14.03.2021
14.03.2021

Ямо блінцы, даруем крыўды…

logo
Беларускі код
0 53
Памер шрыфта:
  • A
  • A
  • A

Ну вось неўпрыкмет і праляцеў-праімчаў Масленічны тыдзень. Памятаю, як даўней было цікава даведвацца, чым адметны кожны з гэтых сямі дзён. Сустрэча Масленіцы, Зайгрышы, Залоўкіны вячоркі… Дзесьці – атясамліваючы з рускімі традыцыямі, дзесьці – прыгадваючы сваё… І бліны мая мамачка абвязкова пякла – розныя. Па традыцыі сваёй роднай Смаленшчыны, колішняй беларускай яе часткі…

Масленіца. Даравальная нядзеля. Гатуем бліны!

Сёлета Масленічны тыдзень па шматлікіх прычынах увогуле прайшоў міма мяне… І засталіся толькі ўзгадкі пра Масленіцу і Даравальную нядзелю. Бо – сёння. І пра тое, што з 15 сакавіка для праваслаўных пачынаецца Вялікі пост.

Ні ў якім разе не прэтэндую на глыбокі аналіз і даследаванне беларускіх народных традыцый. Як не сцвярджаю, што ў пэўны дзень трэба абавязкова гэта рабіць, а гэта не рабіць, і будзе нам шчасце. Ва ўсім найчасцей элемент лёгкага чытання, для разгрузкі.

Не, мне, вядома, вельмі прыемна атрымліваць зваротную сувязь і даведвацца, што хтосьці штосьці пераняў альбо і так робіць ці збіраўся рабіць… Гэта насамрэч здорава! Не бачу нічога благога і ў тым, што кожны выбірае для сябе: альбо ісці ўслед за хрысціянскімі традыцыямі дня, альбо за паганскімі ўяўленнямі, альбо за пэўнымі дураслівымі традыцыямі прыдуманых святаў.

Масленіца. Даравальная нядзеля. Іншыя традыцыі.

Што ўжо казаць пра традыцыі ўласнай сям’і… Якія не абавязкова перадаюцца з пакалення ў пакаленне, бо ў чымсьці ўжо добра-такі састарыліся, аджылі. І не трымаем мы ў той жа гарадской кватэры сякеру альбо серп для пэўных рытуальных дзеянняў… Галоўнае, каб тыя традыцыі – старыя альбо новыя – увогуле былі. І аб’ядноўвалі.

У нашай сям’і ўжо шмат гадоў было прынята і пячы бліны на Масленіцу, і ўдзельнічаць у народных гуляннях, якія да пандэміі каранавіруса ладзіліся ў чэрвеньскім лесапарку сапраўды даволі шырока. Праўда, туды я найчасцей ішла як журналіст ці блогер, з мэтай – сфатаграфаваць і напісаць. А калі атрымлівалася яшчэ і расслабіцца, дык тое было хутчэй дадатковым бонусам.

Да гэтага часу прыгадваю прыгажэнную ляльку з бліноў, якую неяк давялося пабачыць. Мясцовую традыцыю Горкаўскай акругі пячы бліны на калодзе. Вясёлыя гульні і конкурсы для малых і дарослых. Асабліва смешна было назіраць, як людзі спрабавалі чапялою паставіць чыгунок у імправізаваную печку – з завязанымі вачыма…

Масленіца. Даравальная нядзеля. Народныя гулянні, конкурсы.

Памятаецца і рыжы кот, да якога я выходзіла з блінам, каб зрабіць адмысловы фотаздымак, які пасля ў раздзеле «Надвор’е» надрукавалі ў «Звяздзе»… Вы хочаце даведацца, ці дастаўся таму кату блін?! Вядома ж… І кату натуральна была Масленіца! 🙂

Што тычыцца хрысціянска-народнай традыцыі – прасіць прабачэння ў Даравальную нядзелю… Яна таксама была заведзеная ў нашай сям’і. І мне падаецца, што ў якой бы форме гэтае дзейства ні праходзіла, калі шчыра, ад душы і сэрца і прасіць, і дараваць, дык гэта пойдзе толькі на карысць.

Зрэшты, прымусіць сябе папрасіць прабачэння, нават калі сапраўды адчуваеш сябе вінаватым, – тое яшчэ выпрабаванне. А дараваць, калі сапраўды моцна пакрыўдзілі? Увогуле атрымліваецца не ва ўсіх. І далёка не адразу. Але паколькі крыўды і злосць разбураюць… Усё ж нам трэба навучыцца гэта рабіць. І сёння – добрая нагода, каб пачаць. Ці не так?!

Масленіца. Даравальная нядзеля. Просім прабачэння і даруем.

Дарэчы, калі людзі просяць даравання адзін у аднаго не віртуальна, а ў рэале, яны тройчы цалуюцца. Хаця падчас пандэміі асабіста я ад такой традыцыі ўстрымалася б… Ды і цалавацца ў масках няёмка! 🙂 А яшчэ старэйшыя павінны першымі папрасіць прабачэння ў малодшых.

Вядома ж, у век інтэрнэту гэтую традыцыю не маглі не выкарыстаць у сацыяльных сетках. І сёння для многіх станецца сапраўдным выпрабаваннем атрымліваць дзясяткі паштовак і віртуальных падарункаў з просьбай дараваць.

Ух, як я спачуваю тым, каго гэта вельмі раздражняе! 🙂 Мяне асабіста – не. Галоўнае – паспець усім разаслаць тое ж у адказ, каб не было крыўдаў. І я веру, што і ў гэтым выпадку Сусвет нас чуе, бачыць і множыць дабрыню.

Масленіца. Даравальная нядзеля. Акумулем дабрыню ў Сусвеце.

Так што даруйце, шаноўныя сябры, калі сваімі роздумамі ў блогу «Думкі ўслых» я кагосьці нейкім чынам уводжу ў зман. Шчыра жадаю ўсім здароўя, шчасця, дабрабыту, удачы. І – ямо блінцы, даруем крыўды!

Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by

0 53

Журналіст, блогер. Вышэйшая філалагічная адукацыя. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. З 2018 года – рэдактар, аўтар блога «Думкі ўслых» на сайце "Слушна".
Глядзіце таксама