ці не.

Акрамя гэтага, неабходна кантраляваць узровень глюкозы ў крыві, бо ён уплывае на стан органаў зроку. Варта імкнуцца трымаць гэты паказчык у межах нормы. Кантролю патрабуе і артэрыяльны ціск, яго павышэнне можа прывесці да разрыву сценкі сасудаў вочнага дна.

Цукровы дыябет. Праблемы са зрокам. Вымяраем ціск.

Шкодныя звычкі, такія, як злоўжыванне алкаголем або курэнне, могуць выклікаць спазм сасудаў. Таму ў вашых жа інтарэсах адмовіцца ад іх раз і назаўсёды.

Што павінна насцярожыць

Важна своечасова заўважыць небяспечныя сімптомы. Гэта могуць быць:

  • чорныя ці чырвоныя плямы, што плывуць перад вачыма;
  • скажэнне літар пры чытанні;
  • чорная «штора», якая павісла перад вачыма.

Ксенія Палавінкіна, афтальмолаг 1-й кваліфікацыйнай катэгорыі афтальмалагічнага кабінета Мінскага гарадскога эндакрыналагічнага дыспансера:

– Калі штосьці трывожыць, з’явіліся незвычайныя скаргі, рэзка ўпаў зрок, з’явіліся цёмныя плямы перад вачыма, размытасць зроку ў цэнтральнай зоне, неабходна тэрмінова звяртацца да афтальмолага.

Зараз можна звярнуцца па дапамогу да ўрача ў паліклініку па месцы жыхарства альбо да спецыяліста ў Мінскі гарадскі эндакрыналагічны дыспансер (тэл. даведкі: 247-66-54).

На час пандэміі каранавіруснай інфекцыі таксама адкрыты экстранны кабінет у 11-й Гарадской клінічнай бальніцы г.Мінска, на Каржанеўскага, 4, дзе аказваецца кругласутачная неадкладная амбулаторная дапамога.

Як падтрымаць здароўе вачэй

Цукровы дыябет. Праблемы са зрокам. Адпачываем за камп'ютарам.

Агульныя рэкамендацыі для людзей з цукровым дыябетам аднолькавыя:

  1. Збалансаванае харчаванне.
  2. Пітны рэжым.
  3. Фізічная актыўнасць.
  4. Захаванне зрокавага рэжыму (45 хвілін працаваць, 15 – адпачываць.)
  5. Чытаць, працаваць за камп’ютарам альбо глядзець у экран тэлефона ў добра асветленым памяшканні (дрэннае святло спрыяе хуткай стомленасці вачэй) і не ў становішчы лежачы.

Ксенія Палавінкіна, афтальмолаг 1-й кваліфікацыйнай катэгорыі афтальмалагічнага кабінета Мінскага гарадскога эндакрыналагічнага дыспансера:

– Калі даводзіцца шмат часу праводзіць за камп’ютарам, неабходна выкарыстоўваць заменнікі слязы (спецыяльныя ўвільгатняльныя кроплі, якія не даюць перасыхаць слёзнай плёнцы).

Выкарыстоўваць увільгатняльныя кроплі варта, як толькі з’явіліся сухасць і смыленне ў вачах. Гэты стан яшчэ называюць сіндромам сухога вока. Калі гэтага не рабіць, непрыемныя адчуванні могуць стаць пастаяннымі, ажно да развіцця запалення або кератыту (запаленне рагавіцы вока).

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

302 0 19

Нарадзілася і жыву ў Мінску. У 1995 годзе скончыла сталічную сярэднюю школу №168, затым паступіла ў Беларускі дзяржаўны ўніверсітэт на факультэт журналістыкі. Пасля заканчэння вучобы ў 2000 годзе была размеркаваная ў Беларускае тэлеграфнае агенцтва (БелТА), дзе 8 гадоў прапрацавала спецыяльным карэспандэнтам аддзела палітычнай і сацыяльнай інфармацыі. У розныя гады асвятляла падзеі ў сферы навукі, культуры, адукацыі і аховы здароўя. У 2011 годзе перайшла ў прэс-службу Міністэрства аховы здароўя. Кола маіх абавязкаў уключала, у тым ліку арганізацыю сустрэчаў спецыялістаў са СМІ, складанне прэс-рэлізаў, забеспячэнне журналістаў інфармацыяй пра дзейнасць сферы аховы здароўя, а таксама падрыхтоўку аператыўных каментароў экспертаў і фарміраванне стужкі навінаў афіцыйнага сайта міністэрства. З 2017 года працую ўласным карэспандэнтам аддзела інтэрнэт-праектаў рэдакцыі газеты «Медыцынскі веснік». З'яўляюся аўтарам публікацый на інфармацыйным партале «Здаровыя людзі» і сайце для падлеткаў «Teenage.by».
Глядзіце таксама