17.05.2021
17.05.2021

Ноч музеяў, дзень музеяў… Даўніна нам сэрца грэе!

logo
Думкі ўслых
52 030
Памер шрыфта:
  • A
  • A
  • A

Так склалася, што і Міжнародны дзень музеяў, які штогод адзначаецца 18 мая, лічу сваім прафесійным святам, бо пэўны час працавала ў нашым – Чэрвеньскім раённым краязнаўчым. За амаль паўгода паспела навучыцца складаць навуковыя пашпарты экспанатаў па пэўнай форме. Паўдзельнічала ў падрыхтоўцы матэрыялаў да кнігі «Памяць. Чэрвеньскі раён». Распрацавала экскурсію для малодшых школьнікаў «Беларуская хата». Выпрабавала сябе ў ролі экскурсавода… Словам, музеі ў мяне выклікаюць самыя цёплыя пачуцці.

Музеі. Міжнародны дзей музеяў. Музей у Нясвіжскім палацы.

Цікава... А што адбываецца ў гэтых культурных установах уначы? Мо, калі дзесьці схавацца пасля закрыцця, дык можна ўбачыць, як ажываюць экспанаты?! Як паны і паненкі (спадары і спадарыні) ў старадаўніх строях шпацыруюць па залах, кружацца ў вальсе?! І даўніна, таемная і загадкавая, раптам наблізіцца на адлегласць выцягнутай рукі... Сапраўды, музейная рамантыка – катэгорыя асаблівая.

Спрабую падлічыць, колькі музеяў, а таксама старажытных палацаў, комплексаў наведала за апошніх гадоў дваццаць. Калі браць самыя значныя і рознапланавыя, беларускія і замежныя, лік падбіраецца пад трыццаць!
З пабачанага падчас вандровак па Беларусі прыгадваецца музей-сядзіба майго любімага беларуска-польскага паэта Адама Міцкевіча ў Завоссі і яго Дом-музей у Наваградку.

Музей у гонар Якуба Коласа ў Верхменскай школе Смалявіцкага раёна. Палацава-паркавы комплекс Агінскіх у Залессі. А якім запамінальным сталася наведванне музея старажытных рамёстваў і тэхналогій «Дудуткі» і Беларускага дзяржаўнага музея народнай архітэктуры і побыту, што ў Азярцы (раней арыентырам служылі Строчыцы)!

Музеі. Міжнародны дзень музеяў. Музей у Строчыцах.

Усім раю! Тут мімаволі адчуваеш дзівосную еднасць з продкамі. Мне пашчасціла пабываць у Мірскім і Нясвіжскім палацах яшчэ да іх рэстаўрацыі, калі ўся старажытнасць, няхай сабе і не параднага выгляду, была навідавоку.
Вельмі ўразілі ў свой час саляны музей у польскай Вялічцы на добрай такой глыбіні, піцерскія Эрмітаж і казематы Петрапаўлаўскай крэпасці, своеасаблівы музей на вадзе – крэйсер Аўрора, Пецяргоф.

Вежа Гедэмінаса ў Вільнюсе… Музей бурштыну ў літоўскай Паланзе… Парыжскія Луўр і Версаль, суперсучасны «Крыштальны свет Свароўскі» каля Інсбрука ў Аўстрыі… Італьянскія музей у Ватыкане і галерэя Уфіцы ў Фларэнцыі… Па колькасці арыгіналаў у двух апошніх, пра якія ў школьным і студэнцкім узростах толькі чула і чытала, яны пераўзышлі ўсе іншыя, бачаныя мной дагэтуль!

Падчас працы ўласным карэспандэнтам абласной газеты адкрыла для сябе Старадарожскі гісторыка-этнаграфічны музей з яго заламі-ўшанаваннямі старадаўняй паштовай станцыі і быту беларусаў-сакуноў. І тут стае таемнасці ды загадкавасці.

Музеі. Старадарожскі музей.

Яшчэ адна цікавая мясціна, якая запала ў душу ды так і вабіць да сябе, – сядзібна-паркавы турыстычны комплекс «Дукорскі маёнтак», размешчаны ў Пухавіцкім раёне Мінскай вобласці, дзе ўдала паядналіся старажытнасць і сучаснасць. А яшчэ тут можна пачуцца шляхціцам ці шляхцянкай! І захапіцца далёкай гісторыяй, якая ўладна нагадвае пра сябе нават пошумам лістоты дрэў – вялізных, у некалькі абхватаў.

Што тычыцца Мінска, дык памятным сталася адно з наведванняў Нацыянальнага мастацкага музея Рэспублікі Беларусь, дзе досыць даўнавата ўжо адкрывалася выстава народнага мастака Уладзіміра Стальмашонка. Мы, супрацоўнікі Чэрвеньскага раённага краязнаўчага музея, паехалі туды ў суправаджэнні яго дзядзькі, Сямёна Майсеевіча Стальмашонка (светлая яму памяць!) – легендарнага чалавека, ветэрана Вялікай Айчыннай вайны, персанальнага пенсіянера рэспубліканскага значэння, вядомага старшыні калгаса, ардэнаносца, выдатніка сельскай гаспадаркі БССР. Столькі год прайшло, а сэрца памятае цеплыню таго мерапрыемства…

Падчас курсаў павышэння кваліфікацыі ў сярэдзіне 2000-х разам з новымі знаёмцамі – каляжанкамі Варварай Чаркоўскай з Салігорска і Ірынай Каваленкай са Случчыны – наведалі музей Максіма Багдановіча ў Траецкім прадмесці Мінска. У адной з яго залаў мне давялося нават стаць для маіх спадарожніц экскурсаводам, паколькі падчас працы ў раённым музеі цікавілася радаводам паэта. А як жа інакш, калі яго маці, Марыля Мякота, родам з нашага Ігумена, сучаснага Чэрвеня?!

Музеі. Музей М.Багдановіча ў Мінску.

А вось пра што шкадую, дык гэта пра тое, што не давялося папрацаваць у рэспубліканскіх архівах. Уяўляю сабе, колькі таямніцаў яны захоўваюць! А так хочацца адшукаць пабольш звестак з гісторыі Ігуменшчыны-Чэрвеньшчыны, з уласнага радаводу.

І няхай сабе аплата працы музейных работнікаў сваім памерам далёкая ад ідэалу, але затое якой цікавай справай яны займаюцца! У большасці сваёй гэта апантаныя (у самым добрым сэнсе!) людзі.Таму ўсіх супрацоўнікаў музеяў і музейных пакояў, комплексаў, палацаў і замкаў – з прафесійным святам! Пабольш вам цікаўных і ўдзячных наведвальнікаў, годных заробкаў, новых адмысловых экспанатаў і яшчэ шмат сапраўдных гістарычных адкрыццяў!

Матэрыялы на сайце 24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце 24health.by.

52 0 30

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.