15 Лютага
15.02.2020

Жаночы рак: як нармалізаваць флору кішэчніка пасля апраменьвання

logo
Навiны
274 0 61
Памер шрыфта:
  • A
  • A
  • A
Пры прамянёвай тэрапіі вобласці жывата пакутуе нармальная флора кішэчніка. Таму можа турбаваць уздуцце жывата, рэзі, парушэнні стулу. Распавядзём, як пазбавіцца ад гэтых ускладненняў. Працяг. Пачатак тут і тут.

Чаму важна аднавіць мікрафлору

Ад стану кішэчніка залежыць наша здароўе, даўгалецце, бо менавіта там адбываецца ўтварэнне і ўсмоктванне неабходных арганізму рэчываў, абясшкоджванне і вывядзенне ўсяго, што адпрацавана і ўяўляе небяспеку.

Кішэчнік населены карыснымі мікраарганізмамі, прычым ільвіная іх доля сканцэнтраваная ў тоўстай кішцы. Тонкая кішка амаль вольная ад мікраарганізмаў альбо змяшчае вельмі малую колькасць у ніжніх аддзелах. У тонкай кішцы адбываецца расшчапленне і ўсмоктванне пажыўных рэчываў, неабходных для пабудовы органаў і тканак.

Мікраарганізмы кішэчніка стабілізуюць нашу імунную сістэму, тармозяць узнікненне пухліны тоўстай кішкі за кошт скарачэння працягласці кантакту адходаў (канцэрагенаў) з яе сценкамі.

Дысбактэрыёз. Стан кішэчніка.

Асобныя харчовыя прадукты з’яўляюцца стымулятарамі росту карысных бактэрый за кошт утрымання фруктозы. Гэта часнок, цыбуля, чарамша, памідоры, бананы і пшаніца.

Супрацьпухлінная тэрапія, на жаль, згубна ўздзейнічае на нармальную мікрафлору кішэчніка. Любое спецыяльнае ўздзеянне (хіміятэрапія, гарманальнае лячэнне, прамянёвая тэрапія і антыбіётыкатэрапія) падаўляе рост нашых карысных «сужыцеляў» у тоўстай кішцы, што спрыяе размнажэнню іншых мікробаў, якія трапілі звонку з ежай і вадой або знаходзіліся ў кішцы ў неактыўным стане. Прычым частка з іх (сінегнойная палачка, стафілакок, пратэй, дражджавыя грыбы, энтэракокі) устойлівыя да лекавых антымікробных прэпаратаў.

У большасці выпадкаў парушаная экалогія тоўстай кішкі аднаўляецца самастойна. Але не ў людзей з паніжаным узроўнем імунітэту пасля прамянёвай або лекавай тэрапіі раку. Часта з’яўляюцца клінічныя сімптомы дысбактэрыёзу.

Дысбактэрыёз.

Што такое дысбактэрыёз? Гэта парушэнне раўнавагі мікрафлоры кішэчніка: «няправільныя» мікраарганізмы з’яўляюцца там, дзе іх у норме быць не павінна, – у тонкай кішцы, і памяншаецца колькасць «правільнай» мікрафлоры, г.зн. той, што жыве ў здаровага чалавека ў тоўстай кішцы. Гэта прыводзіць да з’яўлення ў кішэчніку небяспечных і агрэсіўных бактэрый. Вобразна кажучы, там з’яўляецца вораг. Пакуль вы не адновіце нармальную мікрафлору, ніякія таблеткі не дапамогуць, бо не могуць нармальна ўсмоктвацца сценкай кішэчніка з-за «вайны», якая там разгарэлася.

Дысбактэрыёз, які ўзнік, можа працяглы час не выяўляцца або даваць вельмі бедную сімптаматыку. Крайняй ступенню дысбактэрыёзу з’яўляецца з’яўленне паталагічных кішэчных мікраарганізмаў у крыві (бактэрыямія) або развіццё сэпсісу.

Прыкметы дысбактэрыёзу

Дысбактэрыёз.

Першая група сімптомаў звязаная з работай органаў страўнікава-кішэчнага тракта:

  • няўстойлівы стул, пастаянныя запоры ці паносы;непрыемны пах з рота;
  • пастаяннае аддзяленне газаў;
  • буркатанне ў жываце;
  • уздуцце жывата;
  • пачуццё голаду.

Другая група прыкметаў агульнага характару:

  • слабасць;
  • нервовасць;
  • шэры колер твару;
  • выпадзенне валасоў;
  • дэфармацыя (скрыўленне) пазногцяў.

На жаль, з’яўляюцца гэтыя сімптомы тады, калі барацьба ідзе на ўсю моц і хвароба ўжо набыла хранічнае цячэнне. Таму лячэнне павінна быць доўгім і ўпартым. У гэтых выпадках мэтазгодна звярнуцца да анколага, а затым гастраэнтэролага па месцы жыхарства, каб зрабіць аналіз кішэчнага змесціва для высвятлення, якія бактэрыі ў ім «жывуць» і як мэтанакіравана ажыццявіць аздараўленне экалогіі гэтага важнага органа.

Якія сродкі дапамогуць

Дысбактэрыёз. Лячэнне.

Для барацьбы з «няправільнымі» бактэрыямі ў дапамогу рэшткам нармальнай мікрафлоры кішэчніка выкарыстоўваецца прэпарат «Біяфлор». Гэта натуральны прадукт з жывымі кішэчнымі палачкамі і біялагічна актыўнымі рэчывамі асяроддзя, у якім яны выраслі (экстракты соі, гародніны і пропалісу). Гэты прэпарат у выпадку праведзенага супрацьпухліннага лячэння трэба прымаць па 1 дэсертнай лыжцы 2-3 разы на дзень за 30 хвілін да ежы або праз 2 гадзіны пасля ежы на працягу 1-3 месяцаў.

Як ён дзейнічае? Біяфлор падаўляе і выцясняе патагенныя (шкодныя для арганізма) мікраарганізмы, нармалізуе імунітэт за кошт сінтэзу імунаглабулінаў, лізацыму, інтэрферону і інш., прадуцыруе ферменты (пратэазы, амілазы, ліпазы і інш.) для стрававання, удзельнічае ў сінтэзе вітамінаў (В1, В2, В16, В12 і інш.), амінакіслотаў, абясшкоджвае прадукты абмену.

Увага! У рэдкіх цяжкіх выпадках дысбактэрыёзу ў першыя дні прыёму прэпарата можа ўзмацніцца газаўтварэнне і ўзнікнуць боль. Тады трэба ўводзіць Біяфлор у мікраклізмах на працягу 1-2 тыдняў. Мікрафлора ў тоўстым кішэчніку нармалізуецца, і можна пачынаць прыём праз рот спачатку па 1 чайнай лыжцы, а потым павялічыць дозу.

Іншы натуральны прэпарат для барацьбы з дысбактэрыёзам – біфідумбактэрын. Сухі біфідумбактэрын – гэта высушаныя жывыя насельнікі тоўстай кішкі. У цяпле гэтыя бактэрыі ажываюць і ўключаюцца ў барацьбу супраць шырокага спектру патагенных і ўмоўна патагенных мікраарганізмаў, тым самым нармалізуючы мікрафлору кішэчніка.

Добра дапамагае і вадкая форма біфідумбактэрыну, але ў яе малы тэрмін прыдатнасці. Таму можна набыць прэпарат у флаконах па 5 дозаў. Прымаць яго трэба па 5 дозаў 3 разы на дзень за 20 хвілін да ежы, доўгі час (1-2 месяцы).

Ёсць яшчэ адзін «жывы» прэпарат падобнай уласцівасці. Гэта лактабактэрын, які змяшчае высушаныя малочнакіслыя бактэрыі. Прымаць яго варта таксама па 5 дозаў 3 разы на дзень. Можна адначасова з біфідумбактэрынам.

Усе тры прэпараты не маюць ніякіх супрацьпаказанняў і не выклікаюць пабочных эфектаў, бо ўтрымліваюць элементы зусім натуральнай мікрафлоры кішэчніка. З названай серыі ёсць яшчэ іншыя карысныя лекі: калібактэрын, лінэкс і інш.

Асаблівы рэцэпт

Як вы ўжо зразумелі, прыём гэтых прэпаратаў павінен быць доўгім. Прычым мэтазгодна на працягу 1,5-2 гадоў курсы лячэння паўтараць (кожныя 0,5 года). Так што выдаткі немалыя. Таму прыводжу вельмі просты, танны і эфектыўны спосаб барацьбы з дысбактэрыёзам з дапамогай часнаку і малочнай сыроваткі.

Вядома, што часнок забівае шкодныя для кішэчніка бактэрыі, а сыроватка выкарыстоўваецца для «гадоўлі» карысных бактэрый. Пітво рабіце так.

Негатаванае, пажадана хатняе малако сквашвайце, як звычайна, скарыначкай жытняга хлеба ў цяпле. Сыраквашу падагрэйце на слабым агні, астудзіце і адкіньце тварог (яго з’ешце на здароўе). Астатнюю сыроватку захоўвайце ў халадзільніку да 5 дзён. Прымайце раніцай нашча па 1 шклянцы, у якую перад прыёмам дробна нарэжце 1 зубчык часнаку. Курс лячэння – 10 дзён. Потым перапынак 7 дзён. І гэтак далей. Увага! Трэба ўдакладніць, ці пераносіце вы часнок.

Дысбактэрыёз. Лечым сыроваткай з часнаком.

Не апошнюю ролю ў падтрыманні здаровай мікрафлоры кішэчніка адыгрывае наша ежа. Што спрыяе нашым карысным мікробам? Ёсць такое хатняе пітво (і лекі) – чайны грыб і японскі грыб. Гэтыя напоі з’яўляюцца крыніцамі малочнакіслых бактэрый, якія, у прыватнасці, нармалізуюць флору і ўзмацняюць імунітэт. Тое, што патрабуецца! Але грыб добры для здаровых людзей і пры лёгкім дысбактэрыёзе. А ў цяжкіх выпадках захворвання можа служыць дадаткам паміж курсамі спецыяльнага лячэння дысбактэрыёзу.

Хачу падкрэсліць, што гародніна-садавіна і гарбата спрыяюць нармалізацыі экалогіі кішэчніка, а багатая тлустая мясная ежа – наадварот.

Вельмі карысныя кісламалочныя прадукты з біфідафлорай. Напрыклад, біякефір, актывіл і г.д. Вядома, бывае, што ўведзеная ў малочныя прадукты мікрафлора хутка гіне пры незахаванні ўмоў транспарціроўкі і захоўвання. І ўсё ж такі карысныя нават прадукты іх жыццядзейнасці, якія застаюцца ў кефіры.

Дысбактэрыёз. Біфідакефір.

Чытайце ў наступным артыкуле: Як працуе хіміятэрапія? Як знізіць яе негатыўны ўплыў на арганізм? Ці можна пазбегнуць страты валасоў?

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

274 0 61

Урач-анколаг, доктар медыцынскіх навук, прафесар, начальнік Адукацыйнага цэнтра РНПЦ анкалогіі і медыцынскай радыялогіі імя М.М.Аляксандрава
Наверх