Нават не верыцца, што гэта – апошні мой запіс сёлета ў блогу «Думкі ўслых». Па традыцыі апошняга часу, год Свінні праляцеў, бы яна, тая жывёліна, пераўвасобілася ў крылатага Пегаса! 🙂 А паколькі (традыцыйна ж) часу на падсумоўванне зробленага, важнага, удалага і не вельмі 30-га і 31-га снежня ў большасці з нас звычайна не стае, давайце зробім гэта сёння.
І найперш шчыра падзякуем адно аднаму за тое, што мы былі цэлы год разам! Нашы журналісты стараліся даваць вам, шаноўныя сябры, максімум карыснай, праўдзівай, грунтоўнай інфармацыі ад паважаных экспертаў на самыя розныя тэмы, звязаныя з хваробамі, іх пераадоленнем і папярэджаннем.
На інфармацыйным партале з’яўляліся аповеды пра людзей, якія і ў інваліднай калясцы працягваюць жыць поўным жыццём, натхняючы сваім прыкладам і аптымізмам іншых.
Разам з пацыенцкімі арганізацыямі мы таксама наведвалі мерапрыемствы, дзе маглі пабачыцца і паразмаўляць з іх удзельнікамі. І гэта здорава – яднацца, каб жыццё зрабілася хаця б крышачку лягчэйшым і лепшым.
Як рэдактар беларускай версіі нашага інфармацыйнага партала і кіраўнік групаў у сацыяльных сетках я шчыра дзякую за нашую трывалую сувязь, якую ад вас адчуваю.
Дзякуй усім, хто не шкадуе свайго часу, каб не проста прачытаць напісанае, але і паставіць падабайку, пракаментаваць упадабанае, падзяліцца ім з іншымі. Вашая падтрымка і дапамога, сябры, проста неацэнная!
Вельмі прыемна, калі ў групы ў сацыяльных сетках і наўпрост на інфармацыйны партал прыходзяць новыя людзі і застаюцца з намі.
Мая асобная падзяка – даўнім сябрам, якіх пазнаю па прозвішчах, імёнах, ніках, фотаздымках. І штораз радуюся, калі бачу, што вы неабыякава ставіцеся да матэрыялаў. Бо яны напісаныя для вас. Спадзяюся, што нашае сяброўства працягнецца і ў годзе наступным.
А ў нас будуць размяшчацца новыя цікавыя і карысныя матэрыялы, ладзіцца традыцыйныя анлайн-канферэнцыі. Рэдактары будуць працаваць над іх афармленнем, каб вам прыемна, зручна, а дзесьці і захапляльна (напрыклад, у блогу) было б іх чытаць.А якія тэмы і пытанні здароўя, здаровага ладу жыцця хвалююць асабіста вас?
Тлумачэнні ад якіх спецыялістаў хацелі б пабачыць на Слушна? Пішыце, калі ласка! І мы абавязкова выканаем вашыя пажаданні.
Год, які ўжо хутка сыйдзе ад нас, быў… Ён быў розным! Вясёлым і сумным, турботным і цікавым, з адценнямі шкадавання і ўдзячнасці… У кагосьці – з самымі сапраўднымі прыгодамі, у кагосьці (на жаль) – са стратамі… Давайце проста падзякуем яму за тое, што ён БЫЎ у нашым жыцці. І папросім у года наступнага, каб атрымаўся лепшым. Я не ведаю, ці спрацоўвае гэтае, але штораз загадваю і такое жаданне.
Няхай у новым 2020-ым годзе ў кожнага будзе ўсё: здароўе, шчасце, каханне, любоў, дабрабыт, праца, родныя побач і прыемныя людзі вакол. Пабольш усім сонечных дзён у жыцці, прыемных нечаканасцяў, а таксама веры і надзеі. Бо, як гучыць на самым пачатку апошняга фільма з серыі «Ёлак» вельмі слушнае, «Вера патрэбная ўсім».
І дзе б кожны з нас ні сустракаў Новы год, жадаю адчуць тыя самыя радасць, захапленне, шчасце, якія бываюць у чалавека толькі ў дзяцінстве.
Беражыце сябе і адно аднаго, сябры!
З надыходзячым Новым годам вас усіх – шчыра, ад душы! І да хуткай сустрэчы – 1-га студзеня 2020-га года. Магчыма, нават пад ёлачкай! Галоўнае – не пад сталом! 🙂
Матэрыялы на сайце slushna.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце slushna.by
