1 студзеня
01.01.2019

З Новым годам! З новым шчасцем!

logo
Думкі ўслых
180 0 34
Памер шрыфта:
  • A
  • A
  • A

«З новай шубкай! З новай шорсткай!» – жартаўліва дадаю звычайна я. Так ужо з дзяцінства палюбіліся гэтыя вітанні ад вавёрак з казкі Самуіла Маршака «12 месяцаў». З першым днём Новага года шчыра вітаю ўсіх прыхільнікаў сайта «Здаровыя людзі»!

Як настрой, сябры?! Спадзяюся, выдатны. З чаго пачаўся ваш дзень?! У мяне – традыцыйна, з кубачка духмянай кавы і самага навагодняга фрукта – мандарына!

Ну што ж, стары год, «сабачы», мы правялі. Новы год, «свінячы», сустрэлі. Усе паспелі загадаць жаданне пад перазвон гадзінніка?! А можа, нават і не адно? У чарговы раз шчыра зычу, каб на працягу 2019-га ўсё спраўдзілася.

Няхай вашы сябры будуць сапраўднымі людзьмі, а не свіннямі. А ў кожнага з вас будзе ўлюбёная справа, месца працы да душы, трывалы дабрабыт, блізкія людзі побач.

А ўсё ж такі гэта вельмі прыемная прыдумка, што з першага дня новага года можна калі не ўсё, дык шмат чаго пачаць наноў, праўда?! І ў гэта насамрэч хочацца верыць. І не мае значэння, што размова ідзе ўсё больш пра ўяўнае, чым пра сапраўднае. Новы год дорыць нам новыя НАДЗЕІ, і гэта цудоўна!

Вось калі не з сёння, дык з заўтра мы абавязкова пачнём больш уважліва сачыць за сваім здароўем. А можа, зробім нават ранішнюю зарадку (нарэшце!!!) штодзённай справай. Ці хаця б штотыднёвай – звычку наведвацца ў спартзалу. Альбо басейн, калі ёсць такая магчымасць.

Мы пачнём больш уважліва ставіцца да сваіх блізкіх, асабліва састарэлых. Не раздражняцца па дробязях, а ўважліва выслухоўваць, дзяліць іх перажыванні. Мы ж так многім ім абавязаны... Трэба толькі зрабіць намаганне і хаця б крыху перайначыцца...

А для гэтага і нагода ёсць – Новы год! Абсалютна новы! Асаблівы, адзіны, адметны, адмысловы... Які больш ніколі не паўторыцца. І ён будзе для нас такім, якім мы яго зробім самі. Ну, і крыху ўдачы адтуль, зверху, таксама не пашкодзіць...

Спадзяюся, што за гэтыя тры дні вы не дужа стаміліся – ад прыгатавання, святкавання ды вяселля. І заўтра з новымі сіламі (у новым годзе!) мы прыйдзем на працу. І ўсё ў нас будзе атрымлівацца як найлепш. І гэтага вам таксама шчыра жадаю.

А святкаванні ж на гэтым не заканчваюцца! Наперадзе праваслаўнае Нараджэнне Хрыстова, Каляды, Стары Новы год, Васілле, Вадохрышча... Святы як царкоўныя, так і народныя. І кожны будзе святкаваць так, як лічыць патрэбным. Галоўнае, памятаць, што здароўе за грошы не купіш. І што добра было б знайсці час, каб задумацца не толькі пра матэрыяльнае, але і пра маральнае, духоўнае. Асабліва падчас светлага свята Раства...

Гэта ўсё чакае нас зусім хутка. Ну, а пакуль у нас яшчэ – Новы год! Таму віншуемся найперш з ім. А таксама з Днём народзінаў усіх, хто іх святкуе ў ноч з 31-га снежня на 1-га студзеня альбо непасрэдна сёння.

І лёгкага заўтра ўсім нам першага ў новым годзе працоўнага дня!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

180 0 34

Рэдактар сайта, журналіст, блогер. Вышэйшая філалагічная адукацыя. Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень. У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка». У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых». З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.). Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.