10.01.2020
10.01.2020

Зіма… Марожанае ці глінтвейн… безалкагольны?

logo
Думкі ўслых
278 036
Памер шрыфта:
  • A
  • A
  • A
Не скажу, што з зайздрасцю пазіраю на тых, хто і ўзімку пры мінусавой тэмпературы з бачным задавальненнем есць на вуліцы марожанае. Хутчэй, са здзіўленнем гляджу. Няўжо не халодна?! Няўжо не баяцца захварэць?! Бо зразумела ж, што ў ахалоджаным роце і паветра, што ўдыхаецца, будзе пачувацца халаднейшым…
Гарачае-халоднае. Што выбраць узімку. Марожанае.

З іншага ж боку, калі на якім кірмашы (прыгадваю Львоў) ці яшчэ дзе вып’еш кубачак глінтвейну… Напачатку быццам сагравае, а пасля – зноўку ніякіх плюсаў (цалкам суб’ектыўнае меркаванне).

Вось і задаешся пытаннем: а якой тэмпературы ежа найбольш карысная ўзімку? Халодная (ледзяная)? Гарачая (толькі каб не абпякала)? Альбо цёплая? І ад якой не будзе наетых бакоў, асабліва падчас святаў?

Ну, з бакамі, здаецца, усё зразумела. Залежыць не ад тэмпературы, а ад колькасці з’едзенага, яго каларыйнасці, адсутнасці належнай фізічнай актыўнасці. Тады – ага, зіма вінаватая, што мы паправіліся. А ўласная лянота ды ляжанне на канапе замест элементарных прагулак – ой, што вы, што вы, не мае да лішніх кілаграмаў ніякага дачынення.

Гарачае ці халоднае. Узімку трэба не сядзець на канапе з поўнай талеркай.

Вучоныя і даследчыкі да гэтага часу спрачаюцца наконт тэмпературы ежы. І ў кожнага знаходзяцца свае аргументы. Таму прыслухоўваемся да тых, да іншых і… да ўласнага арганізма. Вось самы строгі крытык! На што зрэагуе, тое і бяром на ўзбраенне.

Памятаеце, як не так даўно нам раілі піць халодную ваду, есці марожанае ды іншыя ахалоджаныя стравы, нават узімку? Маўляў, арганізм спальвае на іх перапрацоўку-засваенне нашмат больш калорый. І мы, дзесьці крывячыся, старанна пілі тую самую халодную ваду…

А што ж нам кажуць даследчыкі?! Што халодныя ежа-пітво, наадварот, тармозяць працэс ператраўлівання ды яшчэ могуць выклікаць энтэракаліт, расстройства страўніка, павышанае газаўтварэнне… А калі ёсць прывычка запіваць з’едзенае халоднай вадой, дык такім чынам арганізм пазбаўляецца ад атрыманых з ежай бялкоў і ўгляводаў, бо яны проста не засвояцца! Спрэчнае меркаванне?! Ну, не ведаю. Я задумалася…

Гарачае-халоднае. Ці запіваць ежу халоднай вадой.

Дык што ж, скажаце вы,  марожанае не есці?! Ды не, можна. Толькі ў меру і лепей – удзень. Бо раніцай метабалізм яшчэ не разагнаўся, а ўвечары ён ужо «стаміўся» і запаволіўся… Так што калі прастудныя захворванні вам не пагражаюць – смачна есці!

А што ж наконт гарачага?! Ды тое ж самае практычна: усё – у меру. Каб не абпячы рот і не зарабіць ацёк стрававода. Спецыялісты раяць спажываць ежу і пітво, нагрэтыя да тэмпературы 36-40 градусаў. Не, пхаць тэрмометр у суп не трэба. Дастаткова капнуць з лыжкі кроплю вадкасці на запясце. Пры 36 градусах вы не адчуеце ні холаду, ні гарачыні, а пры 40 павінна быць горача, але не да стану апёку.

І, зразумела ж, гарачае і халоднае разам ці па чарзе за адзін прыём ежы – не, не і яшчэ раз не, кажуць даследчыкі. Церпіць метабалізм – раз, стрэс для арганізма – два, праблемы з зубамі – тры!

Гарачае-халоднае. Разам нельга!

Але калі з такой зімы, як зараз, мокрай і сырой, вяртаешся дахаты, ды яшчэ ў маршрутках, у якіх, відаць, з мэтай эканоміі цяпло не падаюць… Так хочацца чымсьці сагрэцца… І гэта стопрацэнтна не алкаголь! Хаця глінтвейн, вядома ж, – і смачна, і сагравальна… Дома. Калі толькі віно не дужа вялікай моцы. А лепей і зусім безалкагольны. Напрыклад, з вінаградным сокам.

Інгрэдыенты:

  • вінаградны сок – 1 літр;
  • вада – 1 шклянка;
  • цэдра лімонная – 1 ст.л.;
  • апельсін – 1 шт.;
  • яблык – 1 шт.;
  • гваздзік – 3 шт.;
  • перац духмяны – 3-4 шт.;
  • імбір – ½ ч.л.;
  • карыца – ½ ч.л.;
  • кардамон – 1/4 ч.л.

Вядома ж, прапорцыі можна змяншаць.

Прыгатаванне:

  1. Апельсін і яблык нарэзаць невялікімі кавалачкамі.
  2. Каструлю з вадой крыху нагрэць.
  3. Апусціць туды ўсе прыправы.
  4. Дадаць вінаградны сок, апельсін, яблык і цэдру лімона.
  5. Пагрэць яшчэ (можна да кіпення), зняць з пліты.
  6. Пакінуць пад накрыўкай хвілін на 20 (лепей у цёплым месцы, каб не астыла; я пакідала на 10 хвілін).

Гарачае-халоднае. Вінаградны безалкагольны глінтвейн.

Смачна есці і піць – з задавальненнем і карысцю для здароўя!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

278 0 36

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.