01.09.2022
01.09.2022

Як захаваць кавун да зімы? Лепшыя спосабы нарыхтоўкі

logo
Рэцэпты
0
Памер шрыфта:
  • A
  • A
  • A

Сезон кавуноў нельга назваць кароткім, але часта хочацца яго падоўжыць, каб яшчэ атрмымаць асалоду ад гэтай сакавітай ягады. У такім разе выратуюць нарыхтоўкі (кавуны змогуць захоўвацца ўсю зіму). Да таго ж гэта хуткія спосабы захавання ўраджаю.

Для нарыхтовак на зіму падыходзяць салодкія і несалодкія плады, саспелыя і што не даспелі. Нарыхтоўваць можна кавуновыя долькі, цэлыя кавуны, кавуны з лупінай ці толькі кавуновую мякаць. З кавуноў рыхтуюць салодкія і салёныя кансервацыі, стравы з вастрынкай. Па смаку кансерваваны кавун можа канкурыраваць з марынаванымі агуркамі і памідорамі. І кавуном узімку дакладна можна здзівіць гасцей.

Таму мы падрыхтавалі для вас рэцэпты нарыхтовак кавуноў на зіму. Падборка атрымалася вялікая, затое кожны зможа ў ёй знайсці нешта на свой смак.

да зместу

Салодкія нарыхтоўкі з кавуна

Кавун у сіропе

Кавун у сіропе

 

Інгрэдыенты

  • Мякаць кавуна – 500 г
  • Цукар – 500 г
  • Лімон – ½ шт
  • Вада – 20 мл

Спосаб гатавання

Кавуновую мякаць ачысціць ад семак і нарэзаць на кубікі. Перакласці мякаць кавуна ў сатэйнік, дадаць туды ваду. Паставіць сатэйнік на маленькі агонь, увесь час мяшаць. Давесці масу да кіпення.

Пасля закіпання варыць 5 хвілін. Зняць гатовую масу з агню і астудзіць. З паловы лімона выціснуць сок і дадаць у астылую кавуновую массу. Высыпаць цукар. Усё перамяшаць. Даць масе настаяцца цягам 2 гадзін.

Ізноў паставіць сатэйнік на агонь і нагрэць яго, увесь час мяшаючы кавуновую масу. Давесці да кіпення. Пасля закіпання варыць яшчэ 5—7 хвілін.

Раскласці гатовую масу ў стэрылізаваныя банкі так, каб джэм даходзіў да краёў. Закатаць банкі стэрылізаванымі накрыўкамі. Паставіць слоік на роўную паверхню дном угару.

Ахінуць слоікі, і даць ім астыць. Захоўваць слоікі ў халаднаватым месцы.

да зместу

Жэле з кавуна

Жэле з кавуна

Інгрэдыенты

  • Мякаць кавуна – 1,2 кг
  • Жэлацін – 60 г
  • Цукар – 1 шклянка
  • Лімонавая кіслата – 1 г л

Спосаб гатавання

Мякаць кавуна ачысціць ад костачак і адвольна нарэзаць. Утвораны сок выліць у асобную ёмістасць. У кавуновы сок высыпаць жэлацін, перамяшаць, пакінуць на 10—15 хвілін. Мякаць кавуна здрабніць у збівачы ці патаўчы.

Пераліць кавуновае пюрэ ў рондаль. Дадаць цукар і лімонавую кіслату. Добра перамяшаць. Паставіць рондаль на агонь, давесці да кіпення. Пасля закіпання зрабіць мінімальны агонь і варыць пюрэ 10 хвілін. Увесь час мяшаць.

Зняць рондаль з агню. У гарачае пюрэ дадаць кавуновы сок з жэлацінам. Мяшаць да поўнага растварэння жэлаціну. Гарачае жэле заліць у стэрылізаваныя слоікі.

Закрыць слоікі стэрылізаванымі накрыўкамі. Слоікі пераварочваць не трэба, іх трэба ахінуць і пакінуць да поўнага астывання. Есці жэле можна ўжо праз 2 дні пасля гатавання. Захоўваць жэле неабходна ў халодным месцы.

да зместу

Джэм з кавуна

Джэм з кавуна

Інгрэдыенты

  • Мякаць кавуна – 1 кг
  • Цукар – 500 г
  • Лімонавы сок – 2 ст л
  • Жэлявальны сродак – 50 г

Спосаб гатавання

Нарэзаць мякаць на кавалачкі, дастаць усе гарбузікі. Змяшаць жэлявальны сродак з 4-ма сталовымі лыжкамі цукру. Перакласці мякаць у рондаль. Засыпаць у рондаль сумесь цукру з жэлюючым сродкам.

Паставіць рондаль на маленькі агонь. Мяшаць кавун, варыць 10 хвілін. Зрабіць з мякаці пюрэ з дапамогай паглыбнага збівача. Працягваць варыць пюрэ да закіпання. Калі пюрэ закіпела, дадаць у рондаль астатні цукар.

Добра перамяшаць джэм, каб цукар растаў, і варыць яшчэ 5 хвілін. Выключыць агонь. Зняць з джэму пенку. Дадаць у джэм лімонавы сок. Перамяшаць. Перакласці джэм у стэрылізаваныя слоікі, закрыць стэрылізаванымі накрыўкамі. Закатаць банкі і ахінуць. Пакінуць да поўнага астывання.

да зместу

Цукаты з кавуновых скарыначак

Інгрэдыенты

Кавуновыя скарыначкі – 1,5 кг

Для цукровага сіропу

  • Вада – 3 л
  • Цукар – 1 кг
  • Лімон – ½ шт
  • Гваздзіка – 3—4 шт

Для содавага раствору

  • Вада – 3 л
  • Сода – 3 г л

Спосаб гатавання

Падрыхтаваць ёмістасць з 3 літрамі халоднай вады, дадаць туды соду. Добра перамяшаць, каб сода растала. Кавуновыя скарыначкі ачысціць ад зялёнай лупіны.

Нарэзаць скарыначкі на прастакутнікі, квадраты ці інакш. На маленькія кавалачкі рэзаць не трэба, таму што ў час гатавання яны зменшацца ў памеры.

Перакласці скарыначкі ў содавы раствор. Пакінуць на 2—3 гадзіны, перыядычна мяшаць. Зліць содавы раствор і добра прамыць кавуновыя скарыначкі праточнай вадой.

Наліць у рондаль 3 літра вады і перакласці туды кавуновыя скарыначкі. Скарыначкі павінны быць цалкам у вадзе. Паставіць рондаль на агонь, давесці да кіпення ваду і зняць рондаль з агню. Працадзіць кавуновыя скарыначкі праз друшляк. У гэты ж рондаль наліць 3 літры вады і дадаць туды 300 г цукру. Ізноў пакласці ў рондаль кавуновыя скарыначкі. Перамяшаць і паставіць на агонь.

Давесці ваду да кіпення, зменшыць агонь, працягваць варыць 20 хвілін. Дадаць яшчэ 300 г цукру, перамяшаць і варыць яшчэ 20 хвілін.

Дадаць астатні цукар, перамяшаць, варыць яшчэ 20 хвілін. Дастаць кавуновыя скарыначкі з сіропу. Дадаць у сіроп 3-4 гваздзікі. Дадаць сок і цэдру паловы лімона. Уварыць сіроп на павольным агні. Пакласці скарыначкі назад у сіроп.

Варыць скарыначкі да гатовасці, прыблізна 25—30 хвілін. Як толькі сіроп добра згусне, патрэбна здымаць рондаль з агню. Перакласці цукаты ў друшляк. Пакінуць на 5—10 хвілін, каб сцёк лішні сіроп. Падрыхтаваць паднос ці бляху, заслаць пергаментнай паперай.

Раскласці цукаты на пергаменце. Патрэбна каб цукаты міжсобку не зліпліся. Пакінуць цукаты пры пакаёвай тэмпературы на 2—3 дні, каб яны высахлі.

Захоўваць цукаты можна ў ёмістасцях для харчовых прадуктаў у цёмным месцы. Сіроп, які застаўся, можна захоўваць у халадзільніку. А скарыстаць, прыкладам, у якасці насычэння для тортаў.

да зместу

Пікантныя нарыхтоўкі з кавуна

Засолены кавун

Засолены кавун

Інгрэдыенты

  • Кавун – 1 шт
  • Часнок (на адзін слоік) – 5—6 зубчыка
  • Чорны перац (на адзін слоік) – 15—20 гарошын
  • Кроп свежы (на адзін слоік) – па смаку
  • Лімонавая кіслата (на адзін слоік) – ½ г л

Для расолу

  • Соль – 1,5 ст л
  • Цукар – 6 ст л
  • Вада – 1,5 л

Спосаб гатавання

Добра памыць кавун. Зрэзаць з кавуна зялёную лупіну. Парэзаць кавун на кавалачкі, якія праходзяць у слоік. Падрыхтаваць стэрылізаваныя банкі. Раскласці ў банкі часнок, чорны перац і кроп.

Паскладаць кавун у банкі. У рондалі закіпяціць ваду. Разліць кіпень па слоіках, напоўніць да краёў. Накрыць слоікі накрыўкамі і даць ім пастаяць 15 хвілін. Зліць ваду са слоікаў назад у рондаль. Ізноў прыкрыць банкі накрыўкамі. Паставіць рондаль з расолам на агонь.

Калі расол закіпіць, дадаць соль, цукар. Усё перамяшаць. Працягваць варыць 5 хвілін. Пакласці у слоікі лімонавую кіслату. Разліць расол па слоіках. Закатаць слоікі. Перавярнуць слоікі, пакінуць да поўнага астывання. Захоўваецца засолены кавун пры пакаёвай тэмпературы і ў халаднаватым месцы.

да зместу

Бочкавы кавун у слоіку

Бачкавы кавун у слоіку

Інгрэдыенты

  • Кавун – 1 шт
  • Перац востры (на адзін слоік) – ½ шт
  • Часнок (на адзін слоік) – 4 зубчыка
  • Базілік свежы (на адзін слоік) – 4 галінкі

Для расолу

  • Вада – 1 л
  • Соль – 2 ст л
  • Цукар – 1 ст л

Спосаб гатавання

Добра памыць кавун.  Парэзаць кавун на кавалкі, каб зручна было класці ў слоікі. Можна скарыстаць кавун з лупінай, а можна і без яе. Па магчымасці дастаць семачкі. Падрыхтаваць чыстыя слоікі. Пакласці ў слоікі па палове вострага перцу. Парэзаць ці надрэзаць часнок і раскласці па слоіках.

Раскласці па слоіках базілік. Паскладаць кавун у слоікі. Падрыхтаваць халодную чыстую ваду. Пакласці ў ваду соль і цукар. Усё добра перамяшаць, каб цукар і соль расталі, і заліць расол у слоікі. Закрыць слоікі пластыкавымі накрыўкамі.

Адразу слоікі лепш паставіць у ёмістасць. Калі кавун пачне кісліцца, вадкасць са слоікаў будзе ў яе выцякаць. Пакінуць слоікі на 3—4 дні пры пакаёвай тэмпературы. А пасля іх патрэбна паставіць у халадзільнік ці склеп. Калі доўга захоўваць банкі, прыкладам, у халадзільніку магчымасці няма, то можна закатаць слоікі і паставіць у халаднаватае памяшканне.

да зместу

Кіслы кавун

Кіслы кавун

Інгрэдыенты

  • Кавун – 1 шт
  • Вішнёвыя галінкі – 10 шт
  • Лісце хрэну
  • Лісце парэчкі

Для расолу

  • Вада – 1 л
  • Соль – 50 г
  • Цукар – 50 г

Спосаб гатавання

Падрыхтаваць вялікую ёмістасць, прыкладна, на 10—12 л. Патрэбна, каб кавун змяшчаўся ў яе цалкам. Тара павінна быць для харчовых прадуктаў. Добра памыць кавун.

Акуратна, не пашкодзіўшы плод, адрэзаць ад кавуна «хвосцік». Пакласці на дно тары вішнёвыя галінкі з лісцем. Калі няма вішняў, то можна скарыстаць галінкі парэчкі. Пакласці лісце хрэну, можна скарыстаць свежае ці сушанае. Пакласці лісце парэчкі.

У тару акуратна пакласці кавун. Для расолу падрыхтаваць ачышчаную ваду пакаёвай тэмпературы. Колькасць вады патрэбна рэгуляваць самастойна, янf будзе залежаць ад памераў тары. Лепш рабіць расол порцыямі. Прыкладам, адразу ўзяць 3 л вады. А пасля дадаваць.

У ваду дадаць цукар і соль. Іх прапорцыі патрэбна кантраляваць з разлікам 50 г кожнай спецыі на 1 л вады. То бок на 3 л вады спатрэбіцца 150 г цукру і 150 г солі. Памяшаць соль з цукрам у вадзе, каб яны расталі.

Заліць кавун расолам. Кавун павінен быць цалкам у расоле. Паставіць прыгнёт, каб кавун не ўсплываў. Прыкладна на 10 дзён пакінуць кавун пры пакаёвай тэмпературы. Пасля захоўваць ягаду трэба ў халаднаватым месцы. Праз 2 месяц ужо можна будзе спрабаваць кіслы кавун. Але захоўвацца ў расоле ён нашмат даўжэй.

да зместу

Кансерваваны кавун з мёдам

Кавун з мёдам

Інгрэдыенты

  • Кавун
  • Воцат (на адзін слоік 3 л) – 4 ст л.

Для расолу

  • Вада – 1 л
  • Соль – 1 ст л
  • Мёд – 1 ст л

Спосаб гатавання

Добра памыць ягаду. Лепш абраць не пераспелыя кавуны. Парэзаць кавун на такія кавалкі, каб было зручна іх класці ў слоікі. Зрэзаць лупіну, а семачкі даставаць не трэба.

Для расолу наліць ваду ў глыбокі рондаль, паставіць на агонь. Дадаць на літр вады сталовую лыжку солі, можна з горачкай, сталовую лыжку мёду. Давесці да кіпення. Калі расол закіпеў, зняць рондаль з агню. Аднаго літра расолу прыкладна хапіць на адзін трохлітровы слоік.

Раскласці кавун у стэрылізаваныя слоікі. Разліць расол па слоіках. Прыкрыць слоікі пракіпячонымі накрыўкамі. Стэрылізаваць поўныя банкі 20 хвілін.

Дастаць банкі пасля стэрылізацыі. Дадаць у кожны слоік па 4 сталовыя лыжкі воцату. Закатаць банкі.

да зместу

Напоі з кавуна

Некласічны кампот з кавуна

Некалсічны кампот з кавуна

Інгрэдыенты

  • Мякаць кавуна – 2 кг
  • Цукар – 2 шклянкі
  • Лімонавая кіслата – 2 г л
  • Вада – 5,5 л

Спосаб гатавання

Ваду ў рондалі паставіць на агонь. Пачакаць пакуль закіпіць. Мякаць кавуна без семачак парэзаць на сярэднія кубікі.

Напоўніць стэрылізаваныя слоікі мякаццю кавуна. Рэцэпт разлічаны на 2 слоікі па 3 літры. Перакладаць мякаць у слоікі лепш акуратна, каб кавалачкі на пашкодзіліся.

Заліць кіпень у слоікі. Накрыць слоікі накрыўкамі, пакінуць на 10 хвілін. Зліць ваду са слоікаў зноў у рондаль. Паставіць на агонь да закіпання.

Пакласці ў кожны слоік па 1 г. л. лімонавай кіслаты. Дадаць цукар, на адзін слоік 1 шклянку.

Накрыць слоікі накрыўкамі. Зняць рондаль з агню. Разліць вадкасць па слоіках. Закрыць слоікі накрыўкамі і закатаць.Перавярнуць банкі, ахінуць да поўнага астывання.

да зместу

Кавуновы сок

Кавуновы сок

Інгрэдыенты

  • Кавун – 8 кг
  • Лімонавая кіслата – 1 г л на 5 л соку
  • Цукар – 2 ст л на 1 л соку

Спосаб гатавання

Добра памыць кавун, разрэзаць. Адлучыць мякаць. Перабіць мякаць збівачом. Прапусціць кавуновую масу праз сіта. З кавуна ў 8 кг атрымалася 5 л соку. Колькасць соку залежыць ад сакавітасці кавуна. Пераліць сок у рондаль. Дадаць лімонавую кіслату. Дадаць цукар. Рэгуляваць колькасць цукру трэба на свой смак. На 5 л соку досыць 10 сталовых лыжак цукру.

Паставіць рондаль на агонь, накрыць накрыўкай і давесці да кіпення. Калі сок закіпеў, зняць пенку. Працягваць варыць сок 10 хвілін.

Зняць рондаль з агню. Пераліць сок у стэрылізаваныя слоікі, да краю горлачка. Накрыць слоікі стэрылізаванымі накрыўкаўмі. Закатаць слоікі. Слоікі перавярнуць, ахінуць і пакінуць да поўнага астывання.

да зместу

Як захаваць кавун свежым да Новага года?

Каб даведацца, як захаваць кавун свежым да зімы, давядзецца праверыць розныя спосабы. Некаторыя максімальна простыя, а іншыя патрабуюць сіл. Мы вырашылі расказаць пра тыя, якія апрабавалі да нас, і якія паказалі добры вынік.

Самы просты «працоўны» спосаб – падвесіць кавун у авосьцы ў памяшканні, якое добра ветрыцца, куды не трапляе сонца.

Кавун

 

Складанейшыя варыянты – захоўваць кавуны ў рысе, у попеле, у пяску. Для гэтага запатрабуецца знайсці зручныя кантэйнеры, каб ціск раўнамерна размяркоўваўся па ўсіх сценках. Кавуны патрэбна цалкам пагрузіць у крупы, пясок ці попел. Закрываць кантэйнеры не трэба. Найлепей захоўваць ёмістасці ў цёмным месцы пры пакаёвай тэмпературы.

Кавуны рэкамендуюць абіраць без расколін і ўхілін, таму што нават пры слушным захоўванні, плод менавіта ў гэтых месцах праз нейкі час пачне гнісці.

Неверагодна смачная ягада. Кавун — карысны ці шкодны насамрэч?

Як паказаў досвед, не дапамагае захаваць кавун воск, пераварочванне плода з боку на бок кожныя тры дні і замарозка. Ягада ці губляе густ ці псуецца.

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0