12.07.2021
12.07.2021

«Святы Пётра ў косы звоніць, святы Паўла граблі робіць…»

logo
Адметнасць беларусаў
0 033
Памер шрыфта:
  • A
  • A
  • A

Дзень святых апосталаў Пятра і Паўла здаўна шануецца ў народзе. І нягледзячы на тое, што гэта свята царкоўнае, яно мае шмат «мірскіх» прыкметаў ды звычаяў. Перачытваю напісанае ў папярэднія гады – і выразна бачу, як адрозніваецца сёлетняе надвор’е ад сваіх «папярэднікаў». Калі там усё спрэс пра дажджы, дык у гэтым годзе…

Пётр і Павел. Такое рознае надвор'е 12 ліпеня.

Зрэшты, нам па прагнозе надвор’я быццам бы абяцаюць на сёння невялікі дождж. А значыць, гэтая традыцыя Пятровага дня мае шанц застацца нязменнай. Толькі ёй зусім не радыя тыя, хто вырошчае хлеб. Пара жніва і касавіцы надыходзіць (а ў некаторых раёнах – у разгары). Які тут дождж?! Калі збожжа так выспяляецца ды высыхае ў коласе…

А вось касцы, якія дагэтуль нарыхтоўваюць сена пры дапамозе звычайных косаў, радыя расе. Як ранішняй, так і вечаровай. Памятаеце гэтае?! «Касі, каса, пакуль раса…»

Дзень святых апосталаў Пятра і Паўла – свята ўрачыстае і вельмі добрае. А яшчэ крыху сумнае. Бо лічыцца, што гэта ўжо макаўка лета і што мы распачынаем шлях да восені. І як доказ гэтаму – змяншэнне светлавога дня: «Пётр-Павел на гадзіну дзень убавіў, Ілля-прарок два ўвалок». Ці яшчэ больш вядомае: «Прыйшоў Пятрок – апаў лісток».

Пётр і Павел. «Прыйшоў Пятрок – апаў лісток».

З прыемнага ж – разгаўленне ў вернікаў пасля Пятровага посту: «Чакай Пятра – сыру з’ясі…»

А ці атрымалася каму сёння раніцай паназіраць за сонцам?! Кажуць, што яно гэтак жа грае, як і на Купалле… Я, як заўсёды, усход праспала… Таму нічога не магу сказаць.

Цікава, што з Пятровага дня перастае куваць зязюля. Прычым тлумачэнні чытала розныя. Адны кажуць, што гэта яна «коласам падавілася», іншыя – што… сырам. Жартуюць, мабыць.

А яшчэ вычытала до-о-о-оўгую прыкмету на гэты конт: «Калі зязюля перастае куваць за тыдзень да Пятровага дня, то і зіма ляжа за тыдзень ці за два да Калядных запускаў. Калі ж зязюля куе тыдзень ці два пасля Пятровага дня, то і зіма ўляжацца праз гэтулькі ж часу пасля Пятровага дня, пасля запускаў на Піліпаў пост». Засталося прасачыць за зязюляй! 🙂

Пётр і Павел. Зязюля перастае куваць.

А калі сур’ёзна… Дык штосьці я яе даўно не чула на летніку. Хіба таксама маўчыць, бо ад гарачыні млосна?! Адны вераб’і ды ластаўкі актыўнічаюць… І, здаецца, першыя нацэліліся ўжо на вішні, якіх сёлета так багата, што звісаюць з дрэў цэлымі гронкамі!

Ну, а ў народзе казалі так: «І птушкі наверадзіліся, і ім ужо не да песень».

Калі вы аматар вудзіць рыбу, сёння варта памаліцца (ці проста звярнуцца з добрым словам, просьбай) да святых. Хаця лічыцца, што апекунамі рыбакоў з’яўляюцца абодва, але мы памятаем, што рыбнай лоўляй займаўся Пётр (і меў тады іншае імя) са сваім братам Андрэем.

У наш час тыя, хто носіць імя Пётр ці Павел, звычайна святкуюць імяніны. Сваім лічаць дзень святых апосталаў Пятра і Паўла і тыя, чые бацькі маюць ці мелі такія імёны (мой тата таксама Паўлавіч).

Пётр і Павел. Ушаноўваем 12 ліпеня.

Так і выбірае кожны для сябе: хто – даўнішняе, а хто – сучаснае, хто – царкоўнае, а хто – народнае. А хтосьці і тое, і другое… Альбо ўвогуле гэты дзень за свята не лічыць. А паколькі сёлета дзень будзённы, ды яшчэ і цяжкі, бо панядзелак… Прыгадалі, што адзначаецца 12 ліпеня, – і тое ўжо добра! 🙂 Затое раздолле таму, у каго – адпачынак!

А вось таму, хто распачынае жніво ці сенажаць, проста не пазайздросціш! Такая гарачыня шалёная на нас апусцілася! Таму хлебаробам нашым – моцы, вытрымкі і спрыяння прыроды ў выглядзе воблачнасці ды ветру.

Таго ж хочацца пажадаць і дачнікам-агароднікам. Палівы зараз – наша ўсё! І мы зусім не супраць дожджыку, няхай сабе нават невялікага. Ды і ў горадзе каб пыл прыбіла… І хаця б крыху астудзіла гарачы асфальт.

Пётр і Павел. У чаканні дажджу.

Таму ўшаноўваем сёння святых Пятра і Паўла і просім… Каму што патрэбна. Галоўнае – верыць, што нас сапраўды пачуюць… І паспрыяюць. А пра тое, якім выдаўся гэты дзень у папярэднія гады, чытайце, пераходзячы па спасылках!

«Чакай Пятра – сыру з’ясі…»

«Калі Пётра з Паўлам плачуць, дык людзі праз тыдзень свету не ўбачаць…»

Матэрыялы на сайце bel.24health.by носяць інфармацыйны характар і прызначаныя для адукацыйных мэтаў. Інфармацыя не павінна выкарыстоўвацца ў якасці медыцынскіх рэкамендацый. Ставіць дыягназ і прызначае лячэнне толькі ваш урач. Рэдакцыя сайта не нясе адказнасці за магчымыя негатыўныя наступствы, якія ўзніклі ў выніку выкарыстання інфармацыі, размешчанай на сайце bel.24health.by

0 0 33

Рэдактар сайта, журналіст, блогер. Вышэйшая філалагічная адукацыя.Нарадзілася ў вёсцы Клінок Чэрвеньскага раёна Мінскай вобласці. З 1980 года жыву ў г.Чэрвень.У 1996 годзе скончыла Беларускі дзяржаўны педагагічны ўніверсітэт імя Максіма Танка (дыплом з адзнакай) па спецыяльнасці «беларуская мова і літаратура». З 2003 па 2005 год па ўласнай ініцыятыве вучылася дыстанцыйна ў Еўрапейскай школе карэспандэнцкага навучання, маю пасведчанне аб заканчэнні курсу «Журналістыка».У журналістыцы – з 2001 года. Працавала загадчыкам аддзела пісьмаў і масавай работы, журналістам у газеце «Раённы веснік» (г.Чэрвень), уласным карэспандэнтам абласной газеты «Мінская праўда» па Чэрвеньскім, Уздзенскім і Старадарожскім раёнах. Шмат гадоў актыўна супрацоўнічала з газетамі «Звязда», «Голас Радзімы», «Народная газета», «Беларуская ніва», «Беларуская лясная газета», часопісам «Гаспадыня». З 2018 года – рэдактар беларускай версіі сайта «Здаровыя людзі», журналіст, аўтар блога «Думкі ўслых».З’яўляюся адным з аўтараў-укладальнікаў кнігі «Памяць. Чэрвеньскі раён», кніг «Матери Минщины» (абласны праект), «С любовью к детям» (рэспубліканскі праект). Аўтар першага ў Беларусі касмічнага інтэрв’ю (Міжнародная касмічная станцыя-Зямля) з касманаўтам Раскосмасу, ураджэнцам г.Чэрвеня Алегам Навіцкім (газета «Звязда», 2013 г.).Аўтар блогу на платформе bloger.by. У 2018 годзе прызнаная пераможцай першага рэспубліканскага творчага конкурсу на лепшае асвятленне ў сродках масавай інфармацыі і сацыяльных сетках лясной тэматыкі і дзейнасці органа дзяржаўнага кіравання ў намінацыі «За прасоўванне лясной тэматыкі ў сацыяльных сетках». Узнагароджана Дыпломам Міністэрства лясной гаспадаркі.