09.02.2021
09.02.2021

Знайсці СВАЙГО стаматолага, альбо З Міжнародным днём!

logo
Думкі ўслых
316 059
Памер шрыфта:
  • A
  • A
  • A

Здаецца, самы невыносны боль – гэта зубны. Той, што доўга трываць немагчыма. І тады ты ўжо не думаеш: страшна-не страшна ў стаматалагічным крэсле, будзе балець мацней ці не… Тады ты імчыш да стаматолага ледзьве не бегма! Толькі каб пазбавілі ад гэтай невыноснасці… Толькі каб адпусціла… А пасля – фуу-у-у-у-у… Выдыхаеш… Адчуваеш такое агромністае проста шчасце ад таго, што не баліць!!! І… Часцяком зноўку не ідзеш да ўрача. Ажно да наступнага разу.

Стаматалогія. Страшна лячыць зубы.

Пазналі ў гэтым апісанні сябе?! 🙂 Я дык – дакладна. Вось шчыра: захапляюся тымі людзьмі, хто наведвае стаматолага рэгулярна. Столькі разоў на год, колькі патрэбна. А то і яшчэ часцей. Магчыма, калі б у свядомым узросце я б мела яшчэ добрыя зубы, рабіла б гэтак жа... Але ўлічыўшы маю дзіцячую любоў да салодкага… Як кажуць, пакуль не стане невыносна. Хаця, вядома ж, трэба мяняцца. Трэба. Тым больш, што зараз і выбар па кошту-якасці велізарны. Былі б грошы. А яшчэ так важна знайсці СВАЙГО стаматолага...

У нас у дзяцінстве ён «знайшоўся» сам. Бо не было тады платных стаматалагічных паслуг. Не было і шырокага выбару зубных пастаў, зубных шчотак… Яшчэ і дэфіцытам яны часцей за ўсё былі! А весткі пра добрага стаматолага ў невялікім гарадку Чэрвені разыходзіліся хутка. Ды і існаваў жа абавязковы агляд дзіцячых зубоў у школах. А мне са стаматолагам і ўвогуле давялося пазнаёміцца рана.

Стаматалогія. Савецкая стаматалогія.

Ніна Міхайлаўна Шут. Светлая ёй памяць. Ужо колькі часу прайшло з тых школьных гадоў, а мне і дагэтуль усё памятаецца так яскрава. Гэта быў сапраўды стаматолаг ад Бога, які умеў загаворваць зубы і ў прамым, і ў пераносным сэнсе.

Строгая – і ў той жа час добрая. Праўдзівая ў сваіх апісаннях: «Ну вось яшчэ крышачку пасвярлю – і ўсё…» Ніякай замарозкі! Усё нажывую! Тое «пасвярлю» ў нерв і – прама ў мозг іголкай! Здавалася… Такім было лячэнне зубоў у правінцыйным гарадку ў 1980-х.

І ўсё роўна ж Ніна Міхайлаўна дзесьці падманвала… З часам, на які зацягвалася выдаленне нерва, свярленне, чыстка... Што «вось-вось – і ўсё». Але гэта не крыўдзіла. Наадварот, былі ўдзячныя за той падман. І – давяралі. Хаця ўсё роўна трэсліся, калі да стаматолага было – трэба.

Стаматалогія. Лячэнне зубоў у СССР.

Ужо колькі гадоў Ніны Міхайлаўны няма, а я не-не ды прыгадаю яе. З удзячнасцю. Памятаю яе воблік, памятаю яе рукі. Як яна дзе ўгаворвала, а дзе і строга так загадвала. Каб не ўздумала плакаць. Ну, а ўспомніць гэтую цудоўную жанчыну ў Міжнародны дзень стаматолага – святая справа…

У нашым Чэрвені платныя стаматалагічныя паслугі пачалі ўводзіць з 1999-га года. І тады ж хутка пачалі распаўсюджвацца чуткі-меркаванні, што там і матэрыялы лепшыя, бо платныя, і пломбы даўжэй стаяць. А галоўнае, зноў-такі, што стаматолаг вельмі добры.

Ала Станіславаўна Мядзведзева. Яна сталася для мяне другім СВАІМ стаматолагам. Добрая, мяккая, прыветная… І хаця мой страх перад стаматалагічным крэслам да таго часу нікуды не падзеўся, але да яе я ісці не тое каб не баялася… Не баялася – яе, а не стаматалагічных працэдур. І да гэтага часу стаўлюся з даверам, хаця і даўно не была на прыёме. Заўсёды прыемна сустракаць яе, такую жвавую і рухавую, на вуліцах Чэрвеня.

Стаматалогія. Ала Мядзведзева.

У свой час як журналіст распавядала пра Алу Станіславаўну, пра яе асабісты юбілей на старонках чэрвеньскай раёнкі.  Таму і ведаю, што першы свой практычны вопыт пасля заканчэння ВНУ яна набывала ў інтэрнатуры – на базе Магілёўскай паліклінікі №1. А затым былі два гады адпрацоўкі ў вёсцы Сухары. І – поўная адказнасць. Бо там Ала Мядзведзева была адзіным стаматолагам.

А затым ужо быў і застаецца – Чэрвень. Не адно дзесяцігоддзе працы. Агромністая колькасць вылечаных зубоў. Шмат падзяк, у тым ліку і праз раённую газету. Апрача таго, што Ала Станіславаўна – прафесіянал зубной справы, яна яшчэ і добры псіхолаг. Таксама і ўгаворвае пацыента, і зубы яму загаворвае!

Вядома ж, у кожнага чэрвеньца ёсць свае любімыя спецыялісты ў стаматалагічным аддзяленні. Як і ў кожнага, хто чытае гэтыя радкі, – у сваім горадзе. А можа, і не толькі ў сваім. Памятаю, як давялося ставіць металакерамічныя каронкі ў Мінску ў той час, калі толькі-толькі пачалі з’яўляцца прыватныя фірмы па аказанні такіх паслуг.

Стаматалогія. Прыватная стаматалогія.

Выбіраць асабліва не было з чаго. І адкладваць не было куды. Даверылася. І не пашкадавала! Якасць, правераная часам. Прычым абяцанае насамрэч значна пераўзышло чаканае!

Сёння, у Міжнародны дзень стаматолага, мы шчыра віншуем усіх, хто мае дачыненне да гэтай прафесіі! Здароўя, дабрабыту, удзячных пацыентаў, пабольш нагод для радасці, задавальнення ад зробленага!

Падпісвайцеся на наш канал у Telegram, групы ў Facebook, «УКантакце», у «Аднакласніках» – і будзьце ў курсе свежых навінаў! Толькі цікавыя відэа на нашым канале YouTube, далучайцеся!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

316 0 59

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.