2 Снежня
02.12.2018

Навошта патрэбны пілінг?

logo
50+ Другое дыханне
94 0 82
Памер шрыфта:
  • A
  • A
  • A

Як часта неабходна рабіць пілінг? Ці могуць быць пабочныя эфекты пасля эксфаліяцыі? Пачырваненне і лушчэнне – гэта норма? Ці патрэбны пілінг маладой скуры? На гэтыя і іншыя пытанні, якія тычацца правядзення пілінгу, яго відаў, правілаў догляду скуры пасля салоннай працэдуры, адказала эксперт інфармацыйнага партала Здаровыя людзі, практыкуючы ўрач, касметолаг, выкладчык, трэнер прафесійных касметычных марак Вольга Петрашэвіч.

Што такое пілінг?

Назва «пілінг» паходзіць ад англійскага «to peel», што ў перакладзе азначае «чысціць, скрэбці, ашкурваць» і нават «здзіраць лупіну». Сінонім – «эксфаліяцыя», што азначае ачышчэнне або выдаленне змярцвелых часцінак верхняга слою скуры. Менавіта яны з'яўляюцца прычынай пагаршэння колеру твару і няроўнасці тону. З дапамогай эксфаліяцыі можна дамагчыся не толькі паляпшэння колеру твару і структуры скуры, але і вырашыць дробныя касметычныя праблемы – пасля працэдуры дробныя маршчынкі будуць выглядаць менш ярка.

Праводзіць пілінг варта курсам ад 6 да 8 працэдур (усё залежыць ад стану скуры і жаданага канчатковага выніку). Такая колькасць звязана з тым, што клеткі скуры абнаўляюцца прыкладна 1 раз у 28 дзён. З дапамогай эксфаліяцыі адбываецца стымуляцыя абнаўлення клетак. Менавіта дзякуючы гэтаму скура будзе выглядаць больш прывабнай, свежай і памаладзелай.

 
Вольга Петрашэвіч
Урач-касметолаг
Клеткі эпідэрмісу абнаўляюцца рэгулярна. У маладым узросце гэты працэс асабліва не мае патрэбы ў дадатковым стымуляванні. Аднак ужо пасля 25 гадоў пачынаецца так званае фотастарэнне (змяненне стану і структуры скуры): працэсы паступова запавольваюцца, ачышчэнне змярцвелых часцінак адбываецца менш эфектыўна. Таму пілінг неабходны, каб пазбавіць скуру ад «грузу» адмерлых часцінак.

Скраб або ўльтрагук? Віды пілінгу

Існуюць розныя віды пілінгу:

  • Механічны (скраб або гамаж). Для выдалення арагавелага слоя эпідэрмісу выкарыстоўваюцца абразіўныя часціцы (напрыклад, здробненае шкарлупінне арэхаў, дробны пясок, поліэтыленавыя гранулы).
  • Хімічны. На скуру наносяцца спецыяльныя растворы, якія змяшчаюць АНА-кіслоты, дзякуючы дзеянню якіх адбываецца выдаленне змярцвелых клетак.
  • Ультрагукавы. Пры дапамозе апарата, у рабоце якога задзейнічаны высокачастотныя ваганні гукавых хваляў.

  • Лазерны. Уздзеянне лазернага патоку.
  • Ферментны (энзімны). Гэта павярхоўны пілінг, пры якім у якасці актыўнага рэчыва выступаюць ферменты.
  • Газавадкасны. З'яўляецца бескантактавай працэдурай, пры якой уздзеянне адбываецца з дапамогай сціснутага газу і вадкасці ў выглядзе лячэбнага раствору.
 
Вольга Петрашэвіч
Урач-касметолаг
Любы від пілінгу робіць тонкім рагавы слой скуры, выдаляе дробныя камедоны, палягчае доступ пажыўных рэчываў у больш глыбокія слаі эпідэрмісу, узмацняе дзяленне клетак. У выніку скура становіцца гладкай, светлай, набывае больш здаровы і малады выгляд.

Адным з самых запатрабаваных відаў пілінгу ў касметалогіі з'яўляецца хімічны. Існуе тры яго разнавіднасці:

  • павярхоўны. Гэта самы бяспечны вiд пілінгу. Працэдура закранае толькі верхні пласт скуры, для дасягнення эфекту выкарыстоўваюцца АНА-кіслоты (гліколевая, яблычная, цытрынавая, вінная і г.д.);
  • сярэдні. Гэта больш агрэсіўны метад уздзеяння на скуру, таму і эфект, у адрозненне ад павярхоўнага, выяўлены ярчэй. Для яго выканання таксама выкарыстоўваюць розныя кіслоты. Самастойна праводзіць яго катэгарычна нельга, інакш замест прыгожага колеру твару можна атрымаць апёк. Такі тып эксфаліяцыі патрабуе абавязковага выканання ўсіх рэкамендацый па аднаўленні скуры;

  • глыбокі. Уздзеянню падвяргаюцца глыбокія слаі скуры. Гэта даволі балючая працэдура і выконваецца толькі ў медыцынскіх установах па строгіх паказаннях.

Паказанні і супрацьпаказанні. Магчымыя пабочныя рэакцыі

Па словах Вольгі Петрашэвіч, пілінг паказаны практычна ўсім. Разам з тым, кожны від працэдуры дазваляе вырашыць пэўны спектр праблем.

Да агульных рэкамендацый для ўсіх метадаў ачышчэння адносяцца:

  • узроставыя змены скуры, ліквідацыя маршчын;
  • няроўнасць рэльефу скуры, рубцы, гіперкератоз (празмернае патаўшчэнне рагавога слою скуры), вугравы сып і яго наступствы;
  • аднаўленне эластычнасці і паляпшэнне тонусу скуры;
  • асвятленне пігментацыі;
  • прафілактыка старэння скуры.

Эксфаліяцыю выконваць нельга ў выпадку:

  • цяжарнасці і кармлення грудзьмі;
  • інфекцыйных захворванняў і ВРІ, пры павышанай тэмпературы цела;
  • абвастрэння існуючых скурных захворванняў (дэрматыт, экзэма, псарыяз);
  • алергіі;
  • цукровага дыябету;
  • герпесу ў актыўнай стадыі;
  • наяўнасці аўтаіммунных захворванняў;
  • індывідуальнай непераноснасці кампанентаў сродкаў для пілінгу.
 
Вольга Петрашэвіч
Урач-касметолаг
Існуюць як абсалютныя, так і адносныя супрацьпаказанні. У выбары працэдуры і метаду ўздзеяння для паляпшэння якасці скуры патрэбны індывідуальны падыход.

Напрыклад, пасля эпіляцыі, як лазернай, так і механічнай, пілінг можна выконваць толькі праз 7 дзён. Пасля ўжывання вонкавых мазяў для лячэння скурных высыпанняў (у прыватнасці, прэпаратаў на аснове ретыноідаў) – не раней, чым праз тыдзень. Пасля прыёму прэпаратаў ізатрэтынаіну – толькі праз 6 месяцаў.

Пасля пілінгу магчымыя пабочныя рэакцыі:

  • абвастрэнне герпетычнай інфекцыі,
  • абвастрэнне дэрматытаў,
  • развіццё працяглай эрытэмы (пачырванення скуры),
  • гіперпігментацыя,
  • з'яўленне рубцоў.
 
Вольга Петрашэвіч
Урач-касметолаг
Верагоднасць пабочных з'яў вышэй пасля правядзення сярэдніх пілінгаў. Напрыклад, скура была не падрыхтаваная да правядзення працэдуры (перадпілінгавая падрыхтоўка) і не былі выкананыя рэкамендацыі спецыяліста па догляду скуры пасля працэдуры (постпілінгавая рэабілітацыя).

Дарэчы, пачырваненне і лушчэнне скуры пасля пілінгу – гэта не пабочная рэакцыя, а норма. Як правіла, пры належным доглядзе пачырваненне праходзіць праз 1-3 гадзіны, лушчэнне – праз 7-10 дзён.

Пра тое, як трэба рыхтавацца да правядзення пілінгу і як даглядаць скуру пасля працэдуры, чытайце ў нашым наступным матэрыяле.

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

94 0 82

Нарадзілася і жыву ў Мінску. У 1995 годзе скончыла сталічную сярэднюю школу №168, затым паступіла ў Беларускі дзяржаўны ўніверсітэт на факультэт журналістыкі. Пасля заканчэння вучобы ў 2000 годзе была размеркаваная ў Беларускае тэлеграфнае агенцтва (БелТА), дзе 8 гадоў прапрацавала спецыяльным карэспандэнтам аддзела палітычнай і сацыяльнай інфармацыі. У розныя гады асвятляла падзеі ў сферы навукі, культуры, адукацыі і аховы здароўя. У 2011 годзе перайшла ў прэс-службу Міністэрства аховы здароўя. Кола маіх абавязкаў уключала, у тым ліку арганізацыю сустрэчаў спецыялістаў са СМІ, складанне прэс-рэлізаў, забеспячэнне журналістаў інфармацыяй пра дзейнасць сферы аховы здароўя, а таксама падрыхтоўку аператыўных каментароў экспертаў і фарміраванне стужкі навінаў афіцыйнага сайта міністэрства. З 2017 года працую ўласным карэспандэнтам аддзела інтэрнэт-праектаў рэдакцыі газеты «Медыцынскі веснік». З'яўляюся аўтарам публікацый на інфармацыйным партале «Здаровыя людзі» і сайце для падлеткаў «Teenage.by».
Глядзіце таксама